​បាល់ទាត់៖ ​ក្រុម Real Sociedad បាន​ក្លាយជា​ម្ចាស់​ជើងឯក​ការប្រកួត​ពានរង្វាន់ Copa del Rey ក្រោយ​ជ័យជំនះលើ Athletic Bilbao ១-០ នៅ​វគ្គ​ផ្តាច់ព្រ័ត្រ​។ ​​ការប្រកួត​វគ្គ​ផ្តាច់ព្រ័ត្រ​នេះ​ធ្វើឡើង​នៅ​ទីក្រុង Seville តែ​ជាវ​គ្គ​ផ្តាច់ព្រ័ត្រ​រដូវ​កាល​មុន ២០១៩-២០២០ ដែល​បាន​លើក​មក​ប្រកួត​នៅ​ចុង​សប្តាហ៍​កន្លងទៅនេះ​វិញ ដោយសារ​វិបត្តិ Covid-19​។

​​បន្ទាប់ពី​រង់ចាំ​ការពិនិត្យ​មើល​វិញ​តាមរយៈ VAR ក្រោយ​លេង​បាន ៥នាទី​នោះ អាជ្ញាកណ្តាល​ក៏បាន​សំរេច​ឲ្យបាល់​ពិន័យ ១១ម៉ែត្រ​ទៅឲ្យ Real Sociedad ខណៈ Mikel Oyarzabal ជា​អ្នក​ស៊ុត​សំរេច​គ្រាប់​បាល់​ជ័យជំនះ​តែ ១គ្រាប់​គត់​នៅ​វគ្គ​ផ្តាច់ព្រ័ត្រ​នេះ​។ ​​Bilbao ក៏មាន​ឱកាស​ដែរ​ក្នុងការ​តាម​ស្មើ តែ​ឱកាស​របស់ Inigo Martinez ស៊ុត​ពី​ចំងាយ​តែ​មិនបាន​សំរេច​។ ​​អតីត​កីឡា​ករ​របស់ Manchester City, David Silva បាន​ចូល​លេង​ឲ្យ Real Sociedad ៨៥នាទី​នៅ​វគ្គ​ផ្តាច់ព្រ័ត្រ​នេះ ខណៈ​អតីត​ខ្សែការពារ Arsenal, Nacho Monreal បាន​ចូល​លេង​ពេញ​ម៉ោង​។​

​​បន្ទាប់ពី​វគ្គ​ផ្តាច់ព្រ័ត្រ​នេះហើយ ក្រុម​ទាំងពីរ​ក៏​នឹងត្រូវ​ជួបគ្នា​ម្តងទៀត​ដែរ ​នៅ​រាត្រី​ថ្ងៃ​ពុធ​នេះក្របខណ្ឌ​អេ​ស្ប៉ា​ញ La Liga ខណៈ Sociedad ឈរ​លេខ៦ ឯ Bilbao លេខ៩​។ ​​Athletic Bilbao ក៏​នៅសល់​វគ្គ​ផ្តាច់ព្រ័ត្រ Copa del Rey មួយទៀត​នៅក្នុង​ដៃ​ដែរ ​ដោយ​នឹងត្រូវ​ជួប​ជា​មួយ Barcelona ម្តងទៀត​នៅ​ថ្ងៃទី១៧ ខែមេសា​នេះ​ ដែលជា​វគ្គ​ផ្តាច់ព្រ័ត្រ​សំរាប់​រដូវ​កាល ២០២០-២០២១ នេះ​៕

​អត្ថបទ​៖​នាង សុភា​វុ​ធ