ភ្នំពេញ៖ ក្នុងពេលបច្ចុប្បន្នការធ្វើនវានុវត្តន៍មានសារៈសំខាន់ណាស់ក្នុងវិស័យមុខងារសាធារណៈ ដោយសារតែនវានុវត្តន៍ក្នុងរដ្ឋបាលសាធារណៈ ​ធ្វើឲ្យប្រសើរឡើងនូវគុណភាព និងជួយកាត់​បន្ថយថ្លៃ​ចំណាយនៅក្នុងការផ្តល់សេវាសាធារណៈ។នេះបើតាមតំណាង​រដ្ឋមន្រ្តីក្រសួង​មុខងារ​ធារណៈ បានថ្លែងក្នុងសិក្ខាសាលាមួយនៅព្រឹកនេះ។

ឯកឧត្តម យក់ ប៊ុនណា រដ្ឋលេខាធិកាប្រចាំការ និងជានាយកសាលាភូមិន្ទរដ្ឋបាល នៃក្រសួងមុខងារសាធារណៈ ​តំណាងឯកឧត្តមរដ្ឋមន្រ្តី ​នៅថ្ងៃទី២៩ខែសីហានេះ បានអញ្ចើញ​ចូលរួម​ជាអធិបតីភាព ក្នុងពិធីបើកវគ្គបណ្តុះបណ្តាលជំនាន់ទី៣ ​ស្តីពី «ភាពជាអ្នកដឹកនាំ និង​នវានុវត្តន៍» ក្រោមកិច្ចសហប្រតិបត្តិការ​ រវាងក្រសួងមុខងារសាធារណៈ ​និងធនាគារពិភពលោក (World Bank)។

ពិធីបើកវគ្គបណ្តុះបណ្តាលនេះ ​ធ្វើឡើងនៅសាលាភូមិន្ទរដ្ឋបាល ដែល​មាន​ការ​អញ្ជើញ​ចូលរួម​ពីដៃ​គូអភិវឌ្ឍន៍​រួមមាន តំណាងធនាគារពិភពលោក សហភាពអឺរ៉ុបប្រចាំប្រទេសកម្ពុជា ស្ថានទូត​អូស្ត្រាលី​ប្រចាំប្រទេសកម្ពុជា ​ថ្នាក់ដឹកនាំនៃក្រសួងមុខងារសាធារណៈ និងសិក្ខាកាមជាង ២០០នាក់។ក្នុងវគ្គបណ្តុះបណ្តាល ​មានគោលបំណងគាំទ្រការអភិវឌ្ឍចំណេះដឹង ​ជំនាញ និង​ផ្តល់នូវឱកាសបណ្តុះបណ្តាល ដែលឆ្លើយតបនឹងតម្រូវការអភិវឌ្ឍ​សមត្ថភាពពិត​ប្រាកដ​របស់មន្ត្រីជាន់ខ្ពស់កម្ពុជា។

នៅក្នុងឱកាសនោះ ឯកឧត្តម យក់ ប៊ុនណា មានប្រសាសន៍ថា ប្រធានបទថ្ងៃនេះ គឺសមស្រប​នឹង​គោលនយោបាយ​និងកម្មវិធីកំណែទម្រង់របស់​រាជរដ្ឋាភិបាលកម្ពុជា និងស្របតាម​សភាពការណ៍​នាពេលបច្ចុប្បនេះ ជាពិសេសការរីករាលដាលនៃជំងឺកូវីដ១៩ ​នៅកម្ពុជា ក្នុងតំបន់ និងសកលលោក​ទាំងមូល។ នវានុវត្តន៍ក្នុងរដ្ឋបាលសាធារណៈ ​គឺផ្ដោតសំខាន់លើដំណើរការ ​ផលិតផល សេវាកម្ម ដែល​មាន​តម្លៃបន្ថែម ​កាន់តែឆ្លើយតបនឹងតម្រូវការរបស់ប្រជាពលរដ្ឋ ​និងធុរជននានា។​ ក្រៅពីនេះ ឯកឧត្តម បានលើកឡើងពីសារៈសំខាន់នៃការដឹកនាំប្រកបដោយនវានុវត្តន៍ផងដែរ ។

កន្លងទៅ រាជរដ្ឋាភិបាលបានរៀបចំផែនការអភិវឌ្ឍប្រទេស ដោយបានដាក់ចេញនូវកម្មវិធី​កំណែ​ទម្រង់អាទិភាពសំខាន់ៗជាច្រើនរួមមាន៖​ កំណែទម្រង់រដ្ឋបាលសាធារណៈ ​កំណែទម្រង់វិមជ្ឈការ និងវិសហមជ្ឈការជាដើម ៕ អត្ថបទ៖ទូច សោភ័ណ