សៀមរាប៖ ក្រុមការងារតម្រង់ទិសដោះស្រាយសំណង់ខុសច្បាប់នៅតំបន់អង្គរ នៃក្រសួងរៀបចំ​ដែនដី នគរូបនីយកម្ម និងសំណង់ បានឱ្យដឹងថា អាជ្ញាធរបាននឹងកំពុង​មមាញឹកក្នុងការ​ឈូសឆាយ​តំបន់រុនតាឯក ដើម្បី សង់លំនៅថ្មីជូនពលរដ្ឋ ដែលបានយល់ព្រម​ចាកចេញពីលំនៅឋាន​ក្នុង​តំបន់រមណីយ​ដ្ឋានអង្គរ ។

ឯកឧត្ដម ប៉េងហុង សុជាតិខេមរ៉ូ អគ្គនាយកនៃអគ្គនាយករដ្ឋាន ក្រសួងរៀបចំដែនដី នគរដែនដី និងសំណង់ និងជាសមាជិកក្រុមការងារតង្រង់ទិសវាស់វែងដីនៅតំបន់រមណីដ្នានអង្គរ​ បានឱ្យដឹងថា បច្ចុប្បន្ននេះ ​ទីតាំងដីភូមិរុនតាឯក ​ស្រុកបន្ទាយស្រី ​សម្រាប់ឱ្យប្រជាពលរដ្ឋប្ដូរទីលំនៅចេញ​ពី​តំបន់អង្គរ មានកម្លាំងជាច្រើននាក់ ​បានកំពុងធ្វើការឈូសឆាយ​ និងកាប់ឆ្ការព្រៃ ដើម្បីបង្កើត​ជា​ភូមិស្របច្បាប់។ នៅទីនោះមានផ្សារ ផ្លូវថ្នល់ សាលារៀន វត្ដអារាម មន្ទីរពេទ្យ ដោយមិនឱ្យ​ប្រជាពលរដ្ឋ​រស់នៅទីនោះ​ លំបាកឡើយ។

លោក ហាយ យុង តំណាងក្រុមការងារតម្រង់ នៃការវាស់វែងដីនៅតំបន់អង្គរ ​បានបញ្ជាក់ថា ការ​ចាប់ឆ្នោត​យកក្បាលដីរបស់ពលរដ្ឋនៅសង្កាត់គោកចក ​ដែលត្រូវប្ដូរទៅរស់នៅភូមិរុនតាឯក ស្រុកបន្ទាយស្រី មកដល់ថ្ងៃទី២៧ ​ខែសីហានេះ ​មានចំនួន៩៣៦គ្រួសារ ក្នុងនោះមានភូមិ​ទក្សិណ​ខាងត្បូង និងភូមិ ត្រពាំងសេស សង្កាត់គោកចក ក្រុងសៀមរាប៕

អត្ថបទ៖ ឈិត សាវី