ភ្នំពេញ៖ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បន្តចូលរួមយុទ្ធការចុះចាក់វ៉ាក់សាំង​បង្ការ​ជំងឺកូវីដ-១៩ ក្នុងក្របខណ្ឌទូទាំងប្រទេសដោយឥតគិតថ្លៃ ​និងឥតគិតថវិកាបេសកកម្ម។

ជាក់ស្តែងនៅព្រឹកថ្ងៃទី៣០ ខែសីហានេះ ​ក្រុមការងារគ្រូពេទ្យស្ម័គ្រចិត្ត ​ឯកឧត្តម ហ៊ុន ម៉ានី បាន​សហការជាមួយក្រុមគ្រូពេទ្យ នៃមនី្ទរពេទ្យបង្អែករាជធានីភ្នំពេញ ​ចាក់វ៉ាក់សាំងបង្ការជំងឺកូវីដ-១៩ ចាប់ពីដូសមូលដ្ឋាន រហូតដល់ដូសជំរុញទី៥ ជូនប្រជាពលរដ្ឋ ដើម្បីឈានទៅបញ្ចប់​ការ​រីក​រាលដាល​នៃជំងឺកូវីដ១៩ នៅក្នុងប្រទេសកម្ពុជា។

ជាមួយគ្នានោះដែរប្រជាពលរដ្ឋ ក្មេង​ ចាស់ ប្រុស ស្រី មកចាក់វ៉ាក់សាំងបង្ការជំងឺកូវីដ-១៩​បង្ហាញ​ពី​អារម្មណ៍រីករាយណាស់ ​ដែលទទួលបានភាពកក់ក្តៅពីលោកគ្រូពេទ្យ​ អ្នកគ្រូពេទ្យស្ម័គ្រចិត្តឯកឧត្តម ហ៊ុន ម៉ានី និង​គ្រូពេទ្យនៃមនី្ទរពេទ្យបង្អែករាជធានីភ្នំពេញ ​បានចាក់វ៉ាក់សាំងជូន ជាពិសេស​សូម​គោរព​ថ្លែងអំណរគុណយ៉ាងខ្លាំងចំពោះសម្តេចតេជោ ហ៊ុន សែន នាយករដ្ឋមន្រី្តនៃព្រះរាជាណា​ចក្រ​កម្ពុជា ​យកចិត្តទុកដាក់ចំពោះសុខទុក្ខ ​របស់ប្រជាពលរដ្ឋជារៀងរហូតមក។

បើតាមឯកឧត្តម លេង ផាលី រដ្ឋលេខាធិការក្រសួងផែនការ និងជាប្រធានប្រតិបត្តិក្រុមការងារ​គ្រូ​ពេទ្យ​ស្ម័គ្រចិត្តឯកឧត្តម ​ហ៊ុន ម៉ានី បានថ្លែងថា​ ក្នុងរយៈពេលជាង១០ឆ្នាំ ក្រោមការដឹកនាំដ៏ខ្ពង់ខ្ពស់​ដោយផ្ទាល់ការចង្អុលបង្ហាញជាប្រចាំប្រកបដោយទស្សនវិស័យវែង​ឆ្ងាយ និងប្រាកដប្រជាគួរ​ឱ្យ​គោរព​កោតសរសើរ ​របស់ឯកឧត្តម ហ៊ុន ម៉ានី ប្រធាន​កិត្តិយស​ក្រុមការងារគ្រូពេទ្យស្ម័គ្រចិត្ត​ឯកឧត្តម ហ៊ុន ម៉ានី ដែលមានក្រុមគ្រូពេទ្យចំនួន​ ៦,៧៧៩នាក់ ក្នុងនោះស្ត្រីមានចំនួន ​៣,៦៩៦នាក់ ដឹកនាំនិង​សម្របសម្រួល​ដោយរូបឯកឧត្តមផ្ទាល់ បានបំពេញបេសកកម្មដ៏ថ្លៃថ្លា​ដោយទទួលបាន​លទ្ធផល​ប្រកប​ដោយប្រសិទ្ធភាព​ និងប្រសិទ្ធផលជាច្រើនឥតគណនា ក្នុងការចូលរួមអប់រំ​ផ្សព្វផ្សាយ​ ចាក់វ៉ាក់សាំងបង្ការកូវីដ-១៩​ ក្នុងក្របខណ្ឌទូទាំងប្រទេស សង្គ្រោះបឋម​ យកសំណាក រកវីរុសកូវីដ-១៩ និងពិនិត្យ ព្យាបាលជំងឺជូនប្រជាពលរដ្ឋដោយឥតគិតថ្លៃក្នុង ​២៥រាជធានី-ខេត្ត នៃ​ព្រះរាជាណាចក្រកម្ពុជា​ និងបានពិនិត្យព្យាបាលជំងឺ ​និងចែកថ្នាំជូនប្រជាពលរដ្ឋដោយឥតគិតថ្លៃ ជា​ពិសេសនៅពេលប្រទេសជាតិទទួលរងការរាតត្បាតនៃជំងឺកូវីដ-១៩ ដោយទទួលបានការអនុញ្ញាត​ដ៏​ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ​នៃព្រះរាជាណាចក្រកម្ពុជា និង​ក្រោមការដឹកនាំសម្របសម្រួលដោយផ្ទាល់ពី ឯកឧត្តមប្រធាន ហ៊ុន ម៉ានី ក្រុមការងារគ្រូពេទ្យ​ស្មគ្រ័ចិត្ត​ឯកឧត្តម ហ៊ុន ម៉ានី ចំនួន២,៩៤៥នាក់ បានចុះបេសកកម្មតាមការឧទ្ទេសនាម​របស់​គណៈកម្មការ​ចំពោះកិច្ច​ចាក់​វ៉ាក់សាំង​បង្ការ​ជំ​ងឺកូវីដ-១៩ ​ដោយស្ម័គ្រចិត្តឥតគិតថវិកាបេសកកម្ម ដោយ​ចាក់វ៉ាក់សាំងជូនប្រជាពលរដ្ឋ ​ក្នុង២៥ រាជធានី-ខេត្ត៕ អត្ថបទ រដ្ឋា