កោះកុង៖ លោកអភិបាលស្រុកបូទុមសាគរ មេឃុំអណ្តូងទឹក និងយុវជនស្ម័គ្រចិត្ត បានរួមគ្នាបន្តដាំកូនឈើជាង ២០០ដើមបន្ថែមទៀត នៅលើសួនយុវជនភ្នំត្រងោល បន្ទាប់ពីបានដាំកូនឈើប្រណិតជាង២០០ដើម ដែលជាការផ្តល់ដោយអ្នកឧកញ៉ា ម៉ុង ឬទ្ធី។

កូនឈើគគីរ២០០ដើម ត្រូវបានព្រះសង្ឃ ក្រុមប្រឹក្សាស្រុក អភិបាលស្រុកបូទុមសាគរ មេឃុំអណ្តូងទឹក មេភូមិ និងយុវជនស្ម័គ្រចិត្តប្រមាណ ៨០អង្គនាក់ បន្តខិតខំដាំដុះនៅសួនយុវជន​ទើប​បង្កើតថ្មីលើភ្នំត្រងោល ​ក្នុងគោលបំណងដើម្បីលើកកម្ពស់​សោភណ្ឌ​បរិស្ថានតាមព្រំដែនដី ទីកន្លែងគោរពបូជាបែបសាសនា និងទាក់ទាញភ្ញៀវទេសចរទៅលេងកម្សាន្ត។

លោក ហាក់ ឡេង អភិបាលស្រុកបូទុមសាគរ បានឱ្យដឹងនៅថ្ងៃទី៣០ ខែសីហា ឆ្នាំ២០២២ថា ដោយ​មានការគាំទ្រពេញ​ទំហឹង​ដោយលោកជំទាវ មិថុនា ភូថង អភិបាលខេត្តកោះកុង កូនឈើប្រភេទ​គគីរជាង ២០០ដើមនេះ បានមកពីរដ្ឋបាលព្រៃឈើខេត្ត សម្រាប់ដាំដុះបម្រើដល់​ប្រយោជន៍​សាធារណៈ​បានស្គាល់ប្រភេទឈើប្រណិតនៅលើសួនយុវជនភ្នំត្រងោល​ដែលទើបបង្កើតថ្មីនេះ។

បើតាមលោកអភិបាលស្រុកបូទូមសាគរ សួនយុវជនភ្នំត្រងោល បច្ចុប្បន្ន​ដ៏មាន​សក្កានុពល​មួយ​ផងដែរ​ខាងផ្នែកទេសចរណ៍ កំពុងត្រូវបានអាជ្ញាធរគ្រប់ជាន់ថ្នាក់យកចិត្តទុកដាក់ស្ថាបនា​នូវ​ហេដ្ឋា​រចនា​សម្ព័ន្ធ​ជាបន្តបន្ទាប់រួមមាន៖ វត្តអារាម រូបបដិមាករ​ រូបភាពតំណាងនៃក្តីស្រឡាញ់​ ដាំស្មៅ និងរៀបចំទីកន្លែងសម្រាប់បោះជំរុំជាដើម។

កាលពីថ្ងៃទី១៩ ខែសីហា កន្លងទៅ អាជ្ញាធរស្រុកបូទុមសារ មន្រ្តីការិយាល័យជំនាញ មេឃុំ មេភូមិ និងយុវជនទូទាំងស្រុក បានដាំដុះកូនឈើប្រណិតជាង ២០០ដើមនៅសួនយុវជនភ្នំត្រងោល ភូមិជីមាល ឃុំអណ្តូងទឹក ក្រោយស្នើសុំ និងទទួលបានពី​ឯកឧត្តមអ្នកឧកញ៉ា ម៉ុង ឬទ្ធី ម្តងរួចមកហើយ។

សួនយុវជនភ្នំត្រងោល មានផ្ទៃដីសរុបជិត ៩ហិកតា ជាដីបម្រុងទុករបស់រដ្ឋបាលស្រុកបូទុមសាគរ កន្លងទៅ​អាជ្ញាធរភូមិឃុំស្រុកខេត្ត ​បាន​ពុះពារការងារជាច្រើន ដើម្បីឱ្យសួនមួយនេះកកើត​ជាទីតាំង​ដែលតម្លៃ ​និង​សក្កានុពល​ខាងផ្នែកទេសចរណ៍ដល់ប្រជាពលរដ្ឋ ​និងអ្នកទេសចរគ្រប់គ្នា អាច​មក​លេង​កម្សាន្តស្រូបយកខ្យល់អាកាសបរិសុទ្ធ​ ៕អត្ថបទ៖ ឈឹម មករា