ភ្នំពេញ ៖ រដ្ឋបាលរាជធានីភ្នំពេញបានរៀបចំពិធីក្រុងពាលីតាមបែបសាសនា មុននឹងចាប់ដំណើរការសាងសង់ស្ពានអាកាស២កន្លែងបន្ថែមទៀតក្នុងរាជធានីភ្នំពេញ។

ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ និងលោកជំទាវ ព្រមទាំងមន្ត្រីរាជការរាជធានីភ្នំពេញនារសៀលថ្ងៃទី៣០ ខែសីហា ឆ្នាំ២០២២ បានរៀបចំពិធីសែនក្រុងពាលីតាមបែបសាសនា ដើម្បីបួងសួងសុំសេចក្តីសុខសេចក្តីចំរើនពីម្ចាស់ទឹកម្ចាស់ដី អ្នកថែរក្សាភូមិករ ទីតាំងប្រារព្វពិធីបើកការដ្ឋានសាងសង់ស្ពានអាកាសនៅតំបន់ច្រមុះជ្រូកក្បាល និងការដ្ឋានសាងសង់ស្ពានអាកាសតំបន់ស្តុបស៊ិនជូរីប្លាហ្សានាថ្ងៃទី៣១សីហាស្អែកនេះ ក្រោយអធិបតីភាពដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី។

ពិធីក្រុងពលីតាមប្រពៃណីព្រះពុទ្ធសាសនាមុនមួយថ្ងៃនៃពិធីបើកការដ្ឋានសាងសង់ស្ពានអាកាស២កន្លែងព្រមគ្នាបន្ថែមទៀតក្នុងរាជធានីភ្នំពេញ គឺស្ពានអាកាសទី១នៅត្រង់ចំណុចប្រសព្វមហាវិថីសម្តេចតេជោ ហ៊ុន សែន ហៅផ្លូវ៦០ម៉ែត្រ និងមហាវិថីព្រះមុន្នីវង្ស វិថីកងយោធពលខេមរភូមិន្ទ ហៅផ្លូវលេខ២៧១ ។ ស្ពានអាកាសទី២ ត្រង់ចំណុចប្រសព្វមហាវិថីសហពន្ធ័រុស្ស៊ី ជាមួយនឹងវិថីសម្តេចចៅហ្វាវាំង

វរះវៀងជ័យធិបតីស្រឹង្គារ គង់ សំអុល ហៅផ្លូវ២០០៤ និងផ្លូវលេខ២០១១ ដែលនេះជាសមិទ្ធផលថ្មីបន្ថែមទៀតដែលនឹងលេចចេញជារូបរាងក្នុងពេលឆាប់ៗខាងមុខក្នុងរាជធានីភ្នំពេញ ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី បានធ្វើឲ្យរាជធានីភ្នំពេញនិយាយដោយឡែកមានការអភិវឌ្ឍន៍រីកចំរើនលើគ្រប់វិស័យ បំរើឲ្យសេចក្តីត្រូវការជាក់ស្តែងរបស់ប្រជាពលរដ្ឋក្នុងទីក្រុង ពិសេសកាត់បន្ថយការកកស្ទះចរាចរណ៍ គ្រោះថ្នាក់ចរាចរ និងសម្រួលដល់ការធ្វើដំណើររបស់ប្រជាពលរដ្ឋក្នុងរាជធានីភ្នំពេញ ដែលមានការកើនឡើងទាំងចំនួនមនុស្ស និងមធ្យោបាយធ្វើដំណើរ។

ជាមួយគ្នានេះរដ្ឋបាលរាជធានីភ្នំពេញក៏បានសុំការយោគយល់អធ្យាស្រ័យពីអ្នកធ្វើដំណើរតាមដងផ្លូវដែលត្រូវប្រារព្វពិធីនៅពេលដែលរដ្ឋបាលរាជធានីភ្នំពេញបានសម្រេចបិទចរាចរជាបណ្តោះអាសន្ន ដើម្បីបង្កឱកាសក្នុងការប្រារព្វពិធីប្រកបដោយសន្តិសុខ សណ្តាប់ធ្នាប់ របៀបរៀបរយសាធារណៈល្អប្រសើរ ហើយនៅពេលពិធីបញ្ចប់ ចរាចរនឹងត្រូវបើកដំណើរការឡើងវិញជាធម្មតា៕ អត្ថបទ ៖ ប្រាក់ វ៉ាន់ដា