ភ្នំពេញ ៖ ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល និងថ្នាក់ដឹកនាំ នៅថ្ងៃទី៥ មេសា ២០២១នេះ បានចុះពិនិត្យទីតាំង និងរៀបចំចាត់ចែងដាក់ដំណើរការមនី្ទរពិសោធន៍ធ្វើតេស្តរកមេរោគកូវីដ១៩ នៅមជ្ឈមណ្ឌលជាតិផ្តល់ឈាម។

​

ឯកឧត្តម សាស្រ្តាចារ្យ ម៉ម ប៊ុនហេង បានលើកឡើងថា ដោយអនុវត្តន៍តាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា ក្រសួងសុខាភិបាល បានពង្រីកមនី្ទរពិសោធន៍ធ្វើតេស្តរកមេរោគកូវីដ-១៩ នៅក្នុងមជ្ឈមណ្ឌលជាតិផ្តល់ឈាម ដោយក្នុង១ថ្ងៃ អាចធ្វើតេស្តរកមេរោគកូវីដ១៩ បានចំនួន១៣០០តេស្ត និងពង្រីក ០១ទីតាំងទៀត នៅក្នុងវិទ្យាស្ថានសុខភាពសាធារណៈ ដែលបានជួយសម្រួលដល់វិទ្យាស្ថានប៉ាស្ទ័រ ដើម្បីចែករំលែកវត្ថុសំណាកនេះ ធ្វើរហ័ស និងទទួលបានចំនួនច្រើន ដើម្បីឆ្លើយតបទៅមូលដ្ឋានសុខាភិបាលរបស់យើង។

​

ឯកឧត្តម សាស្រ្តាចារ្យ ម៉ម ប៊ុនហេង បានបញ្ជាក់ទៀតថា សព្វថ្ងៃមន្រី្តបុគ្គលិកសុខាភិបាល រួមទាំងមន្រី្តអាជ្ញាធរមូលដ្ឋានគ្រប់ផ្នែកទាំងអស់ បានខិតខំប្រឹងប្រែងទាំងអស់គ្នា ដោយស្មារតីទទួលខុសត្រូវ យើងបានប្តេជ្ញាចិត្តទាំងថ្ងៃ ទាំងយប់ ដើម្បីប្រយុទ្ធនឹងជំងឺកូវីដ១៩។ ទន្ទឹមនឹងនោះ រាជរដ្ឋាភិបាល សម្តេចតេជោ ក៏ដូចជាក្រសួងសុខាភិបាល បានជម្រាបជូនហើយថា ៣ការពារ ៣កុំ និងចាក់វ៉ាក់សាំងបង្ការជំងឺកូវីដ១៩។ ដូច្នេះសូមបងប្អូនប្រជាពលរដ្ឋទាំងអស់ សូមទៅទទួលការចាក់វ៉ាក់សាំង ដែលរាជរដ្ឋាភិបាល បានរៀបចំចាក់វ៉ាក់សាំងជូន ទៅតាមគោលដៅរបស់រាជរដ្ឋាភិបាលបានដាក់ចុះ ធ្វើយ៉ាងណាកុំរុញរា សូមអញ្ជើញទៅចាក់វ៉ាក់សាំង តាមការអញ្ជើញរបស់អាជ្ញាធរមូលដ្ឋាន ជាពិសេសបើមិនចាំបាច់ សូមនៅផ្ទះ កុំចេញទៅណា។ ដោយឡែកការបញ្ចប់បាននូវព្រឹតិ្តការណ៍សហគមន៍ ២០ កុម្ភះ បានឆាប់ ឬនៅ គឺសំខាន់លើការអនុវត្តន៍របស់បងប្អូនប្រជាពលរដ្ឋ ប្រសិនបើបងប្អូននៅផ្ទះ មិនប៉ះពាល់អ្នកដទៃ មានន័យថាបងប្អូនប្រជាពលរដ្ឋទាំងអស់ មានសុវតិ្ថភាព៕អត្ថបទ ៖ រដ្ឋា