ភ្នំពេញ៖ រដ្ឋបាលរាជធានីភ្នំពេញ បានចេញសេចក្ដីណែនាំ ស្ដីពី ការរឹតបន្តឹងការអនុវត្តវិធានការសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយ និង វិធានការបង្ការ ទប់ស្កាត់ការរាតត្បាតនៃជំងឺកូវីដ-១៩ ក្នុងឱកាសឈប់សម្រាក នៃពិធីបុណ្យចូលឆ្នាំថ្មី និងចៀសវាងការធ្វើដំណើរចេញក្រៅលំនៅឋាន ឬ ទីសំណាក់ដែលមិនចាំបាច់។
រដ្ឋបាលរាជធានីភ្នំពេញ នាថ្ងៃទី០៥ ខែមេសា ឆ្នាំ២០២១ បានចេញសេចក្ដីណែនាំលេខ ០០៦/២១ សណន ដោយបានធ្វើការណែនាំ៩ចំណុចសំខាន់ៗ ក្នុងឱកាសឈប់សម្រាក នៃពិធីបុណ្យចូលឆ្នាំថ្មីប្រពៃណីជាតិ ឆ្នាំឆ្លូវត្រីស័ក ព.ស.២៥៦៥ គ.ស .២០២១ ខាងមុខនេះ និងស្របពេលដែល "ព្រឹត្តិការណ៍ សហគមន៍ ២០កុម្ភៈ ២០២១” ក្នុងមូលដ្ឋានរាជធានីភ្នំពេញមិនទាន់មានភាពធូរស្រាលនៅឡើយនោះ។ រដ្ឋបាលរាជធានីភ្នំពេញ បានធ្វើការណែនាំដល់ប្រជាពលរដ្ឋ យុវជន-យុវនារី កម្មករ-កម្មការិនី និងសាធារណជនទាំងអស់ ត្រូវចូលរួមអនុវត្តវិធានការសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយ និងវិធានការបង្ការ ទប់ស្កាត់ការរាតត្បាតនៃជំងឺកូវីដ-១៩។
សេចក្ដីណែនាំរបស់រដ្ឋបាលរាជធានីភ្នំពេញមានដូចជា ១. ត្រូវបង្កើនស្មារតីប្រុងប្រយ័ត្នខ្ពស់ចំពោះភ្លើងទៀន ធូប ភ្លើងចង្ក្រាន ការប្រើប្រាស់ប្រេងឥន្ធនៈ ឧស្ម័ន ហ្គាស៍ និងចរន្តអគ្គិសនី ដើម្បីបង្ការ ទប់ស្កាត់គ្រោះអគ្គិភ័យជាយថាហេតុ និងដើម្បីបញ្ចៀសការបាត់បង់ទ្រព្យសម្បត្តិ និងអាយុជីវិតប្រជាពលរដ្ឋទូទៅ។ ២.ហាមដាច់ខាតការលេងល្បែងស៊ីសងគ្រប់ប្រភេទ និងការលេងបាញ់ទឹក ជះទឹក គប់ស្បោងទឹក ប៉ាតម្សៅ លាបធ្យូង វាយដោយរំពាត់ ឬឧបករណ៍ផ្សេងៗ អុជផាវ និងគ្រឿងផ្ទុះផ្សេងៗ ដែលជាសកម្មភាពខុសច្បាប់ និងប៉ះពាល់យ៉ាងធ្ងន់ធ្ងរដល់ប្រពៃណីដ៏ល្អផូរផង់របស់សង្គមជាតិ។
៣. ចៀសវាងការធ្វើដំណើរចេញក្រៅលំនៅឋាន ឬ ទីសំណាក់ដែលមិនចាំបាច់ និងចៀសវាងការធ្វើ ដំណើរកម្សាន្ត ឬ ធ្វើដំណើរទៅកាន់ខេត្តផ្សេងៗ ដែលអាចជាហានិភ័យខ្ពស់នៃការចម្លងជំងឺកូវីដ-១៩ ទៅបុគ្គលដទៃ គ្រួសារផ្សេងទៀត និងក្នុងសហគមន៍កាន់តែធ្ងន់ធ្ងរ ព្រោះថា រាជធានីភ្នំពេញ ត្រូវបានក្រសួងសុខាភិបាល កំណត់ថាជាទីតាំងភូមិសាស្ត្រក្នុងចំណោម ៥ រាជធានី-ខេត្ត មានការឆ្លងរាលដាល នៃជំងឺកូវីដ-១៩ ក្នុងព្រឹត្តិការណ៍សហគមន៍ ២០ កុម្ភៈ ២០២១។ ៤. ផ្អាកការរៀបចំសង្ក្រាន្ត "វត្តភ្នំ” និងការរៀបចំសង្ក្រាន្តតាមបណ្តាខណ្ឌទាំង ១៤ ក្នុងឱកាសនៃពិធី បុណ្យចូលឆ្នាំខ្មែរប្រពៃណីជាតិ ឆ្នាំឆ្លូវ ត្រីស័ក ព .ស.២៥៦៤ គ.ស.២០២១ នាពេលខាងមុខនេះ ។
៥. ហាមដាច់ខាតការប្រមូលផ្តុំរៀបចំកម្មវិធីកម្សាន្តបែបប្រពៃណី កម្មវិធីរាំច្រៀង ពិធីជប់លៀង និងការជួបជុំគ្រប់ប្រភេទ ដែលមានសភាពអ៊ូអរ និងមានមនុស្សចូលរួមច្រើន លើកលែងតែការជួបជុំក្នុង ចំណោមសមាជិកគ្រួសារដែលរស់នៅក្នុងលំនៅឋាន ឬ ទីសំណាក់ជាមួយគ្នា។
៦. គ្រប់វត្តអារាម ទីកន្លែងសក្ការៈបូជា រមណីយដ្ឋាន ភោជនីយដ្ឋាន អាហារដ្ឋាន អាជីវកម្មដ្ឋាន និង ទីតាំងសប្បាយភាពនានា ត្រូវផ្តល់កិច្ចសហការល្អជាមួយអាជ្ញាធរមូលដ្ឋាន និងមន្ត្រីជំនាញមានសមត្ថកិច្ច ក្នុងនោះគណៈគ្រប់គ្រង ឬម្ចាស់ទីតាំង ត្រូវចាត់ចែងអនុវត្តដូចជា ចាត់ឱ្យមានអ្នកវាស់កម្តៅ បាញ់អាល់កុល ជែល ចែកម៉ាស និងចូលរួមអនុវត្តការស្កេន QR Code ទប់ស្កាត់កូវីដ ឬStop Covid អនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាពឱ្យបានត្រឹមត្រូវ រៀបចំទីតាំង ឱ្យមានខ្យល់ចេញ-ចូលគ្រប់គ្រាន់ ចៀសវាងទីតាំងបិទជិត និងប្រើម៉ាស៊ីនត្រជាក់ច្រើនពេក និងកំណត់ចំនួនមនុស្សចេញ-ចូលជាអតិបរមា សមាមាត្រទៅនឹងទំហំទីតាំង ចៀសវាងដាច់ខាតការ ប្រជ្រៀតគ្នា ឬ ប្រមូលផ្តុំមនុស្សច្រើន ខុសពីវិធានសុខាភិបាល។ ៧.ចំពោះក្រុមហ៊ុនដឹកជញ្ជូនអ្នកដំណើរគ្រប់ប្រភេទ ក្នុងមូលដ្ឋានរាជធានីភ្នំពេញ មិនត្រូវដំឡើងថ្លៃ សេវាដឹកជញ្ជូនអ្នកដំណើរឡើយ និងត្រូវយកចិត្តទុកដាក់អនុវត្តវិធានការសុខាភិបាល សំដៅបង្ការ និងទប់ស្កាត់ការឆ្លងរាលដាលនៃជំងឺកូវីដ-១៩ ក្នុងចំណោមអ្នកបើកបរ-បុគ្គលិក និងអ្នកដំណើរទាំងឡាយ ដែលប្រើប្រាស់សេវាកម្មដឹកជញ្ជូនរបស់ក្រុមហ៊ុនខ្លួន។
៨. សូមលើកទឹកចិត្តចំពោះការសម្រាកជួបជុំក្រុមគ្រួសារនៅក្នុងលំនៅឋានរៀងៗខ្លួន ហើយប្រសិនបើមានតម្រូវការចាំបាច់ខានមិនបានក្នុងការធ្វើដំណើរត្រូវប្រកាន់ខ្ជាប់ជានិច្ចការគោរពច្បាប់ស្តីពីចរាចរណ៍ផ្លូវគោក និងលិខិតបទដ្ឋានគតិយុត្តពាក់ព័ន្ធជាធរមាន សមស្របតាមពាក្យស្លោកដែលដាក់ចេញដោយ ប្រមុខរាជរដ្ឋាភិបាលកម្ពុជា គឺ “ថ្ងៃនេ៖ ថ្ងៃស្អែក គ្មានគ្រោះថ្នាក់ចរាចរណ៍” និងត្រូវអនុវត្តឱ្យបាន ម៉ឺងម៉ាត់តាមការណែនាំរបស់ក្រសួងសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ចូលទៅក្នុងសហគមន៍ ។ ៩- ត្រូវបង្កើនស្មារតីយកចិត្តទុកដាក់អនុវត្តវិធានការការពារខ្លួន គ្រួសារ និងសហគមន៍ ស្របតាមរបត់ថ្មីគឺ ការរស់នៅធម្មតា តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ-១៩ តាមរយៈការប្រកាន់ខ្ជាប់នូវគោលការណ៍ណែនាំរបស់ក្រសួងសុខាភិបាល និងវិធានការ ៣ ការពារ និង ៣កុំ របស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕ អត្ថបទ៖ ឡាយោ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
