ភ្នំពេញ៖ មន្ត្រីជាន់ខ្ពស់ក្រសួងសុខាភិបាល បានឱ្យដឹងថា ការថែទាំសុខភាពបឋម (PHC) គឺជាមូល ដ្ឋានគ្រឹះ ក្នុងការសម្រេចបាននូវការគ្របដណ្តប់សុខភាពជាសកល (Universal Health Coverage) និងដើម្បីការពារ និងគ្រប់គ្រងឆ្លើយតប ទាំងជំងឺឆ្លង ​និងជំងឺមិនឆ្លង ក៏ដូចជាការធានា​សុវត្ថិភាព​សុខភាពផង។

ក្នុងពិធីសិក្ខាសាលាពិគ្រោះយោបល់ លើសេចក្តីព្រាងក្របខ័ណ្ឌជំរុញការអនុវត្តថែទាំសុខភាព បឋម​នៅកម្ពុជា កាលពីរសៀលថ្ងៃទី៣០ ខែសីហានេះ លោកជំទាវវជ្ជបណ្ឌិត ឱ វណ្ណឌីន រដ្ឋលេខាធិ ការក្រសួង​សុខាភិបាល ​និងជាប្រធានក្រុមការងារអភិវឌ្ឍ និងគ្រប់គ្រងក្របខ័ណ្ឌអនុវត្តការ​ជំរុញ​បង្កើនការងារថែទាំសុខភាពបឋម​ ដែលហៅកាត់ថា ​(ក.ជ.ថ.ស.ប) ​បានបញ្ជាក់ថា ការថែទាំ​សុខភាព​បឋម ​គឺជាការថែទាំ​សុខភាព​ជា​សារវន្ត ដោយផ្តោតលើវិធីសាស្រ្ត ​និង​បច្ចេកវិទ្យា​ជាក់ស្តែង និងមាន​លក្ខណៈវិទ្យា សាស្រ្ត​ត្រឹមត្រូវ ដែល​សង្គមជាតិ​អាច​ទទួល​យកបាន ​និងអាចផ្តល់​ជូន​គ្រប់​បុគ្គល និងគ្រប់​ក្រុមគ្រួសារនៅ​ សហគមន៍​ តាមរយៈការចូលរួម​ដ៏ពេញលេញរបស់ពួកគេ ព្រម​ទាំងតម្លៃ ដែលសហគមន៍ និងប្រទេសជាតិអាចរកប្រាក់បង់បាន។

លោកស្រីវេជ្ជបណ្ឌិត លី អាយលែន ​តំណាងអង្គការសុខភាពពិភពលោក (WHO) ​ប្រចាំកម្ពុជា បាន​លើកឡើងដែរថា​ ដើម្បីសម្រេចការជំរុញបង្កើនការងារ​ថែទាំ​សុខភាព​បឋម​នៅកម្ពុជា WOH នឹងបន្ត គាំទ្រ​ដល់ក្រសួងសុខាភិបាល​ រហូត​ទទួល​បានជោគជ័យលើការងារនេះ។

តាមការឱ្យដឹង ​សេចក្តីព្រាងក្របខ័ណ្ឌអនុវត្តការជំរុញ​បង្កើនការងារថែទាំ​សុខភាពបឋម​នៅកម្ពុជា អាច​នឹងបញ្ចប់នៅមុនខែតុលា ​ឆ្នាំ២០២២ បន្ទាប់មក​នឹងត្រូវដាក់ជូនរដ្ឋមន្រ្តីក្រសួងសុខាភិបាល សម្រេច​ ។ ​នេះបើតាមការឱ្យដឹងពីមន្រ្តីជំនាញ​ នៃក្រសួងសុខាភិបាល៕ អត្ថបទ៖ ទូច សោភ័ណ