ភ្នំពេញ៖ ធុរជនប្រទេសចិន និងប្រទេសម៉ាឡេស៊ី មកពង្រឹងពាណិជ្ជកម្ម និងកិច្ចសហប្រតិបត្តិការវិនិយោគលើអាជីវកម្មផ្សេងៗ ជាមួយប្រទេសកម្ពុជាហើយភាគីកម្ពុជាក៏មានការគាំទ្រផ្នែកច្បាប់ ដើម្បីឲ្យធុរជនទាំងពីរប្រទេស កាន់តែមានទំនុកចិត្តលើការងារវិនិយោគនៅកម្ពុជា។
ក្នុងវេទិកាស្តីពីកាលានុវត្តភាពធុរកិច្ច និងការការពារកម្មសិទ្ធិបញ្ញានៅប្រទេសកម្ពុជា ក្នុងក្របខណ្ឌ នៃកិច្ចព្រមព្រៀងភាពជាដៃគូគ្រប់ជ្រុងជ្រោយ នៃសេដ្ឋកិច្ចតំបន់ (RCEP) កាលពីថ្ងៃទី៣០ ខែសីហា ឆ្នាំ២០២២ ឯកឧត្តម ចឺយ វិចិត្ត ឯកអគ្គរដ្ឋទូតកម្ពុជាប្រចាំនៅម៉ាឡេស៊ី បានមានប្រសាសន៍ថា ក្នុងបរិបទនៃកិច្ចព្រមព្រៀង RCEP កិច្ចព្រមព្រៀងពាណិជ្ជកម្មកម្ពុជា-ចិន និងកិច្ចព្រមព្រៀងពាណិជ្ជកម្មកម្ពុជា-កូរ៉េ នេះជាឱកាសដែលស្ថានទូតខ្មែរ នៅម៉ាឡេស៊ី រៀបចំវេទិកានេះ ដើម្បីផ្សព្វផ្សាយ ជួយពង្រឹងទំនាក់ទំនង ធ្វើយ៉ាងណាឲ្យមានការវិនិយោគ ការពង្រឹងពង្រីកកិច្ចសហប្រការពាណិជ្ជកម្មបន្ថែមទៀត រវាងកម្ពុជា និងម៉ាឡេស៊ី រួមទាំងការចូលរួមពីប្រទេសចិនផងដែរ។
ឯកឧត្តមបានបន្តថា សម្រាប់វិនិយោគិនម៉ាឡេស៊ី មកចូលរួមក្នុងវេទិកា មានផ្នែកអចលនទ្រព្យ ម្ហូបអាហារ ឡូជីស្ទិក អប់រំ អាយធី រួមទាំងវិស័យជាច្រើនទៀត សរុបចំនួនជាង ៤០ក្រុមហ៊ុន។
លោកជំទាវ សេង វួចហ៊ុន ប្រធានក្រុមមេធាវី អាស៊ីកម្ពុជា និងជាប្រធានសមាគមកម្មសិទ្ធិបញ្ញាកម្ពុជា លើកឡើងថា ដើម្បីឲ្យមានការជឿជាក់ពីវិនិយោគិនទាំងពីរប្រទេស យើងក៏មានការចុះកិច្ចព្រមព្រៀងជាមួយគ្នា ពាក់ព័ន្ធនឹងការការពាផ្នែកច្បាប់ ហើយពួកគេក៏បានគិតថា កម្ពុជាមានការការពារគ្រប់គ្រាន់។
លោក ដាតូ វ៉ាំងសង់ឈូ អនុប្រធានសមាគមចែកចាយផលិតផលម៉ាឡេស៊ី លើកឡើងថា វិនិយោគិនម៉ាឡេស៊ី មានការកក់ក្ដៅ ក្នុងការមកវិនិយោគនៅកម្ពុជា និងចាត់ទុកប្រទេសកម្ពុជា ដូចប្រទេសខ្លួន និងមានការជឿជាក់កាន់តែខ្លាំង ។
ឯកឧត្ដម ញឹម ខេមរា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ទោះបីស្ថិតក្នុងស្ថានភាពជំងឺកូវីដ-១៩ក្តី ពាណិជ្ជកម្មទ្វេរភាគីរវាងប្រទេសកម្ពុជា-ម៉ាឡេស៊ី មានចំនួន ៥០០លានដុល្លារ នៅឆ្នាំ២០២១ គឺកើនចំនួន ១៣ភាគរយ បើធៀបនឹងឆ្នាំ២០២០ ហើយកត់សំគាល់ថា ប្រទេសម៉ាឡេស៊ី នាំចូលអង្ករកម្ពុជា ច្រើនជាងគេក្នុងចំណោមប្រទេសក្នុងតំបន់៕ អត្ថបទ បាន សុខរិទ្ធិ,
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
