ប៉ោយប៉ែត៖ លោកឧត្តមសេនីយ៍ត្រី អ៊ី ចំរើន ​បានឱ្យដឹងថា ចាប់ពីព្រឹកថ្ងៃទី១កញ្ញា ២០២២នេះតទៅ ពលរដ្ឋកម្ពុជាជាពិសេសអាជីវករខ្មែរ​លក់ដូរ​នៅផ្សាររោងគ្លឿង អាច​ប្រើមធ្យោបាយម៉ូតូ ឬរថយន្ត​ ចេញចូលតាមច្រកអន្តរជាតិប៉ោយប៉ែត បានជាធម្មតា ដូចកាលពីមុនបិទច្រក ដោយសារកូវីដ១៩។

លោកឧត្តមសេនីយ៍ត្រី អ៊ី ចំរើន មេប៉ុស្តិ៍នគរបាលច្រកទ្វារអន្តរជាតិប៉ោយប៉ែត បានបន្ដទៀតថា ការជូនដំណឹងរបស់ភាគីថៃ នៃប៉ុស្តិ៍ច្រកទ្វារព្រំដែនខ្លងលឹក ស្រុកអារញ ខេត្តស្រះកែវ លើការ​អនុញ្ញាត​ឱ្យម៉ូតូ និងរថយន្តខាងកម្ពុជា​ឆ្លងកាត់ច្រក​ទ្វារ​ប៉ោយប៉ែត ធ្វើឡើង​ដោយយោង​តាមការ​ស្នើសុំ​ពី​ខាងភាគី​កម្ពុជា​ ក្នុងនាម​លោកជាមេប៉ុស្តិ៍នគរបាល​ច្រកទ្វារអន្តរជាតិ​ប៉ោយប៉ែត បាន​ជួប​ពិភាក្សាពង្រឹងកិច្ចសហការល្អជាមួយមេប៉ុស្តិ៍ខាងភាគីថៃ ​ស្នើសុំ​ឱ្យ​ខាងថៃធ្វើកាតជូនពលរដ្ឋ​ក្រុងប៉ោយប៉ែត បានប្រើប្រាស់ឆ្លងដែន​ចូលទៅផ្សាររោងក្លឿ​ចេញ​ព្រឹក​ចូលវិញ​ល្ងាចដូចកាលពីមុន​កូវីដ១៩ និង​អនុញ្ញាត​ឱ្យ​ម៉ូតូ ឬរថយន្តរបស់អាជីវករខ្មែរ​ចេញ​ចូលធម្មតា​ដូចមុនដែរ។

ការ​ស្នើទាំងពីរ​លើករបស់​លោកឧត្តមសេនីយ៍ត្រី អ៊ី ចំរើន​ រហូតមកដល់ពេលនេះ​ភាគីថៃ​អនុញ្ញាត​ឱ្យ​តែរថយន្ត និងម៉ូតូចេញចូលបាន​ឡើងវិញ​ដូចជម្រាបជូនខាងលើ​។ ​ចំពោះការស្នើឱ្យខាងថៃ​អនុញ្ញាត​ចេញ​កាត​ជូនពលរដ្ឋក្រុងប៉ោយប៉ែត​ចេញចូល​ព្រឹកវិលល្ងាច​ដូចដើម​នៅមិនទាន់​បាន​នៅខាងភាគីថៃអនុញ្ញាតនោះទេ ហើយរឿងកាតនោះ ​លោក​នឹង​បន្ត​ជួប​ជាមួយ​ខាង​ភាគីថៃ​ធ្វើ​យ៉ាង​ណា​ឱ្យ​បានឆាប់​នៅ​ពេលខាង​មុខ​បន្តទៀត ៕

អត្ថបទ៖ សាវី