ភ្នំពេញ៖ ក្រសួងទេសចរណ៍ បានបើកកិច្ចប្រជុំអន្តរក្រសួង នៅថ្ងៃទី៣១ ខែសីហា លើការរៀបចំ​សេចក្តី​ព្រាងគោលនយោបាយស្តីពី​ ទេសចរណ៍ពិសិដ្ឋ​ ឆ្នាំ២០២២ ​ឆ្នាំ២០៣២ ដើម្បី​ទាក់ទាញ​ភ្ញៀវទេសចរ​អន្តរជាតិមានចំណូលខ្ពស់​មកទស្សនា និងស្នាក់នៅកម្ពុជាបានយូរ និង​ឈានទៅរកបង្កើតការវិនិយោគទុននៅកម្ពុជាថែមទៀត។

ឯកឧត្តម ទិត ចន្ថា រដ្ឋលេខាធិការប្រចាំការក្រសួងទេសចរណ៍ ​បានថ្លែងថា ​កន្លងមកក្រសួង បាន​បើកការពិភាក្សាស្នើសុំយោបល់ច្រើនលើកច្រើនសារជាមួយបណ្តាស្ថាប័ន​ក្រសួងពាក់ អង្គការ​សង្គមស៊ីវិល ​និងវិស័យឯកជននានាទៀត ដើម្បីធានាប្រសិទ្ធភាពអនុវត្ត​គោលនយោបាយនេះ​មាន​ភាពទាក់ទាញទេសចរអន្តរជាតិពិសេសៗ ដូចជា ភ្ញៀវទេសចរអន្តរជាតិលំដាប់សេដ្ឋី ភ្ញៀវមាន​ចំណូលខ្ពស់​ និង​ទេសចរវ័យចាស់​អាចមកទស្សនា និងស្នាក់នៅកម្ពុជាបានយូរឆ្នាំ ដើម្បីធ្វើការ​បណ្តាក់ទុន​វិនិយោគលើវិស័យនានានៅកម្ពុជា។

ឯកឧត្តម ថោង ខុន បន្តថា ការរៀបចំគោលនយោបាយទេសចរណ៍ពិសិដ្ឋ​ បានធ្វើឡើង ដោយ​សារកម្ពុជា ​មានតំបន់ទេសចរណ៍​ដែលមានសក្តានុពល​ជាច្រើនកន្លែង និងអាចប្រកួតប្រជែង​ជាមួយ​បណ្តាប្រទេសដទៃបាន។

តំបន់ទេសចរណ៍​ពិសិដ្ឋ​ដែល​មាន​សក្តានុពល​ទាំងនោះ៖ គឺមានភ្ញៀវទេសចរអន្តរជាតិលំដាប់សេដ្ឋីៗ និង​ភ្ញៀវអន្តរជាតិមានចំណូលខ្ពស់ជាច្រើន ​មានតម្រូវការជួលដី ​ជួលផ្ទះ និងជួលអចលទ្រព្យនានា​ដើម្បី​ស្នាក់​នៅយូរធ្វើការវិនិយោគទុនបើកអាជីវកម្មនានានៅកម្ពុជា ។

ឯកឧត្តម ថោង ខុន បន្តថា ​ការដាក់ចេញនូវគោលនយោបាយស្តីពីទេសចរណ៍ពិសិដ្ឋ ២០២២-២០៣២ នឹងក្លាយជាចលករដ៏មានឥទ្ធិពល​ រួមចំណែកជំរុញកំណើនសេដ្ឋកិច្ច ​ការអភិវឌ្ឍសង្គម ការទាក់ទាញប្រភេទទេសចរ​គុណភាពស្របតាម​និន្នាការ​ថ្មី ​ទម្លាប់​ថ្មី​នៃ​ទេសចរណ៍។

សូមបញ្ជាក់ថា​ រាជរដ្ឋាភិបាល​អនុញ្ញាត​ឲ្យបង្កើតលើទំហំដី ១០០ហិកតា​ឡើងទៅ ត្រូវមាន​ព្រំប្រទល់​ទីតាំងច្បាស់លាស់​ និង​សម្បទា​សេវាកម្មទេសចរណ៍នានា ​ដូចជា​ សេវាស្នាក់នៅទេសចរណ៍ និវេសនដ្ឋាន​ទេសចរណ៍ ​សេវាម្ហូបអាហារ​ និងភេសជ្ជៈ មណ្ឌលកម្សាន្ត​ទេសចរណ៍ មណ្ឌល​សម្រាកលំហែកាយ ថែទាំសុខភាព ​កីឡាទេសចរណ៍​មណ្ឌលពាណិជ្ជកម្ម និង​មណ្ឌល​សេវាពាក់ព័ន្ធនានាទៀត ​ដែល​ម្ចាស់គ្រប់គ្រងត្រឹមត្រូវ៕

អត្ថបទ ស៊ុម សុខជា