សៀមរាប៖ មនុស្ស៦នាក់ បានចេញមកសារភាពថា ពួកគេពិតជាបានធ្វើចលនាកៀរគរមនុស្សទៅ​ប្រមូលផ្តុំគ្នា នៅខេត្តសៀមរាបដោយខុសច្បាប់ ​តាមការអំពាវនាវរបស់លោក ខឹម វាសនា ប្រធាន​គណបក្សសម្ព័ន្ធ ដើម្បីប្រជាធិបតេយ្យ។ ជាមួយការសារភាពនេះ​ ជនទាំង៦នាក់នេះ បានសន្យារំសាយការជួបជុំ ។

ក្នុងកិច្ចសន្យាជាមួយសមត្ថកិច្ច ដែលបានធ្វើនៅថ្ងៃទី៣១ ខែសីហានេះ បុរសចំនួន៦រូប បាន បញ្ជាក់ថា ពួកគេបានកៀរគរមនុស្សឱ្យទៅប្រមូលផ្តុំដោយពុំមានច្បាប់អនុញ្ញាត ​ចាប់តាំងពីថ្ងៃទី២៣ រហូត ដល់ថ្ងៃទី៣០ ខែសីហានេះ នៅក្នុងចម្ការមួយ ​នៅក្នុងស្រុកបន្ទាយស្រី ​ខេត្តសៀមរាប។

ក្នុងកិច្ចសន្យា​ ពួកគេបានប្រកាសនឹងបញ្ឈប់ការសាងសង់ជម្រក ​និងរោងខុសច្បាប់ផ្សេងៗ នៅទីនោះ​ទៀតហើយ។ ចំណែកជម្រក​ និងរោង ដែលបានសង់រួចហើយ ក៏នឹងត្រូវរុះរើចេញផងដែរ ។

បុរសទាំង៦រូបនេះ បានសន្យាថា ពួកគេនឹងប្រកាសឱ្យប្រជាពលរដ្ឋរំសាយការជួបជុំ ក្នុងករណី មានបុគ្គលណាមួយជំទាស់មិនព្រមចាកចេញ ​គឺសូមឱ្យអាជ្ញាធរចាត់ការទៅតាមច្បាប់។ ​ពួកគេ បានសន្យា​ នឹងប្រកាសផ្សព្វផ្សាយឱ្យប្រជាពលរដ្ឋដែលស្នាក់នៅខុសច្បាប់​ ក្នុងដីចម្ការទាំងពីរទីតាំង ចាកចេញត្រឡប់ ទៅផ្ទះវិញរៀងៗខ្លួន​ ក្នុងរយៈពេល៥ថ្ងៃ គិតចាប់ពីថ្ងៃទី០១ ខែកញ្ញា នេះ។ ក្នុងករណីជនណាមិនព្រម អនុវត្តតាមការសំណូមពរ ​និងកាលបរិច្ឆេទដូចបានកំណត់ គឺសូម​ឱ្យអាជ្ញាធរមានសមត្ថកិច្ចជួយអន្តរាគមន៍ ឬមានចំណាត់ការផ្លូវច្បាប់។

ជនទាំង៦រូបនេះ ក៏បានស្នើឱ្យសមត្ថកិច្ចចាត់ការទៅតាមច្បាប់ ចំពោះការបង្កបទល្មើសណា​មួយ​នៅ​ក្នុងដីចម្ការនេះ។

កាលពីថ្ងៃទី៣១ ខែសីហា ម្សិលមិញ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានផ្តល់​ឱកាស​ដល់មេ​ចលនា ប្រមូលផ្តុំមនុស្សនៅខេត្តសៀមរាប ដោយមិនប្រើកងកម្លាំងទៅ​បំបែកការ​ជួបជុំ ឬវិធានការច្បាប់អ្វីនោះឡើយ ដោយគ្រាន់តែស្នើឱ្យពួកគេរំសាយការជួបជុំ និងត្រឡប់​ទៅផ្ទះវិញរៀងៗខ្លួន ព្រមទាំងបានបញ្ជាឱ្យ ​អាជ្ញាធរខេត្តសៀមរាប រៀបចំដឹកជញ្ជូនពួក​គេទៅ​ផ្ទះវិញផងដែរ។ បើតាមការឱ្យដឹងពីអភិបាលខេត្តសៀមរាប គឺមកដល់ពេលនេះ ពួកអ្នកដែល​បានប្រមូលផ្ដុំគ្នានោះ បានចាកចេញបណ្ដើរៗហើយ៕ អត្ថបទ៖ យន់ វ៉ាន់