ភ្នំពេញ៖ ក្រសួងយុត្តិធម៌នៅថ្ងៃទី០៥ ខែមេសានេះ បញ្ចប់ដំណើរការចាក់វ៉ាក់សាំងSinovac ដូសទី១ ជូនមន្ត្រីក្រសួងយុត្តិធម៌ ខណៈក្រសួងអប់រំ យុវជន និងកីឡា បន្តដំណើរកាចាក់វ៉ាក់សាំង។
មានប្រសាសន៍ប្រាប់BTV ក្នុងដំណើរការចាក់វ៉ាក់សាំងSinovac នាថ្ងៃទី០៥ ខែមេសានេះ លោកជំទាវចាន់ សុទ្ធាវី រដ្ឋលេខាធិការក្រសួងយុត្តិធម៌ និងជាប្រធានអនុគណៈកម្មការចំពោះកិច្ចការចាក់វ៉ាក់សាំងក្នុងក្របខណ្ឌក្រសួងយុត្តិធម៌ បានឱ្យដឹងថា ដំណើរការចាក់វ៉ាក់សាំងបង្ការជំងឺកូវីដ-19 នៅក្រសួងយុត្តិធម៌គឺចាប់ផ្តើមពីថ្ងៃទី០១ រហូតដល់ថ្ងៃទី០៥ ខែមេសា ឆ្នាំ២០២១ ដែលមានមន្ត្រីបំរើការងារនៅក្រសួងប្រមាណជាង១ពាន់នាក់ ទទួលបានការចាក់វ៉ាក់សាំងពីក្រុមគ្រូពេទ្យ។ក្រៅពីនេះ លោកជំទាវបានបង្ហាញពីលទ្ធផលក្នុងយុទ្ធនាការចាក់វ៉ាក់សាំងនៅក្រសួងយុត្តិធម៌ផងដែរ។
ពាក់ព័ន្ធនឹងយុទ្ធនាការចាក់វ៉ាក់សាំងនេះដែរ ទីតាំងសាលាបឋមសិក្សាកូលាបទី១ នៅបន្តចាក់វ៉ាក់សាំងជូនដល់គ្រូបង្រៀនដែលមានឈ្មោះជាង២ពាន់នាក់ មកពីសាលារដ្ឋ និងឯកជន។នេះបើតាមប្រសាសន៍ឯកឧត្តម ប្រាក់ កុសល ប្រធាននាយកដ្ឋានអប់រំកុមារតូច នៃក្រសួងអប់រំ និងជាប្រធានក្រុមងារចាក់វ៉ាក់សាំងសាលាបឋមសិក្សកូលាបទី១។
ឯកឧត្តមថា តាមផែនការវ៉ាក់សាំងនៅទីតាំងនេះ នឹងបញ្ចាប់នៅថ្ងៃទី០៨ខែមេសាខាងមុខនេះ។
គួរបញ្ជាក់ដែរថា យុទ្ធនាការចាក់វ៉ាក់សាំងSinovac ជូនដល់មន្ត្រីរាជរដ្ឋាភិបាលនៅតាមស្ថាប័នផ្សេងៗ និងវិស័យឯកជនមួយចំនួនទៀត ចាប់ផ្តើមឡើង បន្ទាប់ពីរាជរដ្ឋាភិបាលកម្ពុជា បានបញ្ជាទិញវ៉ាក់សាំងនេះ ពីប្រទេសចិន១លាន៥សែនដូស ហើយដឹកមកដល់ប្រទេសកម្ពុជា នៅថ្ងៃទី២៦ ខែមីនា ឆ្នាំ២០២១។តាមគម្រោង រាជរដ្ឋាភិបាលកម្ពុជា នឹងចាក់វ៉ាក់សាំងបង្ការជំងឺកូវីដ-19 ជូនដល់ប្រជាពលរដ្ឋឱ្យបានរហូតដល់ជាង១០លាននាក់ ដើម្បីទប់ស្កាត់ការរីករាលដាលជំងឺកូវីដ១៩ ប្រកបដោយប្រសិទ្ធភាព និងស្តារសេដ្ឋកិច្ចឡើងវិញ ដែលរងផលប៉ះពាល់ដោយសារជំងឺកូវីដ-19៕ អត្ថបទ៖ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
