​ម៉ាឡេស៊ី៖ កាលពី​ថ្ងៃ​ព្រហស្បតិ៍​តុលាការ​ម៉ាឡេស៊ី​បាន​កាត់ទោស​លោកស្រី Rosmah Mansor ដែល​ជា​ភរិយា​របស់​អតីត​នាយករដ្ឋមន្ត្រី​លោក ​Najib Razak ឲ្យ​ជាប់ពន្ធនាគារ​រយៈពេល ​១០​ឆ្នាំ​ពីបទ​ស្វែង​រក និង​ទទួល​សំណូក ជា​ថ្នូរ​សម្រាប់​ទទួល​បាន​កិច្ច​សន្យា​ពី​រដ្ឋាភិបាល ប៉ុន្មាន​ថ្ងៃ​បន្ទាប់ពី​ស្វាមី​របស់​លោក​ស្រី​ត្រូវ​បាន​ជាប់​ពន្ធនាគារ​ពី​បទ​ប្រព្រឹត្ត​អំពើពុករលួយ​។

​ប្ដី​ប្រពន្ធ​ទាំង​២ បាន​ក្លាយ​ជា​គោលដៅ​នៃ​ការស៊ើបអង្កេត​ជាច្រើន​ករណី ​ពាក់ព័ន្ធ​អំពើពុករលួយចាប់​តាំងពី​ការ​ចាញ់​ឆ្នោត​គួរ​ឲ្យ​ភ្ញាក់ផ្អើល​របស់​លោក Najib ក្នុង​ឆ្នាំ២០១៨​ នៅ​ពេល​ដែល​កំហឹង​របស់​ក្រុម​ម្ចាស់​ឆ្នោត​ ជុំវិញ​រឿងអាស្រូវ​អំពើពុករលួយ​រាប់ពាន់​លាន​ដុល្លារ​អាមេរិក​ បាន​បញ្ចប់​ការ​កាន់​អំណាច​រយៈពេល​ ៩​ឆ្នាំ​របស់​លោក​។ ក្រុមព្រះ​រាជ​អាជ្ញា​បាន​អះអាង​ថា លោកស្រី​បាន​ស្វែងរក​ការ​ទទួល​សំណូក​ប្រាក់​ចំនួន ១៨៧.៥​លាន​រីង​ហ្គី​ត (ringgit) ស្មើនឹង ៤១​.៨​លាន​ដុល្លារ​អាមេរិក ប៉ុន្តែ​លោក​ស្រី​បាន​ច្រានចោល​ពី​ការ​ប្រព្រឹត្ត​ខុស​នេះ​ដោយ​និយាយ​ថា លោកស្រី​មិន​ពេញ​ចិត្តនឹង​អ្វី​ដែល​បាន​កើតឡើង​នៅ​ថ្ងៃ​នេះ​ទេ​។ គ្មាន​នរណា​ម្នាក់​ឃើញ​ខ្ញុំ​យក​ប្រាក់​នោះ​ទេ គ្មាន​នរណា​ម្នាក់​ឃើញ​ខ្ញុំ​រាប់​ប្រាក់​នោះ​ទេ​។

​ចៅក្រម​តុលាការ​កំពូល Kuala Lumpur លោក Mohamed Zaini Mazlan បាន​និយាយ​ថា លោកស្រី Rosmah ក៏​នឹង​ត្រូវ​បង់​ប្រាក់​ផាក​ពិន័យ​ចំនួន ៩៧០លាន​រីង​ហ្គី​ត​ស្មើនឹង ២១៦.៤៥​លាន​ដុល្លារ​អាមេរិកដែល​ជា​ចំនួន​ច្រើន​បំផុត​ក្នុង​ប្រវត្តិសាស្ត្រ​របស់​ម៉ាឡេស៊ី ពាក់ព័ន្ធ​បទចោទប្រកាន់​ទទួល​សំណូក​ចំនួន​៣​។ ​អំឡុង​ការស្រាវជ្រាវ​ឆ្នាំ២០១៨​ នគរបាល​បាន​រឹបអូស​កាបូប​ដៃ​ប្រណីត​ជាង ​៥០០ និង​គ្រឿងអលង្ការ ១២.០០០​ប្រភេទ​ដែលមាន​តម្លៃ​ ២៧០​លាន​ដុល្លារ​អាមេរិក​ពី​លោកស្រី Mansor ដែល​បាន​ប្រឈម​ការរិះគន់​ជា​យូរ​មក​ហើយ ​ចំពោះ​ជីវិត​ស៊ីវិល័យ​របស់​លោក​ស្រី។ លោកស្រី​នឹង​នៅ​តែ​មាន​សេរីភាព​នៅ​ក្រៅ​ឃុំ ដោយ​រង់ចាំ​ការ​ប្តឹង​ឧទ្ធរណ៍​ទៅ​តុលាការ​ជាន់ខ្ពស់៕

អត្ថបទ៖ សុខមាន