ភ្នំពេញ៖ គ្រួសារក្បែរភាពក្រីក្រ បានក្លាយជាក្រុមគោលដៅថ្មី ដែលនឹងទទួលបានការជួយពីរាជ​រដ្ឋា​ភិបាល​កម្ពុជា។ ​ជាគោលដៅ ​គឺរាជរដ្ឋាភិបាលកម្ពុជា គ្រោង​បញ្ចេញ​កញ្ចប់ថវិកាជួយដល់គ្រួសារ​ក្បែរភាព​ក្រីក្រនៅចុងឆ្នាំ ២០២២នេះ។ នេះជាការលើកឡើងរបស់ ឯកឧត្តម សំហេង បុរស ជាប្រធានក្រុមប្រឹក្សាភិបាល នៃមូលនិធិជាតិជំនួយសង្គម និងជារដ្ឋលេខាធិការក្រសួងសង្គមកិច្ច។

ឯកឧត្តម សំហេង បុរស បានបន្ដថា បច្ចុប្បន្នក្រុមការងារអន្តរក្រសួងកំពុងពន្លឿនការងារ ដើម្បី​កំណត់អត្តសញ្ញាណគ្រួសារគោលដៅដែលនឹងទទួលអត្ថប្រយោជន៍នេះ។ ជាក់ស្ដែង គឺនឹង​មានការបណ្ដុះបណ្ដាលមន្រ្តី ដើម្បីឱ្យស្វែងយល់ពីកម្មវិធីនេះ ដើម្បីឈានទៅការសម្ភាសន៍ កំណត់គ្រួសារគោលដៅតែម្ដង។

ឯកឧត្តម ប្រធានក្រុមប្រឹក្សាភិបាលបន្តថា ជាការប៉ាន់ស្មាន គឺគ្រួសារក្បែរភាពក្រីក្រ ដែលអាចទទួលបានថវិកាពីរាជរដ្ឋាភិបាល គឺស្ថិតក្នុងរង្វង់ ៣០ ម៉ឺន ទៅ ៦០ ម៉ឺនគ្រួសារ។ ការកំណត់អត្តសញ្ញាណគ្រួសារគោលដៅនេះ​ គឺនឹងធ្វើឡើងដោយមានលក្ខខណ្ឌច្បាស់លាស់។

ចំពោះកម្មវិធីឧបត្ថម្ភសាច់ប្រាក់ដែលនឹងជួយដល់គ្រួសារក្បែរភាពក្រីក្រ គឺមានភាពខុសគ្នា ពីការឧបត្ថម្ភសាច់ប្រាក់ជូនគ្រួសារក្រីក្រដែលបាននឹងកំពុងអនុវត្តតាំងពីឆ្នាំ២០២០។ ភាពខុសគ្នា ព្រោះការជួយដល់គ្រួសារក្បែរភាពក្រីក្រ គឺមិនអនុវត្តរៀងរាល់ខែនោះទេ និងមានការគ្រោងអនុវត្តត្រឹមរយៈពេលមួយឆ្នាំ។

បច្ចុប្បន្នរាជរដ្ឋាភិបាលកម្ពុជា បាននឹងកំពុងឧបត្ថម្ភសាច់ប្រាក់ជូនគ្រួសារក្រីក្រ ដែលមាន​បណ្ណសមធម៌​ជារៀងរាល់ខែ តាំងពីខែ មិថុនា ឆ្នាំ ២០២០មកម្លេះ។ ​ចាប់តាំងពីខែ មិថុនា ឆ្នាំ ២០២០ រហូតដល់ខែ សីហា ឆ្នាំ២០២២ គឺរាជរដ្ឋាភិបាលកម្ពុជា បានចំណាយថវិកាអស់ជាង ៧៧៥ លានដុល្លារ៕ អត្ថបទ៖ គឹមហុក