ភ្នំពេញ៖ ជាថ្មីម្តងទៀតតំណាងអង្គការសុខភាពពិភពលោកប្រចាំកម្ពុជា បានបញ្ជាក់ថា ការចាក់វ៉ាក់សាំង នៅតែមានសារសំខាន់ ខណៈជំងឺកូវីដ-១៩ នៅតែបន្តឆ្លងរីករាលដាលជាសកល។

ក្នុងកិច្ចសម្ភាសន៍ជាមួយ BTV នៅពេលថ្មីៗនេះលោកជំទាវវេជ្ជបណ្ឌិត លី អាយ លែន តំណាង​អង្គការសុខភាពពិភពលោក បានបញ្ជាក់ថា បច្ចុប្បន្ន ការឆ្លងជំងឺកូវីដ-១៩ ជាសកល មិន ទាន់ចប់​នៅឡើយនោះទេ គឺមានករណីឆ្លងកើនឡើងជារៀងរាល់ថ្ងៃ​ ហើយការចាក់វ៉ាក់សាំងកូវីដ-១៩ នៅតែជាយុទ្ធសាស្រ្តមួយដ៏មានសារសំខាន់ ដើម្បីគ្រប់គ្រងការឆ្លងរីករាលដាលជំងឺនេះ និង​ធានានិរន្តរភាព ការបើកដំណើរការសេដ្ឋកិច្ច ​និងសង្គមឡើងវិញ។

លោកជំទាវ បានបញ្ជាក់ថា រាល់វ៉ាក់សាំងទាំងអស់ ​ដែលបានចុះបញ្ជីប្រើប្រាស់ជាបន្ទាន់ជាមួយ អង្គការ​សុខភាពពិភពលោក ​គឺនៅតែមានប្រសិទ្ធភាពសម្រាប់​ការពារអាយុជីវិត កាត់បន្ថយភាព​ឈឺ​ធ្ងន់ធ្ងរ និងអាត្រាមរណភាព។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល ​និងជាប្រធានគណៈកម្មការ ចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស ​បានបញ្ជាក់បន្ថែមថា អ្នក​ចាក់វ៉ាក់សាំងកូវីដ-១៩រួចហើយ ​នៅតែឆ្លងជំងឺ ​ប៉ុន្តែអ្នកចាក់វ៉ាក់សាំងរួច មាន​អង់ទីគ័រ​ទប់ទល់​នឹង​ការវាយលុក របស់ជំងឺកូវីដ-១៩ កាត់បន្ថយការសម្រាកព្យាលបាលនៅមន្ទីរពេទ្យ និងអត្រាមរណភាព។

លោកជំទាវ បានរម្លឹកដល់ពលរដ្ឋ ដែលដល់វេនត្រូវចាក់វ៉ាក់សាំងដូសជំរុញ ​ត្រូវរួសរាន់ទៅទទួល ការចាក់វ៉ាក់សាំងគ្រប់ៗគ្នា​ ដើម្បីធានានិរន្តរភាពការបើកដំណើរការសេដ្ឋកិច្ច និងសង្គមតាម​បែប​គន្លងថ្មី​ ជាមួយវត្តមានជំងឺកូវីដ។

ក្រោមការដឹកនាំប្រកបដោយគគិបណ្ឌិតរបស់សម្តេចតេជោ ហ៊ុន សែន ​នាយករដ្ឋ មន្រ្តីកម្ពុជា បាន សម្រេច​ចាប់ផ្តើមយុទ្ធនាការចាក់វ៉ាក់សាំងកូវីដ-១៩ ជូនប្រជាពលរដ្ឋជាគោលដៅអាទិភាព និង​ជនបរទេស ដែលកំពុងស្នាក់នៅបម្រើការងារ ​និងធ្វើធុរកិច្ចនៅកម្ពុជា ​ចាប់ពីថ្ងៃទី១០ ខែកុម្ភៈ ឆ្នាំ២០២១​ ដោយអនុវត្ត តាមយុទ្ធសាស្រ្តផ្ការីក ​ដែលចាប់ផ្តើមចេញពីរាជធានីភ្នំពេញ​ ខេត្តកណ្តាល ខេត្តព្រះសីហនុ ​ខេត្តកោះកុង រួចបន្តពេញផ្ទៃប្រទេស រហូតសព្វថ្ងៃ ធ្វើឲ្យប្រទេស​កម្ពុជា​ដំណើរការសេដ្ឋកិច្ច សង្គមធម្មតា៕អត្ថបទ៖ ទូច សោភ័ណ