កណ្ដាល៖ អាជ្ញាធរក្រុងតាខ្មៅ បានប្រកាសហាមពលរដ្ឋសង់លំនៅដ្ឋានខុសច្បាប់ ជាប់មាត់​ស្ទឹងព្រែកត្នោត ក្នុងក្រុងតាខ្មៅ ខេត្តកណ្តាល ខណៈ លំនៅដ្ឋានពលរដ្ឋបានសង់ខុសច្បាប់​តាំងពី​យូរមកហើយនោះ​ កំពុងរងការបាក់ស្រុតជាបន្តបន្ទាប់ ហើយអាចឈានទៅដល់ការ​ប៉ះពាល់​អាយុជីវិតទៀតផង។

បើតាមលោក ឃឹម សំភារៈ អភិបាលក្រុងតាខ្មៅបានឲ្យBTVដឹងថា រៀងរាល់ឆ្នាំជំនន់​ទឹកស្ទឹងព្រែក​ត្នោត បានបង្កការប៉ះពាល់លំនៅដ្ឋានដែលសង់ជាប់មាត់ស្ទឹង​នេះ មានចំនួន ៤សង្កាត់រួមមាន សង្កាត់តាខ្មៅ សង្កាត់ដើមមៀន សង្កាត់ព្រែកឬស្សី និងសង្កាត់តាក្តុល ហើយកន្លងមក​រដ្ឋបាលខេត្ត​កណ្តាល​ បានរៀបចំគម្រោង ​ផែនការច្រើន ​ដើម្បីជួយដល់បណ្តាពលរដ្ឋដែលរងការ​ប៉ះពាល់​ផ្ទះបាក់​ស្រុតចូលស្ទឹងព្រែកនេះ។

តាមការបញ្ជាក់បន្ថែមពី លោក ឆេង ឆៃ ចៅសង្កាត់ព្រែកឬស្សី ក្រុងតាខ្មៅ ​ថ្លែងថា ជាទូទៅគ្រប់​ពលរដ្ឋ​ដែលសាងសង់លំនៅដ្ឋាន​នៅជាប់មាត់ស្ទឹង មាត់ព្រែកនានា គឺជាសំណង់ខុសច្បាប់ ប៉ុន្តែ​សម្រាប់​ពលរដ្ឋដែលមានលំនៅដ្ឋាន​សង់ជាប់មាត់ស្ទឹងព្រែកតោ្នត​បច្ចុប្បន្ននេះ ភាគច្រើន​ជា​លំនៅដ្ឋាន​សង់តកូនតចៅរស់នៅតគ្នាតាំងពីក្រោយឆ្នាំ ១៩៧៩មកម៉្លេះ ហើយរហូតមក​ដល់​ពេលនេះ​គឺយើងមិនអនុញ្ញាតឲ្យគ្រួសារទាំងនោះសង់​បន្ត ​និងធ្វើការលក់ទិញដោះដូរនោះទេ។

ពលរដ្ឋដែលមានលំនៅដ្ឋានរងការបាក់ស្រុក ​បានថ្លែងថា បច្ចុប្បន្នពួកគាត់មានការ​ព្រួយបារម្ភខ្លាំង​ចំពោះការបាក់ស្រុតដីនៅតាមដងស្ទឹងព្រែកត្នោត នៅរៀងរាល់រដូវទឹកដំឡើង ហើយពួកគាត់ក៏មិន​អាចទៅណាបាន ដោយសារដីផ្ទះនៅជាប់មាត់ស្ទឹង​មិនត្រូវបានអនុញ្ញាត​ឲ្យទិញលក់​ដោះដូរនោះទេ។

តាមមន្ត្រីក្រុងតាខ្មៅ បានឲ្យដឹងថា រហូតមកដល់ពេលនេះ មានលំនៅដ្ឋានគ្រួសារពលរដ្ឋប្រមាណ​ជិត ៦០គ្រួសារ ​បាននឹងកំពុងរងបាក់ស្រុត រលំផ្ទះ ​ហើយមានខ្លះក៏បានចាកចេញពីលំនៅដ្ឋាន​នៅ ទៅ​រកជួលផ្ទះថ្មីស្នាក់នៅ ​ខ្លះបន្តការស្នាក់នៅ ​ខណៈលំនៅដ្ឋាន​នោះកំពុងរងបាក់ប្រេះ៕ អត្ថបទស៊ុម សុខជា