បាត់ដំបង៖ អាជ្ញាធរខេត្តបាត់ដំបង កំពុងស្ដារប្រឡាយអូរតាគី ដើម្បីជាប្រយោជន៍ក្នុងការនាំទឹកពីប្រភពខាងលើ មកជួយស្រោចស្រពដំណាំកសិកម្ម និងប្រើប្រាស់ប្រចាំថ្ងៃរបស់ពលរដ្ឋ ហើយជាផ្នែកមួយក្នុងការទាក់ទាញភ្ញៀវទេសចរណ៍ មកលេងកម្សាន្តកាន់តែច្រើន ខណៈស្ពានអូរតាគីនេះ កំពុងមានការអភិវឌ្ឍ រួមទាំងល្បីល្បាញតាមរយៈបទចម្រៀង របស់អធិរាជសំឡេងមាស ស៊ីន ស៊ីសាមុត ផងដែរនោះ។
លោក ជា សម្បត្តិ អភិបាលស្រុកថ្មគោល លើកឡើងថា ក្នុងការឆ្លើយតបសំណូមពររបស់ពលរដ្ឋ និងបន្ទាប់ពីចុះសិក្សាភូមិសាស្ត្រ អាជ្ញាធរស្រុក បានស្នើសុំគោលការណ៍ពីរដ្ឋបាលខេត្ត និងមន្ទីរជំនាញ ដើម្បីស្តារនូវប្រឡាយអូរតាគី ដែលជាតម្រូវការចាំបាច់ចំពោះមុខរបស់ពលរដ្ឋរស់នៅតំបន់ជុំវិញនេះ ក្នុងការធានានូវការរក្សា និងស្ទាក់ស្តុកទឹកទុកសម្រាប់ប្រើប្រាស់ ហើយវាក៏នឹងបញ្ចៀសបានពីការជន់លិច ពីជំនន់ទឹកភ្លៀងនៅក្នុងរដូវវស្សាបានមួយកម្រិត។ លោកបន្តថា ប្រឡាយអូរតាគី មានទីតាំងស្ថិតនៅក្នុងឃុំអូរតាគី ជាប់នឹងផ្លូវជាតិលេខ៥ ទល់និងអាងម៉ាឈិត ស្ថិតក្នុងឃុំជ្រៃ ក្នុងស្រុកថ្មគោលដូចគ្នា មានប្រវែងចំនួន ២ ៧០០ម៉ែត្រ តែជំហានដំបូង ស្ដារត្រឹមជាង ៥៣០ម៉ែត្រសិន។ លោកបញ្ជាក់ថា បន្ទាប់ពីស្ដារហើយនឹងអាចរក្សានូវធារទឹក ក្នុងប្រឡាយបានច្រើន ដើម្បីធានាដល់ការប្រើប្រាស់ទាំងក្នុងរដូវវស្សា និងរដូវប្រាំង ហើយថែមទាំងជួយរំដោះទឹក ដែលធ្លាប់តែជន់លិចបំផ្លាញផលដំណាំស្រូវកន្លងមក និងបញ្ចៀសការហូរចេញតាមប្រឡាយអូរតាគីនេះ ចុះទៅតំបន់វាលទំនាបទន្លេសាប បានទាន់ពេលវេលា។
ក្នុងឱកាសចុះពិនិត្យការស្ដារប្រឡាយនេះ ឯកឧត្តម ងួន រតនៈ អភិបាលខេត្តបាត់ដំបង មានប្រសាសន៍ថា ប្រឡាយអូរតាគីជាប្រវត្តិសាស្ត្រ សម្រាប់អ្នកស្រុកថ្មគោល ដែលយូរឆ្នាំកន្លងមកពុំដែលបានស្តារ ដោយនៅពេលខែវស្សាទឹកលិចបែកវាល តែរដូវប្រាំងវិញទឹកស្រកដល់បាតប្រឡាយ។ ឯកឧត្ដមបាន សង្កត់ធ្ងន់ថា ក្រោយពីការស្តាររួចរាល់វានឹងប្រែក្លាយជាអាងស្តុកទឹកមួយដ៏ធំ ដើម្បីតម្កល់ទឹកទុកជូនប្រជាកសិករប្រើប្រាស់ និងក្នុងការបង្កបង្កើនផល ហើយក៏ជាប្រឡាយមេរំដោះទឹក នៅពេលមានជំនន់ទឹកភ្លៀងផងដែរ។ ឯកឧត្ដមបញ្ជាក់បន្ថែមថា មួយផ្នែកទៀតក៏ជួយទប់ស្កាត់ពីការរំលោភបំពានពីជនខិលខូច ដែលចង់យកដីប្រឡាយធ្វើជាកម្មសិទ្ធិ ហើយក៏អាចក្លាយជាតំបន់កសិទេសចរណ៍ធម្មជាតិដ៏ទាក់ទាញ និងមានសក្ដានុពលទៅថ្ងៃអនាគតផងដែរ៕ អត្ថបទ៖ បាន សុខរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
