បាល់ទាត់៖ សមាគមកីឡាបាល់ទាត់កងយោធពលខេមភូមិន្ទ (ទ័ព) បានបញ្ចប់បេសកកម្មលើទឹកដីអង្គរមុនគេ ក្នុងការប្រកួតក្របខណ្ឌលីគកំពូលកម្ពុជាឆ្នាំ២០២១ បន្ទាប់ពីឆ្លងកាត់ ២ប្រកួតជាមួយក្រុមមានមូលដ្ឋាននៅសៀមរាប ដោយលទ្ធផលឈ្នះ១ និងចាញ់១ ពោលគឺពួកគេរកបាន ៣ពិន្ទុប៉ុណ្ណោះពីជ័យជម្នះ ៣-០ លើក្រុមសូលទីឡូអង្គរកាលពីល្ងាចថ្ងៃទី៥ ខែមេសា ខណៈ ១ប្រកួតទៀតក្រុមចំណាត់ថ្នាក់លេខ៤ ឆ្នាំចាស់នេះបានប្រកួតចាញ់ក្រុមម្ចាស់ផ្ទះអង្គរថាយហ្គឺរ ៣-២ កាលពីសប្ដាហ៍មុន។
សម្រាប់ជំនួបសប្ដាហ៍ទី៥ នៅកីឡដ្ឋាន SRU នេះ ក្រុមកងយោធពលខេមភូមិន្ទបានព្យាយាម ដាក់សម្ពាធខ្លាំងលើក្រុមសូលទីឡូអង្គរដោយលេងបាន ៤នាទី កីឡាករ Yuta Kikuchi បានស៊ុតបំប៉ោងសំណាញ់ទីក្រុមម្ចាស់ផ្ទះ ១គ្រាប់ មុនកីឡាករ Romario បន្ថែមដគ្រាប់ទី២ ឲ្យក្រុមលោក ហោ សុខហេង នៅនាទី៣១។ ចូលវគ្គទី២ ការប្រកួតកាន់តែតានតឹង បន្ទាប់ពីក្រុមសូលទីឡូអង្គរព្យាយាមវាយបកវិញ តែពួកគេមិនអាចបំបែកពងមាន់ក្រុមភ្ញៀវបានឡើយ ផ្ទុយទៅវិញកីឡាករ Dzarma Bata បានបន្ថែម ១គ្រាប់ទៀតឲ្យក្រុមកងយោធពលខេមភូមិន្ទ នៅនាទី៩០+៣ មុនអាជ្ញាកណ្ដាលផ្លុំកញ្ចែបញ្ចប់ការប្រកួត។ តាមរយៈជ័យជម្នះនេះ បានធ្វើឲ្យក្រុមកងយោធពលខេមភូមិន្ទឡើងឈរលេខរៀងទី២ បណ្ដោះអាសន្នដោយមាន ៧ពិន្ទុស្មើគ្នាជាមួយក្រុមកំពូលតារាងអង្គរថាយហ្គឺរ បន្ទាប់ពីឆ្លងកាត់ ៤ប្រកួតឈ្នះ២ ស្មើ១ និងចាញ់១។
ប៉ុន្តែក្រុមកងយោធពលខេមភូមិន្ទ បានអស់ការប្រកួតលើទឹកដីខេត្តសៀមរាប សម្រាប់លីគកំពូលកម្ពុជាហើយ ដោយរង់ចាំបើកទ្វារផ្ទះស្វាគមន៍ក្រុមអង្គរថាយហ្គឺរ និងក្រុមសូលទីឡូអង្គរវិញម្ដងនៅជើងទី២ បន្ទាប់ពីកីឡដ្ឋានស្ដាតចាស់ធ្វើការកែលម្អ និងជួសជុលរួចរាល់។ រីឯក្រុមសូលទីឡូអង្គរវិញមកទល់ពេលនេះ ពួកគេមិនទាន់មានពិន្ទុរាប់ឡើយក្រោយចាញ់ ២ប្រកួតផ្ទួនៗនាដើមរដូវកាលថ្មីនេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
