ក្រិក៖ ជំរំជនភៀសខ្លួនដ៏ធំបំផុតរបស់អឺរ៉ុបគឺម៉ូរីយ៉ា ត្រូវបានបំផ្លិចបំផ្លាញដោយសារអគ្គិភ័យដ៏ធំមួយ ដែលបានឆាបឆេះកាលពីព្រឹកថ្ងៃពុធ នៅទីតាំងដែលមានមនុស្សកកកុញនៅលើកោះឡេបបូស របស់ប្រទេសក្រិក។ ក្រុមអាជ្ញាធរក្រិកជឿជាក់ថា អគ្គិភ័យត្រូវបានបង្កឲ្យឆេះដោយអ្នករស់នៅក្នុងជំរំម៉ូរីយ៉ា ដែលបង្ហាញពីការមិនពេញចិត្តចំពោះវិធានការបិទដែលទាក់ទងនឹងវីរុសកូរ៉ូណា។
ជំរំនេះបានស្ថិតនៅក្រោមវិធានការបិទ បន្ទាប់ពីមនុស្ស ៣៥នាក់បានធ្វើតេស្តវិជ្ជមានជំងឺ Covid-19 កាលពីដើមសប្ដាហ៍នេះ។ ជំរំជនភៀសខ្លួននេះមានមនុស្សរស់នៅប្រមាណ ១៣.០០០នាក់ដែលច្រើនជាង ៦ដងនៃសមត្ថភាពអតិបរមារបស់មនុស្ស ដែលតម្រូវឲ្យស្នាក់នៅបានត្រឹមតែ ២២០០នាក់។ យោងតាមទីភ្នាក់ងារជនភៀសខ្លួន របស់អង្គការសហប្រជាជាតិបានឱ្យដឹងថា កុមារជាង ៤.០០០នាក់ក្នុងនោះមានទាំងអនីតិជន ៤០៧នាក់ដែលពុំមានសាច់ញាតិរស់នៅជាមួយក្នុងជំរំនេះ។ នៅក្នុងសេចក្ដីថ្លែងការណ៍តាមទូរទស្សន៍មួយ នាយករដ្ឋមន្ត្រីក្រិកលោក Kyriakos Mitsotakis បានប្រកាសភាពអាសន្ននៅលើកោះនេះ ដោយថ្កោលទោសក្រុមកុបករដែលបានបង្កឲ្យឆេះ។ មិនមានរបាយការណ៍អំពីចំនួនអ្នករងរបួសទេ ប៉ុន្តែលោក George Moutafis អ្នកថតរូបបានប្រាប់ប៉ុស្តិ៍ទូរទស្សន៍ក្រិកមេហ្គាថា ជំរំនេះត្រូវបានភ្លើងឆេះ “បំផ្លាញទាំងស្រុង“៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
