បាល់ទាត់៖ ក្រុមការពារតំណែងជើងឯកបឹងកេត និងអតីតក្រុមជើងឯក ៦សម័យភ្នំពេញក្រោនបានបង្ហាញពីការត្រៀមខ្លួនរួចរាល់ ដើម្បីប្រយុទ្ធលើសមរភូមិវាលស្មៅក្នុងក្របខណ្ឌលីគកំពូលកម្ពុជាជើងទី១ នាម៉ោង ៣៖៣០នាទីរសៀលនេះនៅកីឡដ្ឋានខេមបូឌាអ៊ែរវ៉េ ដែលអ្នកគាំទ្រឲ្យឈ្មោះថា “ជំនួប Cambodia Classic Match” ខណៈគ្រូបង្វឹកក្រុមទាំងពីរបានបង្ហាញពីការស្រេកឃ្លានជ័យជម្នះរៀងៗខ្លួន។
លោក គឹម ភក្ដី គ្រូបង្វឹកក្រុមបឹងកេតបានបញ្ជាក់ថា ក្រុមខ្លួនបានត្រៀមជាស្រេចដើម្បីស្វាគមន៍ការប្រកួតដ៏ធំនេះ ហើយលោកនឹងធ្វើការផ្លាស់ប្ដូរកីឡាករមួយចំនួន អំឡុងការប្រកួតបើករដូវកាលថ្មីដែលប្រកួតចាញ់ក្រុមណាហ្គាវើលដ៏ ១-០ កាលពីដើមខែមីនាកន្លងទៅ ដើម្បីកែប្រែស្ថានភាពការប្រកួត និងបំពេញនូវចំណុចល្អត្រឡប់មកវិញ ក្នុងការប្រកួតដ៏សំខាន់ជាមួយក្រុមភ្នំពេញក្រោនថ្ងៃនេះ។ គ្រូបង្វឹកទើបជួយក្រុមនាគខៀវបឹងកេតឈ្នះពានលីគលើកទី៤ កាលពីឆ្នាំ២០២០ ដដែលបន្ដថា ក្នុងការប្រកួតដ៏ទាក់ទាញនេះ លោកមិនអាចកំណត់ភាគរយក្នុងការស្វែងរកជ័យជម្នះបានទេ តែលោកជឿជាក់លើការប្រកួតនេះ ដោយសង្ឃឹមយ៉ាងមុតមាំថា ក្រុមខ្លួននឹងធ្វើបានល្អជាមួយលទ្ធផលដ៏ល្អទៀតផង ដើម្បីផ្ដល់នូវភាពសប្បាយរីករាយជូនថ្នាក់ដឹកនាំក្លិប និងក្រុមអ្នកគាំទ្ររបស់ខ្លួន។ ដោយឡែកលោក Oleg Starynskyi គ្រូបង្វឹកក្រុមភ្នំពេញក្រោនវិញបានលើកឡើងថា នេះគឺជាការប្រកួតដ៏ធំមួយ ខណៈកីឡាករទាំងអស់ បានត្រៀមខ្លួនរួចរាល់ហើយសម្រាប់ការប្រកួតនេះ ដោយពួកគេនឹងព្យាយាមប្រកួតប្រជែងគ្នា ដើម្បីបានលេងក្នុងការប្រកួត។ លោកថា បឹងកេតគឺជាក្រុមល្អមួយក្នុងលីគកំពូលកម្ពុជា ព្រោះពួកគេទើបឈ្នះពានឆ្នាំមុន ប៉ុន្ដែភ្នំពេញក្រោនក៏ស្រេកឃ្លានជ័យជម្នះ និងពាននេះដូចគ្នា។
គួរដឹងថា ជំនួប Cambodia Classic Match នេះនឹងមានផ្សាយផ្ទាល់លើកញ្ចក់ទូរទស្សន៍ BTV ។ នេះគឺជាប្រកួតលើកទី២ របស់ក្រុមបឹងកេត បន្ទាប់ពីប្រកួតបើកឆាកចាញ់ណាហ្គាវើលដ៏ ១-០។ ចំណែកភ្នំពេញក្រោន នេះគឺជាប្រកួតទី៣ របស់ខ្លួន ខណៈ ២ប្រកួតដំបូងពួកគេធ្វើបានយ៉ាងល្អ ដោយយកឈ្នះក្រុមសូលទីឡូអង្គរ ៧-១ និងយកឈ្នះក្រុមគិរីវង់សុខសែនជ័យ ២-១ កាលពីពេលថ្មីៗកន្លងទៅ។ ក្រៅពីជំនួបដ៏កក្រើកនេះនៅរសៀលថ្ងៃទី៦ ខែមេសានេះក៏មានការប្រកួត ២គូផ្សេងទៀត នៅក្នុងក្របខណ្ឌលីគកំពូលកម្ពុជាសប្ដាហ៍ទី៥ នេះដែរ រួមមានក្រុមគិរីវង់សុខសែនជ័យ ត្រូវបើកទ្វារផ្ទះទទួលក្រុមក្មេងខ្ចីខេត្ដព្រៃវែង នៅកីឡដ្ឋានគិរីវង់សុខសែនជ័យ ខេត្តតាកែវ ខណៈក្រុមអគ្គិសនីកម្ពុជានឹងត្រូវជួបក្រុមភ្ញៀវណាហ្គាវើលដ៏ នៅកីឡដ្ឋានអគ្គិសនីកម្ពុជានាវេលាម៉ោង ៣៖៣០នាទីរសៀលដូចគ្នា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
