បាល់ទាត់៖ ការប្រកួតបាល់ទាត់ជម្រើសជើងឯកយុវជនអាយុក្រោម ១៥ឆ្នាំ និងអាយុក្រោម ១៨ឆ្នាំរដូវកាលឆ្នាំ២០២២ បានបញ្ចប់ហើយ ដោយក្រុមយុវជន U15 កងយោធពលខេមរភូមិន្ទ និងក្រុមយុវជន U18 វិសាខាបានគ្រងជើងឯករៀងៗខ្លួន បន្ទាប់ពីយកឈ្នះគូប្រកួតក្នុងវគ្គផ្ដាច់ព្រ័ត្រកាលពីល្ងាចថ្ងៃទី០៤ ខែកញ្ញា នៅមជ្ឈមណ្ឌល និងសាលាបាល់ទាត់ជាតិបាទី។
សម្រាប់ក្រុមយុវជន U18 វិសាខាគឺបានគ្រងជើងឯកពានរង្វាន់យុវជនអាយុក្រោម ១៨ឆ្នាំ បន្ទាប់ពីយកឈ្នះក្រុម U18 ភ្នំពេញក្រោនវិញក្នុងលទ្ធផល ៣-១។ ជំនួបវគ្គផ្ដាច់ព្រ័ត្រក្រោមតំណក់ទឹកភ្លៀងនេះ វគ្គទី១ វិសាខា បានបើកការនាំមុខ ១គ្រាប់ មុនបន្ថែម ២គ្រាប់ទៀតនៅដើមវគ្គទី២ គ្រាដែលយុវជនភ្នំពេញក្រោនវាយបកបានត្រឹម ១គ្រាប់ប៉ុណ្ណោះដែលធ្វើឲ្យក្រុមជើងឯកឆ្នាំ២០២០ ទទួលបានត្រឹមជើងឯករង ខណៈយុវជនវិសាខាបានគ្រងជើងឯកលើកដំបូង។ ដោយឡែកក្រុមយុវជន U15 កងយោធពលខេមរភូមិន្ទបានលើកពានរង្វាន់យុវជនអាយុក្រោម ១៥ឆ្នាំ បន្ទាប់ពីយកឈ្នះក្រុមយុវជនសាលាបាល់ទាត់តម្រង់ទិសខេត្តស្វាយរៀង ដោយការទាត់បាល់ប៉េណាល់ទីកាសេចក្ដី ក្នុងលទ្ធផល ៤-២ បន្ទាប់ពីប្រកួត ៩០នាទីស្មើគ្នា ១-១។
ពិធីបិទការប្រកួតនេះបានធ្វើឡើងក្រោមវត្តមានឯកឧត្តម ឡា ឡៃ តំណាងឯកឧត្តមនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា ហើយឯកឧត្តមបានវាយតម្លៃខ្ពស់ ចំពោះដំណើរការប្រកួតពានរង្វាន់យុវជនឆ្នាំនេះ ដែលដំណើរការប្រកួតដោយរលូន និងបញ្ចប់ដោយជោគជ័យ ពិសេសបានផ្ដល់ឱកាស និងចម្រាញ់បាននូវធនធានបន្ដវេនជាច្រើន ដើម្បីជំរុញការអភិវឌ្ឍវិស័យកីឡាបាល់ទាត់ជាតិឲ្យកាន់តែរីកចម្រើន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
