បាល់ទាត់៖ មជ្ឈមណ្ឌលអូស្ត្រាលីសម្រាប់ការបណ្ដុះបណ្ដាល ដែលហៅកាត់ថា ACE បានបន្ដឧបត្ថម្ភដល់ក្លិបព្រះខ័នរាជស្វាយរៀង ១រដូវកាលទៀតហើយ។ នេះបើតាមការជូនដំណឹងរបស់អតីតក្រុមជើងឯកពានរង្វាន់សម្ដេចតេជោ ហ៊ុន សែន ៤សម័យ កាលពីថ្ងៃទី៤ ខែមេសា ឆ្នាំ២០២១ ម្សិលមិញ។
តាមការបញ្ជាក់របស់មន្ត្រីក្លិបមានមូលដ្ឋាន នៅខេត្តស្វាយរៀងនេះបានឲ្យដឹងថា នេះគឺជាឆ្នាំទី៣ ដែលភាគីទាំងពីរបានព្រមព្រៀងលើភាពជាដៃគូឧបត្ថម្ភ ហើយតាមរយៈកិច្ចសហការនេះ មជ្ឈមណ្ឌលអូស្ត្រាលីសម្រាប់ការបណ្ដុះបណ្ដាល បានផ្ដល់នូវការអប់រំ និងការបណ្ដុះបណ្ដាលភាសាអង់គ្លេសដល់កីឡាករ បុគ្គលិក និងមន្ត្រីរបស់ក្លិបទៀតផង។ តាមរយៈការឧបត្ថម្ភនេះ តំណាងក្លិបជើងឯករងលីគឆ្នាំ២០២០ ដដែលបានចាត់ទុកជារឿងដ៏សំខាន់ ដែលរួមចំណែកក្នុងការអភិវឌ្ឍន៍វិស័យកីឡាបាល់ទាត់កម្ពុជាផង និងពង្រឹងវិស័យអប់រំ ពិសេសភាសាបរទេសដល់កីឡាករ និងបុគ្គលិករបស់ខ្លួនផង ដើម្បីក្លាយជាធនធានប្រកបដោយសក្ដានុពល សម្រាប់បម្រើឲ្យការងារកីឡា និងការងារប្រចាំថ្ងៃផ្សេងៗនាពេលបច្ចុប្បន្ន និងទៅថ្ងៃអនាគត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
