កំពង់ស្ពឺ៖ នៅថ្ងៃទី៥ ខែកញ្ញា ឆ្នាំ២០២២ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ បានអញ្ជើញ​ប្រគល់​រថយន្ត​សង្គ្រោះ​បន្ទាន់​ជា​អំណោយ​របស់​សម្តេចតេជោ ហ៊ុន សែន នាយករដ្ឋមន្រ្តី ដល់បញ្ជការដ្ឋានការពារកោះឆ្នេរ​កង​ទ័ព​ជើងទឹ​ក។​

រថយន្តសង្គ្រោះបន្ទាន់ទី៥១ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលប្រគល់​ដល់​បញ្ជាការដ្ឋាន​ការពារ​កោះឆ្នេរនាថ្ងៃនេះ តាមរយៈ លោកឧកញ៉ាបណ្ឌិត ជា រតនា និងឧកញ៉ា លី ហៀក រតនា ។

នាយឧត្តមសេនីយ៍ ឥត សារ៉ាត់ មានប្រសាសន៍ថា ជំនួសមុខឱ្យថ្នាក់ដឹកនាំក្រសួងការពារជាតិ អគ្គមេបញ្ជាការ នៃកងយោធពលខេមរភូមិន្ទ បានពាំនាំនូវបណ្ដាំផ្ញើសាកសួរសុខទុក្ខ និងក្តីនឹក​រលឹក​ប្រកបដោយមនោសញ្ចេតនាគោរព ស្រលាញ់ ដឹងគុណដ៏ជ្រាលជ្រៅ​ពីសំណាក់​សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះនាយនាវី នាយនាវីរង ពលទាហាន បញ្ជការដ្ឋានការពារកោះឆ្នេរ កងទ័ពជើងទឹក។

នាយឧត្តមសេនីយ៍ ក៏បានសំដែងនូវអំណរគុណយ៉ាងជ្រាលជ្រៅចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុន សែន ដែលជានិច្ចជាកាល តែងតែគិតគូរពីសុខទុក្ខ និងការលំបាករបស់កងកម្លាំងប្រដាប់អាវុធ និងប្រជាជនដោយបានឧបត្ថម្ភទាំងស្មារតី សម្ភារ​ថវិកា ដើម្បីជួយដល់ការលើកកម្ពស់ការគាំពារសុខមាលភាពកងទ័ព និងប្រជាជននៅ​ទូរទាំង​ប្រទេសឱ្យកាន់តែទទួលបានសេវាគាំពារសុខមាលភាពកាន់តែប្រសើរ។

លោកឧកញ៉ា បណ្ឌិត ជា រតនា បានលើកឡើងថា រថយន្តសង្គ្រោះនេះជាចំណែក​ជួយ​ដោះស្រាយ​តម្រូវការរបស់កងទ័ព ហើយក៏ជួយបម្រើកិច្ចការសង្គ្រោះប្រជាពលរដ្ឋទូទៅផងដែរ។ លោកបណ្ឌិត ជា រតនា បានអះអាងថា រថយន្តសង្គ្រោះនេះ ក៏ធ្លាប់បានប្រគល់​ជូនដល់បណ្តា​អង្គភាព​នានានៃកងយោធពលខេមរភូមិន្ទផងដែរ ហើយនឹង​មាន​គម្រោង​ប្រគល់​ជូន​បន្ត​បន្ទាប់​ទៀត។

លោកឧកញ៉ា បណ្ឌិត ជា រតនា បានចាត់ទុកការចូលរួមចំណែកជាមួយសម្តេចតេជោ និង​សម្តេច​កិត្តិ​ព្រឹទ្ធបណ្ឌិត ក្នុងការធ្វើសកម្មភាពមនុស្សធម៌នេះ គឺជាការ​បែង​ចែក​ផ្លែផ្កាពី​កា​រ​ធ្វើ​អាជីវកម្ម​របស់​ខ្លួន​ជួយដល់សង្គម។ លោក បានបង្ហាញការយក់ឃើញថា ការរីកចម្រើនក្នុងអាជីវកម្ម គឺបានមកពីសង្គម ដូច្នេះលោកត្រូវតែបែងចែកជាផ្លែផ្កានេះទៅសង្គមវិញ៕ អត្ថបទ៖ សេក ឧត្ដម​