កណ្ដាល៖ មជ្ឈមណ្ឌលជាតិព្យាបាល និងស្ដារនីតិសម្បទាអ្នកញៀនគ្រឿងញៀន ដែលមាន​ទីតាំង​នៅស្រុក កណ្ដាលស្ទឹង ខេត្តកណ្ដាល សម្រេចបានការសាងសង់ប្រមាណ ៩០ភាគរយ។ មជ្ឈមណ្ឌលជាតិថ្មីមួយនេះ គឺគ្រោងបើកដំណើរការទទួលជនរងគ្រោះដំណាក់កាល​ដំបូងនៅចុងឆ្នាំ ២០២២ រឺដើមឆ្នាំ២០២៣ ខាងមុខ។

ឯកឧត្តម វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា រួមទាំងវត្តមានអជ្ញាធរ​មូលដ្ឋាន នៅព្រឹកថ្ងៃទី៥ ខែកញ្ញានេះ ​បានដឹកនាំមន្រ្តីចុះមកពិនិត្យដំណើរការសាងសង់ មជ្ឈមណ្ឌល​ជាតិព្យាបាល​ និងស្ដារនីតិសម្បទាអ្នកញៀនគ្រឿងញៀន​ ដែលមានទីតាំងនៅ ស្រុកកណ្ដាលស្ទឹង ខេត្តកណ្ដាល។

លោក ស៊ុ ចំរើន ប្រធានមជ្ឈមណ្ឌលជាតិព្យាបាល និងស្ដារនីតិសម្បទាអ្នកញៀនគ្រឿងញៀន លើកឡើងថា ​មជ្ឈមណ្ឌលគ្រោងនឹងបើកទទួលជនរងគ្រោះ នៅចុងឆ្នាំ ២០២២នេះ រឺដើមឆ្នាំ ២០២៣ ខាងមុខ។

ជំហានដំបូងនេះ ​គឺនឹងផ្ទេរជនរងគ្រោះគ្រឿងញៀន ​ប្រមាណ ៣០០នាក់មកពីមណ្ឌលក្រាំងធ្នង់ នៅ​រាជធានីភ្នំពេញ​ រួចទើបឈានដល់ការពង្រីកវិសាលភាពរបស់ខ្លួន។​ មជ្ឈមណ្ឌលជាតិព្យាបាល និងស្ដារនីតិសម្បទាអ្នកញៀន​គ្រឿងញៀន​ថ្មីមួយនេះ ​អាចជួយសង្រ្គោះជនរងគ្រោះបានក្នុងរង្វង់ ៨០០ទៅ ១០០០នាក់។ ​នេះជាការបញ្ជាក់ថែមរបស់លោកប្រធានមណ្ឌល។

មជ្ឈមណ្ឌលជាតិព្យាបាល ​និងស្ដារនីតិសម្បទាអ្នកញៀនគ្រឿងញៀននេះ គឺផ្ដល់ទាំង​សេវាព្យាបាល ​និងផ្ដល់ទាំងការបង្រៀនជំនាញដល់ជនរងគ្រោះ ​កំឡុងពេលស្នាក់នៅ។ គោលដៅគឺដើម្បីប្រែក្លាយជនរងគ្រោះអោយជាជាបុគ្គលល្អ ភ្ជាប់ជាមួយជំនាញចិញ្ចឹមជីវិត ក្រោយព្យាបាលសះស្បើយ។

មជ្ឈមណ្ឌលជាតិព្យាបាល និងស្ដារនីតិសម្បទាអ្នកញៀនគ្រឿងញៀននេះ នឹងផ្ដល់សេវាព្យាបាល​ជូន​ជនរងគ្រោះដោយពុំគិតថ្លៃ ៕ អត្ថបទ៖ គឹម ហុក