សៀមរាប៖ ជាថ្មីម្តងទៀត អាណាព្យាបាលរស់នៅតាមបណ្តាខេត្តផ្សេងៗ នៅថ្ងៃទី៥ខែកញ្ញានេះ បានមកទីកន្លែង​ប្រមូល​ផ្ដុំដែលរៀបចំ​ដោយប្រធានគណបក្សសម្ព័ន្ធដើម្បីប្រជាធិបតេយ្យ ស្ថិតនៅស្រុកបន្ទាយស្រី ខេត្តសៀមរាប ក្នុងបំណងដង្ហោយហៅ​សាច់ញាតិ​ឲ្យចាកចេញពី​ជុំរុំ​លោក ខឹម វាសនា ត្រលប់ទៅស្រុកកំណើតវិញ។

ស្ត្រីជាម្តាយម្នាក់ទៀត មកពីខេត្តកំពង់ស្ពឺ នៅថ្ងៃទី០៥ខែកញ្ញានេះ ​បានទ្រហោយំនៅ​ទីកន្លែង​ប្រមូល​ផ្ដុំ រៀបចំដោយលោក​ ខឹម វាសានា ​ប្រធានគណបក្សសម្ព័ន្ធ​ដើម្បីប្រជាធិបតេយ្យ ព្រោះកូនស្រី​ជា​ទីស្រឡាញ់របស់ខ្លួន​ ត្រូវបានអន្ទងឱ្យចូលទៅរស់នៅក្នុងចម្ការលោក ខឹម វាសនា ក្នុងស្រុកបន្ទាយស្រី ខេត្តសៀមរាប​ មិនព្រមចេញមកជួបខ្លួននោះឡើយ។

ស្ត្រីនោះបានស្រែកយំ ​ដោយពោលពាក្យយ៉ាងដូច្នេះថា​ ឱកូនស្រីម្តាយ បានរៀនខ្ពង់ខ្ពស់​ល្អណាស់កូនស្រីម្តាយ​​។

នៅថ្ងៃទី០៥ ខែកញ្ញា នេះ ជាថ្ងៃកំណត់ដែលលោក ខឹម វាសនា ប្រធានគណបក្សសម្ព័ន្ធ​ដើម្បី​ប្រជាធិបតេយ្យ​សន្យារំសាយការជួបជុំរបស់ខ្លួននៅលើដីចម្ការក្នុងស្រុកបន្ទាយស្រី ​ខេត្តសៀមរាប។ ប៉ុន្តែបើមិនរំសាយទេនោះ អាជ្ញាធរ នឹងចាត់វិធានការទៅតាមអ្វីដែលបានសន្យា។នេះបើតាមប្រសាសន៍លោកទៀ សីហា អភិបាលខេត្តសៀមរាប។

លោក បន្តថា មកដល់ព្រលប់ថ្ងៃទី០៤ ខែកញ្ញានេះ ប្រជាពលរដ្ឋដែលបានទៅប្រមូលផ្តុំនៅ​ចម្ការ​របស់លោក ខឹម វាសនា នៅសល់តែជាង ១ពាន់នាក់ទៀតប៉ុណ្ណោះ ក្រៅពីនោះបាន​រំសាយអស់ហើយ។ សម្រាប់ពាក្យបណ្តឹងទទួល​បានពី​សាច់ញាតិ​ទទួល​បានប្រមាណជាង ៧០ពាក្យបណ្តឹង។

កាលពីថ្ងៃទី២៣ ខែសីហា កន្លងទៅថ្មីនេះ​ មានចលនាបំផុសបំផុលមនុស្សឱ្យទៅស្នាក់នៅជុំគ្នានៅ​ដីចម្ការរបស់លោក ខឹម វាសនា ក្នុងស្រុកបន្ទាយស្រី ​ខេត្តសៀមរាប ក្រោមការសាបព្រោះពាក្យ​ចចាម​អារាម​មាន​គ្រោះរញ្ជួញដី ​និងទឹកលិចលង់ពិភពលោកជាដើម។

ប្រជាពលរដ្ឋ​មានជំនឿលើការ​ឃោសនា​គ្រប់រាជធានីខេត្ត រួមទាំង​ពលករ​បម្រើ​ការក្រៅប្រទេស​រួមមាន៖ កូរ៉េខាងត្បូង ជប៉ុន និងថៃផង ​បានចាកចេញពីលំនៅឋាន ​ចាកចេញពីកន្លែងការងារ សម្រុក​ទៅរស់នៅក្នុងចម្ការ ដែល​គេ​ឃោសនាថាជាទីតាំងតែមួយគត់គេចផុតពីគ្រោះ​មហន្តរាយ​ពិភពលោក។យ៉ាងណាក៏​ដោយគិតមកដល់ពេល​ គេមិនទាន់ឃើញមានការគ្រោះរញ្ជួញដី និង​ទឹកលិចលង់ពិភពលោកនោះទេ៕ អត្ថបទ៖ទូច សោភ័ណ