ភ្នំពេញ៖ លោក ហ៊ុន ម៉ាណែត ប្រធានគណៈកម្មាធិការអាហារូបករណ៍សិស្ស-និស្សិតក្រីក្រ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅថ្ងៃទី៥ ខែកញ្ញា ឆ្នាំ២០២២នេះ បានអញ្ជើញចូលរួមជាអធិបតីក្នុងពិធីប្រគល់សញ្ញាបត្រជូន​និស្សិតជ័យលាភី ជាច្រើននាក់នៅសាកលវិទ្យាល័យឥន្ទ្រវិជ្ជា។

ថ្លែងនៅក្នុងពិធីប្រគល់សញ្ញាបត្រនោះលោកបណ្ឌិត ហ៊ុន ម៉ាណែត បានចូលរួមអបអរសាទរចំពោះសមិទ្ធផល ដែលនិស្សិតជ័យលាភីទាំងអស់ទទួលបានក្នុងថ្ងៃនេះ និងក៏ជាមោទនភាពមួយដ៏ធំធេងសម្រាប់ខ្លួនឯង និងក្រុមគ្រួសារ​ ក៏ដូចជាសង្គមជាតិទាំងមូល ដោយពីមួយថ្ងៃទៅមួយថ្ងៃ ប្រទេសជាតិយើង​ កាន់តែមានធនធានមនុស្សប្រកបដោយសក្តានុពល​បន្តកើនឡើង។

ជាមួយគ្នានោះដែរលោក ហ៊ុន ម៉ាណែត ក៏សូមថ្លែងអំណរគុណចំពោះក្រសួងអប់រំ យុវជន និងកីឡា ដែលបានកែសម្រួលស្ថានការណ៍ និងដាក់ទិសដៅបន្ទាន់ ​ដោយរៀបចំឱ្យមានការបង្រៀនតាម​អនឡាញ ​និងសូមអរគុណផងដែរចំពោះសាស្ត្រាចារ្យ លោកគ្រូ អ្នកគ្រូ សិស្ស និស្សិត ព្រមទាំង​ក្រុមគ្រួសារ ដែលបានចូលរួមសម្របសម្រួលបត់បែនតាមកាលៈទេសៈនេះ។

ក្នុងន័យនេះ ស្ថានភាពនៃវិបត្តិកូវីដ-១៩ ពិតជាបានពន្លឿននូវការចាប់យកបច្ចេកវិទ្យា ដើម្បីបង្កើន​ប្រសិទ្ធភាពការងារ និងការរៀនសូត្រ ​ដែលជានិន្នាការសាកល។ យ៉ាងណាក៏ដោយ ទាំងបច្ចុប្បន្ន និងតទៅអនាគត រាជរដ្ឋាភិបាលក៏នៅបន្តកសាងសាលារៀន និងអភិវឌ្ឍន៍​ហេដ្ឋារចនាសម្ព័ន្ធនានា ដើម្បីជំរុញ ​និងរក្សាសន្ទុះនៃការសិក្សាដោយផ្ទាល់នៅក្នុងសាលា ​ដែលនៅតែជាការងារសំខាន់​ជា​អាទិភាព ពីព្រោះការអប់រំត្រូវមានលក្ខណៈមូលជុំគ្រប់ជ្រុងទាំងអស់តាមរយៈសកម្មភាព ទំនាក់ទំនង និងការគិតពិចារណា ​ទើបអាចធានាបាននូវប្រសិទ្ធភាពជាក់ស្តែងទាន់ពេលវេលា។

លោកបណ្ឌិត បានបន្តទៀតថា សមិទ្ធផលធំបំផុតរបស់ប្រទេសជាតិ ដែលកើតឡើងក្រោយ​ឆ្នាំ១៩៧៩ ដោយផ្អែកលើការផ្តល់អាទិភាពលើការអនុវត្តគោលនយោបាយ និងចក្ខុវិស័យលើ​វិស័យ​អប់រំតាំងពីជំនាន់នោះមក ​គឺការទទួលបាននូវធនធានមនុស្សដែលមានសមត្ថភាព ​លទ្ធភាព គុណធម៌​ និងសីលធម៌ ដែលបានចូលរួមក្នុងការដឹកនាំ គ្រប់គ្រង កសាង និងអភិវឌ្ឍន៍​ប្រទេស​ដោយ​ឯករាជ្យម្ចាស់ការលើគ្រប់វិស័យ ​ទាំងផ្នែករដ្ឋ វិស័យឯកជន ​និងអង្គការសង្គមស៊ីវិលជាដើម។ នេះ គឺជាមោទនភាព ហើយដែលយើងត្រូវរួមគ្នាបន្តពង្រឹងទៅមុខទៀត ដើម្បីនិរន្តរភាពនៃការ​អភិវឌ្ឍជាតិ។​ ធនធានមនុស្សម្នាក់ គឺជាសសរមួយដើមដែលទ្រទ្រង់ប្រទេសជាតិ ជាពិសេសសរ​ជំនាន់ថ្មីៗដែលទទួលបានឱកាសពេញលេញក្នុងការសិក្សារៀនសូត្រ គឺត្រូវខិតខំកសាង​ពង្រឹង​ខ្លួនឱ្យបានរឹងមាំ ​ដើម្បីទ្រទ្រង់ និងទទួលបន្ទុកភារកិច្ចបន្តកសាងប្រទេស ដែលចេះតែរីកចម្រើនធំធាត់។

លោកបណ្ឌិត ហ៊ុន ម៉ាណែត បានបន្ថែមទៀតថា ការអប់រំបណ្តុះបណ្តាលធនធានមនុស្ស មិនត្រឹម​តែចូលរួមពង្រឹងឯករាជ្យម្ចាស់ការរបស់ប្រទេសជាតិប៉ុណ្ណោះទេ ប៉ុន្តែក៏ដើរតួនាទីសំខាន់ក្នុង​ការ​ជំរុញភាពប្រកួតប្រជែងដែលកាន់តែ​ស្វិតស្វាញ​ក្នុង​ចរន្តសាកលភាវូបនីយកម្ម​ក្នុងពេល​បច្ចុប្បន្ន​នេះផងដែរ។ គម្លាតខួរក្បាល ​ខុសពីគម្លាតផ្នែកហេដ្ឋារចនាសម្ព័ន្ធ។ យើងត្រូវប្រើពេលវេលាខ្លះដើម្បីកាត់បន្ថយគម្លាតហេដ្ឋារចនាសម្ព័ន្ធ ប៉ុន្តែចំពោះគម្លាតខួរក្បាល គឺអាចត្រូវបានដោះស្រាយបានលឿនជាង ​ប្រសិនបើយើងមានឱកាសអប់រំសិក្សារៀនសូត្រ និងការ​បង្កលក្ខណៈ ជាពិសេសក្នុងដំណាក់កាលសុខសន្តិភាពដូចពេលបច្ចុប្បន្ន ពីព្រោះថា​មនុស្ស​មាន​សមត្ថភាពខួរក្បាលដូចគ្នា ដើម្បីអភិវឌ្ឍន៍​ខ្លួនទៅមុខ ដោយមិនបែងចែងរវាងជាតិ​សាសន៍ និង​ប្រទេសតូចធំនោះឡើយ៕អត្ថបទ៖ បាន ចក់