ភ្នំពេញ៖ ថ្ងៃទី០៥ ខែកញ្ញានេះ នៅទីស្នាក់ការអាជ្ញាធរមីន ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានដឹកនាំកិច្ចប្រជុំស្តីពីវឌ្ឍនភាពនៃការអនុវត្តគម្រោងសម្តេចតេជោ​សម្រាប់សកម្មភាពមីន “ផ្តល់ដីសុវត្ថិភាព បង្កើតស្នាមញញឹម” និងការអនុវត្តផែនការបន្ត។

ក្នុងកិច្ចប្រជុំនោះឯកឧត្តមទេសរដ្ឋមន្រ្តី មានប្រសាសន៍ថា ​តបតាមការអំពាវនាវរបស់សម្តេចតេជោ​នាយករដ្ឋមន្រ្តី កាលពីថ្ងៃទី០១ ខែកក្កដា ឆ្នាំ២០២២ ក្នុងទិវាមច្ឆជាតិ នៅអាងទឹកត្រពាំងថ្ម ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ វិស័យឯកជន ក៏ជាប្រជាពលរដ្ឋខ្មែរយ៉ាងច្រើន បានសម្រេចចូលរួមវិភាគទានជាមួយរាជរដ្ឋាភិបាល ដើម្បីដោះស្រាយបញ្ហាគ្រាប់មីននៅកម្ពុជា ឆ្ពោះទៅរកកម្ពុជាគ្មានមីនឆ្នាំ២០២៥ ហើយសម្តេចតេជោ បានប្រគល់ភារកិច្ចជូនដល់អាជ្ញាធរមីន ក្នុងការដឹកនាំ គ្រប់គ្រង និងសម្របសម្រួលដោយផ្ទាល់ សម្រាប់ការអនុវត្តគម្រោង​សម្តេចតេជោ​សម្រាប់​សកម្មភាពមីន “ផ្តល់ដីសុវត្ថិភាព បង្កើតស្នាមញញឹម”។

ឯកឧត្តម បានបន្តទៀតថា អាជ្ញាធរមីន បានដឹកនាំកិច្ចប្រជុំជាបន្តបន្ទាប់ជាមួយប្រតិបត្តិករជាតិ រួមមាន៖ បញ្ជាការដ្ឋានកងទ័ពជើងគោក, មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្រ្គាម, និងមជ្ឈមណ្ឌលសកម្មភាពកំចាត់មីនកម្ពុជា ដើម្បី​រៀបចំ​ផែនការបោសសម្អាតមីនជាអាទិភាព និងធ្វើការវិភាជន៍កម្លាំងបោសសម្អាតមីន​របស់​ប្រតិបត្តិករ​ឲ្យបានទាន់ពេលវេលា ស្របតាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោ​នាយករដ្ឋមន្រ្តី។

ជាមួយគ្នានេះ អាជ្ញាធរមីន ក៏បានបញ្ជូនក្រុមការងារបច្ចេកទេសរបស់អាជ្ញាធរមីន ​ដើម្បីធ្វើការសិក្សា និងវាយតម្លៃស្ថានភាពចម្ការមីនជាក់ស្តែង ដោយសហការជាមួយអាជ្ញាធរថ្នាក់ក្រោមជាតិ ដើម្បីកាត់​បន្ថយនូវរយៈពេលនៃការបោសសម្អាត ​និងការចំណាយផ្សេងៗគ្រាំទ្រដល់ការងារ​បោស​សម្អាតមីន។

ឯកឧត្តមទេសរដ្ឋមន្រ្តី បានបញ្ជាក់បន្ថែមថា រហូតដល់ពេលនេះ មានខេត្តចំនួន ៦ និងឃុំចំនួន ០៧ បានទទួលផលប្រយោជន៍ពីគម្រោងសម្តេចតេជោដំណាក់កាលទី១ រួមមាន ខេត្តត្បូងឃ្មុំ ខេត្តកំពង់ចាម ខេត្តតាកែវ ខេត្តកំពង់ឆ្នាំង ខេត្តកំពត និងខេត្តស្វាយរៀង និងឃុំចំនួន ០៧ ស្ថិតក្នុងស្រុកភ្នំស្រួច ខេត្តកំពង់ស្ពឺ ដោយធ្វើការបោសសម្អាតក្នុងទំហំផ្ទៃដីសរុបចំនួន ៤២.៥១៣.៧២៩ ម៉ែត្រក្រឡា (៤២,៥១ គីឡូម៉ែត្រក្រឡា) ស្មើនឹង ៥២០ចម្ការមីន ដោយប្រើប្រាស់ថវិកាជាង៥,៧ លានដុល្លារ។

ក្នុងឱកាសនោះ ឯកឧត្តមទេសរដ្ឋមន្រ្តី បានវាយតម្លៃខ្ពស់ចំពោះក្រុមការងារបច្ចេកទេស​របស់​អាជ្ញាធរមីន និងប្រតិបត្តិជាតិទាំងបី ​ដែលបានបំពេញការងារយ៉ាងសកម្មភាព និងផ្តល់កិច្ច​សហកា​រគ្នា​ទៅវិញទៅមកយ៉ាងល្អប្រសើរ ​ក្នុងគោលដៅរួម គឺពន្លឿនការបញ្ចប់វត្តមានគ្រាប់មីនដែលយើង​បានដឹងឲ្យអស់ពីទឹកដីកម្ពុជា​ ក្នុងឆ្នាំ២០២៥ ស្របតាមទស្សនវិស័យ និងគោលបំណង​របស់​សម្តេចតេជោ​នាយករដ្ឋមន្រ្តី៕