កំពង់ស្ពឺ​ ៖ ប្រជាសហគមន៍នៅភូមិតាំងបំពង់ ឃុំតាសាល ស្រុកឱរ៉ាល់ ខេត្តកំពង់ស្ពឺ ដែលធ្លាប់​តែមមាញឹក​ក្នុងការជូនភ្ញៀវ​ទេសចរចូលព្រៃ និងឡើងភ្នំ ដើម្បីគយគន់ទេសភាពធម្មជាតិ ពេលនេះពួកគាត់ភាគ​ច្រើនបាន​ងាកមកប្រមូលផល រុក្ខជាតិព្រៃម្យ៉ាងដែលពួកគាត់ហៅថា «ផ្កាថ្ម»ព្រោះវាអាចលក់បានតម្លៃថ្លៃ ក្នុង១គីឡូក្រាម ចន្លោះពី ៤០-៥០ ម៉ឺនរៀលឯណោះ។

មានតម្លៃថ្លៃ ដោយសារវាជាប្រភេទរុក្ខជាតិឱសថ ដែលអាចព្យាបាលជំងឺទឹកនោមផ្អែម នេះបើតាមការ​ប្រាប់ឱ្យ​ដឹងពីប្រជាសហគមន៍។ ការលក់ចេញរុក្ខជាតិប្រភេទនេះ គឺមានឈ្មួញកណ្ដាល​ចាំទទួល​ទិញពីភូមិ​ដើម្បីយក​ទៅលក់បន្ត ឬជួលកាលពួកគាត់មានអ្នករស់នៅភ្នំពេញទាក់ទងទិញយកទៅ ហើយពេលខ្លះ​ភ្ញៀវទេសចរ​ដែលមកទស្សនាតំបន់ខ្នងផ្សារក៏ទិញយកទៅដែរ។ ប្រជាសហគមន៍បានប្រាប់ទៀតថា រុក្ខជាតិ «ផ្កាថ្ម» នេះក៏ត្រូវបាននាំចេញទៅប្រទេសចិនផងដែរ។

ខណៈកំពុងធ្វើដំណើរចុះពីលើភ្នំវិញ យុវជនមួយក្រុមមានស្ពាយប៉ាវ ឬការ៉ុង ដែលផ្ទុកទៅដោយរុក្ខជាតិផ្កាថ្ម បានប្រាប់អ្នកសារព័ត៌មានរបស់ទូរទស្សន៍ BTV ដែលចុះទៅដល់តំបន់នោះយ៉ាងដូច្នេះថាថា ជារុក្ខជាតិដ៏កម្រមួយប្រភេទដែលមានដុះតែនៅលើភ្នំ និងក្នុងព្រៃដ៏ជ្រៅតែប៉ុណ្ណោះ។ ក្នុងការដើររកបេះរុក្ខជាតិ «ផ្កាថ្ម» នេះ ពុំមែនជារឿងងាយស្រួលឡើយ។ ពួកគាត់មានគ្នាប្រមាណ១០នាក់ ត្រូវចំណាយពេលរាប់​ម៉ោងដើរឡើងលើភ្នំ និងចូលទៅក្នុងព្រៃដ៏ជ្រៅដើម្បីដកហូតយករុក្ខជាតិនេះ ហើយនៅពេលចូលព្រៃម្ដងៗ ត្រូវចំណាយពេល ពី១៥-២០ ថ្ងៃ ទើបចុះពីភ្នំពេញ។ ពួកគេបញ្ជាក់ថា ក្នុងដំណើរចេញទៅប្រមូមផលម្ដង អាចរកបានចន្លោះពី ៤-៥ គីឡូតែប៉ុណ្ណោះ។

ដ្បិតមានតម្លៃថ្លៃ ប៉ុន្តែរុក្ខជាតិកម្រនេះ មិនអាចយកមកដាំដុះបានទេ​ ប្រជាសហគមន៍ដែលរស់នៅ​តំបន់នោះបាន​ប្រាប់ថា ពួកគាត់ក៏ធ្លាប់សាកល្បងដាំដែរ ប៉ុន្តែដាំមិនរស់នោះទេ។ ពេញមួយឆ្នាំការប្រមូលផលរុក្ខជាតិ «ផ្កាថ្ម» ត្រូវបានធ្វើឡើង លើកលែងតែអំឡុងខែ វិច្ឆិកា ឬនាចុងឆ្នាំ អ្នកភូមិមិនទៅរកបេះ «ផ្កាថ្ម» នេះទេ ដោយសារជា​ពេលដែលរុក្ខជាតិប្រភេទនេះលូតលាស់ និងជាឱកាសឱ្យវាដុះសារជាថ្មី។

អស់រយៈកាល៣ឆ្នាំមកហើយ ដែលរុក្ខជាតិ «ផ្កាថ្ម» បានក្លាយជាឆ្នាំងបាយជួយចិញ្ចឹមជីវភាពប្រជាសហគមន៍។ បើទោះបីជាពេលនេះពួកគាត់កំពុងផ្អែមមាត់ និងញាប់ដៃដើរប្រមូលបេះផ្កាថ្ម ប៉ុន្តែពួកពួកគាត់​នៅនៅតែ​ឆ្លៀត​ពេលជូនភ្ញៀវទេសចរចូលព្រៃ ឡើងភ្នំ និងដើរកម្សាន្តនៅតំបន់ខ្នងភ្នំដែលមានដូចជា៖ ខ្នងផ្សារ ខ្នងសំពៅ ខ្នងក្រពើ និងខ្នងវាល ជាដើម៕ ​អត្ថបទ ៖ ចេន សុជាតា