ភ្នំពេញ៖ អគ្គនាយកដ្ឋានពន្ធដារ ចាត់ទុកការធ្វើអាជីវកម្មជាភ្នាក់ងារសេវាកម្មពន្ធដារ ដោយគ្មានអាជ្ញាប័ណ្ណ ជាការប្រព្រឹត្តអំពើរាំងស្ទុះការអនុវត្តបទប្បញ្ញត្តិ ស្តីពីពន្ធដារ និងអ្នកជាប់ពន្ធតាមរបបស្វ័យប្រកាស ដែលទទួលការផ្គត់ផ្គង់សេវាកម្មពន្ធដារ ពីបុគ្គលដែលមិនមែនជាភ្នាក់ងារសេវាកម្មពន្ធដារ ដែលធ្វើសកម្មភាពអាជីវកម្ម ជាភ្នាក់ងារសេវាកម្មពន្ធដារដោយគ្មានអាជ្ញាប័ណ្ណ ត្រូវទទួលរងនូវការពិន័យ នឹងជាប់ទោសទណ្ឌ។
អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ចេញសេចក្តីជូនដំណឹងស្តីពីបញ្ជីឈ្មោះ ឬសហគ្រាសដែលទទួលបានអាជ្ញាប័ណ្ណជាភ្នាក់ងារសេវាកម្មពន្ធដារ និងមានសុពលភាព ក្នុងនោះបានបង្ហាញពីអ្នកប្រើប្រាស់សេវាពាក់ព័ន្ធនឹងពន្ធដារ (បំពេញបែបបទពន្ធដារ ដាក់លិខិតប្រកាសពន្ធ បង់ប្រាក់ពន្ធប្រចាំខែ និងប្រចាំឆ្នាំជាដើម) ពីក្រុមហ៊ុនដែលទទួលបានអាជ្ញាប័ណ្ណភ្នាក់ងារសេវាកម្មពន្ធដារ ពីអគ្គនាយកដ្ឋានពន្ធដារ។
ពាក់ព័ន្ធភ្នាក់ងារសេវាកម្មពន្ធដារ ចំពោះបុគ្គលដែលពុំមែនជាភ្នាក់ងារសេវាកម្មពន្ធដារ ហើយធ្វើសកម្មភាពអាជីវកម្មជាភ្នាក់ងារសេវាកម្មពន្ធដារ ដោយគ្មានអាជ្ញាប័ណ្ណ ត្រូវចាត់ទុកថាបានប្រព្រឹត្តអំពើរាំងស្ទុះ ដល់ការអនុវត្តបទប្បញ្ញត្តិស្តីពីពន្ធដារ ដូចមានចែងក្នុងមាត្រា ១២៨ នឹងត្រូវទទួលរងការផ្តន្ទាទោស តាមមាត្រា ១៣៦ នៃច្បាប់ស្តីពីសារពើពន្ធ ដោយពិន័យជាប្រាក់ពី ៥ ០០០ ០០០ រៀល ដល់ ១០ ០០០ ០០០ រៀល ឬជាប់ពន្ធនាគារពី ១ ខែ ដល់ ១ ឆ្នាំ ឬទោសទាំងពីរ ចំពោះរូបវន្តបុគ្គល ឬអ្នកទទួលខុសត្រូវរបស់ក្រុមហ៊ុននីតិបុគ្គល និងសហគ្រាសសហកម្មសិទ្ធិរួមមាន៖ នាយក ឬបណ្ណាធិការ ឬកម្មសិទ្ធិករដែលកាន់កាប់ក្រុមហ៊ុន ឬសិទ្ធិបោះឆ្នោតលើសពី ៥០%។
ចំណែកអ្នកជាប់ពន្ធតាមរបបស្វ័យប្រកាស ដែលទទួលការផ្គត់ផ្គង់សេវាកម្មពន្ធដារ ពីបុគ្គលដែលមិនមែនជាភ្នាក់ងារសេវាកម្មពន្ធដារ ហើយធ្វើសកម្មភាពអាជីវកម្ម ជាភ្នាក់ងារសេវាកម្មពន្ធដារ ដោយគ្មានអាជ្ញាប័ណ្ណ ត្រូវទទួលរងពិន័យជាប្រាក់ពី ៥ ០០០ ០០០ រៀលផងដែរ។
សូមបញ្ជាក់ថា៖ គិតត្រឹមថ្ងៃទី ១៥ ខែ សីហា ឆ្នាំ២០២២ ក្រុមហ៊ុន ឬសហគ្រាសដែលទទួលបានអាជ្ញារប័ណ្ណជាភ្នាក់ងារសេវាកម្មពន្ធដារ ដែលចេញដោយ អគ្គនាយកដ្ឋានពន្ធដារ មានចំនួនប្រមាណ ២៤៥ ក្រុមហ៊ុន បានកំពុងធ្វើអាជីវកម្មស្របច្បាប់៕អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
