បាត់ដំបង៖ ជនរងគ្រោះចំនួន ២នាក់ រស់នៅក្នុងស្រុកភ្នំព្រឹក ខេត្តបាត់ដំបង ត្រូវរន្ទះបាញ់ស្លាប់បាត់ជីវិត ក្នុងករណី២ផ្សេងៗគ្នា ដោយហេតុការណ៍នេះ បានកើតឡើងនៅរសៀលថ្ងៃទី៥ ខែមេសា ឆ្នាំ២០២១ ដែលជនរងគ្រោះម្នាក់ជាមនុស្សចាស់ និងម្នាក់ទៀតជាកុមារ ។
បើតាមអាជ្ញាធរស្រុកភ្នំព្រឹក បានឲ្យដឹងថា ហេតុការណ៍ទី១ កើតឡើងនៅវេលាម៉ោង៣ និង៤០នាទីរសៀល នៅចំណុចក្រុមទី១០ ស្ថិតក្នុងភូមិភ្នំតូច ឃុំពេជ្រចិន្តា ជនរងគ្រោះ ឈ្មោះ អៀង លីណា ភេទស្រី អាយុ១២ឆ្នាំ មានទីលំនៅភូមិឃុំខាងលើ ។
អាជ្ញាធរបានបន្តថា ករណីនេះ គឺក្មេងស្រីរងគ្រោះបានជិះកង់ទៅសុំលុយម្តាយទៅទិញនំហូប ពេលត្រលប់មកវិញដល់ទីវាលប្រហែល១០០ម៉ែត្រ ពីផ្ទះក៏ត្រូវរន្ទះបាញ់ស្លាប់ ក្រោយពីសមត្ថកិច្ច បានចុះត្រួតពិនិត្យសាកសពរួចមក បានប្រគល់ជូនសាច់ញាតិយកទៅធ្វើបុណ្យតាមប្រពៃណី ។
ប្រភពបន្ថែមថា ដោយឡែកហេតុការណ៍ទី២. បានកើតឡើងវេលាម៉ោង៤រសៀល នៅចំណុចក្រុមទី៨ ភូមិពេជ្រចិន្ដា ឃុំពេជ្រចិន្ដា ដោយជនរងគ្រោះឈ្មោះ ង៉ែត ហឿន ភេទស្រី អាយុ៥២ឆ្នាំ រស់នៅភូមិ-ឃុំកើតហេតុខាងលើ ប្ដីឈ្មោះ ប៉ោក ម៉ន អាយុ៥៣ឆ្នាំ មានកូនចំនួន៥នាក់ ស្រីម្នាក់ ។
អាជ្ញាធរបានបញ្ជាក់ថា ករណីនេះកើតឡើងនៅពេលជនរងគ្រោះកំពុងឈរមើលកូន ពូនរងដាំដំឡូងមី ស្រាប់តែភ្លាមនោះក៏រន្ទះបាញ់ស្លាប់តែម្ដង ។ ក្រោយកើតហេតុសមត្ថកិច្ចបានចុះត្រួតពិនិត្យសាកសពរួចមក បានប្រគល់ជូនសាច់ញាតិយកទៅធ្វើបុណ្យតាមប្រពៃណី ។
នៅថ្ងៃដដែលនេះ ក្រៅពីមានករណីរន្ទះបាញ់ស្លាប់មនុស្សចំនួន ២នាក់ ក្នុងស្រុកភ្នំព្រឹកនេះ ក៏មានគ្រោះធម្មជាតិភ្លៀងលាយឡំនឹងខ្យល់កន្ត្រាក់ បណ្តាលឲ្យរប៉ើកដំបូងផ្ទះពលរដ្ឋចំនួន២ខ្នង នៅភូមិភ្នំតូច ឃុំពេជ្រចិន្តា ប៉ុន្តែករណីនេះ មិនមានគ្រោះថ្នាក់ដល់មនុស្សនោះទេ ។
យោងតាមរបាយការណ៍របស់កាកបាទក្រហមខេត្តបាត់ដំបង បានឲ្យដឹងថា កាលពីថ្ងៃទី៤ ខែមេសា ឆ្នាំ២០២១ ក៏មានករណីភ្លៀងធ្លាក់លាយឡំនឹងខ្យល់កន្ត្រាក់ បានធ្វើឲ្យប៉ះពាល់ផ្ទះរបស់ប្រជាពលរដ្ឋសរុប ៧០ខ្នង ដែលនៅក្នុងស្រុកមួយចំនួន មានស្រុកបាណន់ ស្រុកថ្មគោល ស្រុកសង្កែ ស្រុកគាស់ក្រឡ និងក្រុងបាត់ដំបង ប៉ុន្តែមិនមានគ្រោះថ្នាក់ដល់មនុស្សនោះទេ ៕ អត្ថបទ៖ បាន សុខរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
