ភ្នំពេញ៖ ក្រុមការងារគ្រូពេទ្យការិយាល័យស្រុកប្រតិបតិ្តចតុមុខ ហៅកាត់ OD ចតុមុខ នៃមនី្ទរ​សុខាភិបាល​រាជ​ធានី​ភ្នំពេញ ​បានបន្តចុះចាក់វ៉ាក់សាំងជំងឺកូវីដ-១៩ ដូសជំរុញជូនប្រជាពលរដ្ឋ និង​វ៉ាក់សាំង​បង្ការ​ជំងឺ​ ១១​មុខ​ដល់​កុមារ​ រស់នៅតាមសហគមន៍ខ្នងផ្ទះប្រជាពលរដ្ឋ ​ខណ្ឌទួលគោក។

លោក ប៉ាវ សំអាត អ្នកសម្របសម្រួលទូទៅនៃដំណើរការចាក់វ៉ាក់សាំងបង្ការជំងឺកូវីដ-១៩ មណ្ឌល​សុខភាពទួលគោក ប្រាប់BTV ព័ត៌មាន នាព្រឹកថ្ងៃទី៦ ខែកញ្ញា ឆ្នាំ២០២២នេះថា ក្រុមការ​ងារ​គ្រូ​ពេទ្យ​ការិយាល័យ​ស្រុកប្រតិបតិ្តចតុមុខ ​បានសហការជាមួយអាជ្ញាធរមូលដ្ឋានភូមិ​ សង្កាត់ ខណ្ឌ បន្ត​យុទ្ធនា​ការ​ចុះ​ចាក់វ៉ាក់សាំងបង្ការជំងឺកូវីដ-១៩ ​ដូសមូលដ្ឋាន ​និងដូសជំរុញ ជូនប្រជាពលរដ្ឋ និង​ចាក់វ៉ាក់សាំងបង្ការជំងឺ១១មុខ ជូនកុមារ ​មានរយៈពេលមួយសប្តាហ៍ ចាប់ផ្តើមពីថ្ងៃទី៤-១០ ខែកញ្ញា នៅ​តាម​សហគមន៍ ខ្នងផ្ទះប្រជាពលរដ្ឋ ក្នុងខណ្ឌទួលគោក ​ ដោយដើរពីផ្ទះមួយ ទៅផ្ទះមួយ ក៏ជា​ដូចជា​នៅតាមសាលារៀនផ្សារ តំបន់រោងចក្រ និងទីប្រជុំជននានា ​ដោយចាក់វ៉ាក់សាំងបង្ការជំងឺ ជូនកុមារ យុវវ័យ និងប្រជាពលរដ្ឋ ឲ្យបានចំនួនច្រើនលឿនបំផុត ​និងគ្រប់ៗគ្នា។

ប្រជាពលរដ្ឋមកចាក់វ៉ាក់សាំងបង្ការជំងឺកូវីដ-១៩ និងអាណាព្យាបាលនាំកូនមកទទួល​ថ្នាំ​បង្ការជំងឺ​១១ ​មានអាយុចាប់ពីកើត​ រហូតដល់អាយុក្រោម២ឆ្នាំ បានបង្ហាញពីកី្តសប្បាយ​រីករាយ​ដែល​មាន​ក្រុមគ្រូពេទ្យ​ចុះមក​ចាក់​វ៉ាក់​សាំងដល់ផ្ទះ។

ក្រុមគ្រូពេទ្យចុះចាក់វ៉ាក់សាំងជូនបងប្អូន ប្រជាពលរដ្ឋ ដល់លំនៅដ្ឋាននេះ ​គឺវ៉ាក់សាំងកូវីដ-១៩ ប្រភេទSinovac ​ចាក់ជូនកុមារអាយុចាប់ពី៣ឆ្នាំ រហូត​ដល់មនុស្ស​ពេញ​វ័យ អាយុ១០០ឆ្នាំ, Pfizer P.T ចាក់ជូនកុមារអាយុចាប់ពី៥ឆ្នាំ រហូតដល់ក្រោម១២ឆ្នាំ និងPfizer ចាក់ជូ​នកុមារ​អាយុ​ចាប់ពី១២ឆ្នាំ រហូត​ដល់​មនុស្សពេញវ័យ អាយុ១០០ឆ្នាំ។

ដោយឡែកវ៉ាក់សាំងបង្ការជំងឺ១១មុខ សម្រាប់​កុមារ គឺវ៉ាក់សាំង​កញ្ជ្រិល ស្អូច ​រលាកស្រោមខួរ តេតាណូស ​(ស្រី្តអាយុ១៥ឆ្នាំ-ស្រ្តីអាយុ៤៥ឆ្នាំ) រលាក​ថ្លើម​ប្រភេទ​B គ្រុន​ស្វិតដៃជើង ​ថ្នាំវីតាមីន A សម្រាប់កុមារ​ បញ្ចុះ​សត្វល្អិតផងដែរ៕ អត្ថបទ រដ្ឋា