ភ្នំពេញ៖ ក្រសួងធនធានទឹក និងឧតុនិយម ជូនដំណឹងថា ឥទ្ធិពលប្រព័ន្ធសម្ពាធទាប (ITCZ)​អូសបន្លាយនៅភាគខាងជើងប្រទេសថៃ ឡាវ និងវៀតណាម នឹងអាចបង្កមានភ្លៀងធ្លាក់រាយប៉ាយ​ពី​មធ្យមទៅបង្គួរនៅលើខេត្តជាង ១០នៅប្រទេសកម្ពុជា។

អាជ្ញាធររាជធានីភ្នំពេញ អះអាងថា ឥទ្ធិពល​អាកាសធាតុនេះ នឹងមិនបង្កជាទឹកជំនន់ជន់លិច​នៅ​ជាយរាជធានីភ្នំពេញ ខណៈពលរដ្ឋតាមតំបន់ធ្លាប់រងទឹកលិចមានការត្រៀមខ្លួនគិច​ពីទឹកជំនន់រួចរាល់។

បើតាមបណ្តាពលរដ្ឋដែលធ្លាប់រងទឹកលិចនៅលំនៅដ្ឋាននៅជាយខ័ណ្ឌដង្កោ រាជធានីភ្នំពេញ បាន​ថ្លែងប្រាប់ BTV នៅថ្ងៃទី៦ ខែកញ្ញានេះថា នៅពេលនេះ ពួកគាត់តាមដានការព្យាករអាកាស​ធាតុជាប់​ជាប្រចាំ​របស់​ក្រសួងធនធានទឹក និងឧតុនិយម ។ តែទោះយ៉ាងណា​បណ្តាពលរដ្ឋ​គឺមាន​ការត្រៀមខ្លួនផងដែរនៅមុន និងក្រោយរដូវបុណ្យភ្ជុំ គឺភូមិឋានរបស់ពួកគាត់នៅជាយរាជធានី​ភ្នំពេញ​តែងតែមានជំនន់ទឹកភ្លៀងជន់លិច។

បើតាមលោក ម៉េត មាសភក្តី ​អ្នកនាំពាក្យសាលារាជធានីភ្នំពេញថា ​រដ្ឋបាលរាជធានីភ្នំពេញ ​តែងតែ​មានការត្រៀមខ្លួនរួចជាស្រាច់ដូចជារៀបចំកងកម្លាំង​ទទួលខុសត្រូវ ​ត្រៀមសំភារៈជួយសង្គ្រោះ និង​ត្រៀមអំណោយសង្គ្រោះជាដើម ​ដើម្បីត្រៀមជួយអន្តរាគមន៍ទាន់ពេលវេលានៅ​ពេលមាន​គ្រោះធម្មជាតិ​ណាមួយកើតឡើង។

បើតាមអ្នកនាំពាក្យគណៈកម្មាធិការជាតិគ្រប់គ្រង​គ្រោះមហន្តរាយ ​លោក សុទ្ធ គឹមកុលមុន្នី បាន​ថ្លែងថា​ ឥទ្ធិពលអាកាសធាតុមានភ្លៀងធ្លាក់រាយប៉ាយទូទាំង​ប្រទេសចាប់ពីថ្ងៃទី៥ ​ដល់ថ្ងៃទី៩ ខែ​កញ្ញានេះ មកដល់ពេលនេះនៅខេត្តកំពង់ស្ពឺជាពិសេសតំបន់ភ្នំឱរ៉ាល់ជាដើម គឺមិនទាន់មាន​ភ្លៀង​ច្រើន ​ដែលបង្កជាទឹកជំនន់ហូរតាមស្ទឹងព្រែកត្នោតបង្កជន់លិចជាយរាជ​ធានៅភ្នំពេញ​នោះទេ ហើយយើងនឹងជូនដំណឹងបន្តទៀត ​ប្រសិនបើទឹកភ្លៀងបង្កករណីប៉ះពាលដល់តំបន់ណា​ដែល​ប្រឈមនឹងទឹកភ្លៀងជន់លិច៕ អត្ថប៖ ស៊ុម សុខជា