ឧត្តរមានជ័យ៖ លោក សង់ រីហា អភិបាលរងខេត្តតំណាងឯកឧត្តម ប៉ែន កុសល្យ អភិបាលខេត្ត​ឧត្តរមានជ័យ បានលើកឡើងថា កម្មវិធីអក្ខរកម្ម គឺជាស្ពានជួយដល់ប្រជាពលរដ្ឋនៅតាមមូលដ្ឋាន​ឱ្យមានភាពល្អប្រសើរ និងមានចំណេះ មានការយល់ដឹងបានទូលំទូលាយ។

ក្នុងពិធីបើកអង្គ​មិទ្ទិញ​អបអរ​ទិវា​អក្ខរកម្ម​ជាតិ ៨កញ្ញា​ឆ្នាំ២០២២​ នៅ​មន្ទីរអប់រំយុវជន និងកីឡា​ខេត្តឧត្តរមានជ័យ នាថ្ងៃទី៦កញ្ញាឆ្នាំ២០២២នេះ លោក សង់ រីហា អភិបាលរងខេត្ត សូមថ្លែង​អំណរអរគុណ​និង​កោត​សរសើរ​ចំពោះ​លោកគ្រូ​អ្នកគ្រូ និង​មន្រ្តីអប់រំទាំងអស់​ ក៏​ដូចជា​គ្រូបង្រៀនថ្នាក់​អក្ខរកម្ម​ ដែលបាន​ខិតខំ​បំពេញការងារភារកិច្ចរបស់ខ្លួន​បានល្អ​ចំពោះការ​សហការ​ជាមួយ​ដៃគូ​អង្គការ​ជាតិអន្តរជាតិ​ និងដៃគូអភិវឌ្ឍន៍​នានា​ទាំងអស់​ ក្នុង​ការងារ​សង្គម​ជួយ​ដល់ផ្នែកអប់រំក្រៅប្រព័ន្ធ​ចំពោះការបង្រៀន​កម្មវិធី​អក្ខរកម្ម។

លោក បានបន្តថា ទាំងអស់នេះ​ គឺដោយសារតែមានការចូលរួម​ជួយ​ជ្រោមជ្រែង​ពី​មន្រ្តីថ្នាក់មូលដ្ឋាន សប្បុរសជន​នានា ក្នុងការរួមចំណែកយ៉ាង​សកម្មក្នុងការ​អភិវឌ្ឍ​លើវិស័យអប់រំ​ក្រៅប្រព័ន្ធ​នៅ​តាម​មូលដ្ឋាន​ក៏​ដូចជា​ទីវត្តអារាមនានា​ទើបយើង​ទទួល​បាន​លទ្ធផល​ល្អប្រសើរឡើង​បន្ថែមទៀត​យ៉ាង​ដូច្នេះ​។

បើតាម​របាយ​ការណ៍​របស់​លោក ប៉ិច រតនា ប្រធានមន្ទីរអប់រំយុវជន និងកីឡាខេត្តឧត្តរមានជ័យ​បាន​ឱ្យ​ដឹងថា​ នៅឆ្នាំ២០២២នេះ​ផ្នែកអប់រំក្រៅប្រព័ន្ធកម្មពិធីអក្ខរកម្មមានចំនួន១៩ថ្នាក់​សិស្ស​ចូលរៀន​មានចំនួន ៣៦០នាក់ស្រី ២០០នាក់។ ​កម្មវិធី​សមមូល​បឋម​សិក្សា​មាន​ចំនួន ១០ថ្នាក់ ​មានសិស្ស១៧១នាក់ ស្រី៦៦នាក់ និង​កម្ម​វិធី​ជំនាញ​មុខ​របរ​ក្នុង​មជ្ឈមណ្ឌល​សិក្សា​សហគមន៍​មាន៧ថ្នាក់ ​មានសិស្ស២១២នាក់ ស្រី១២៧នាក់។​ដោយឡែក​មជ្ឈមណ្ឌល​សហគមន៍​មាន៤កន្លែង​មាន​គណៈ​គ្រប់គ្រង​មានចំនួន២០នាក់​ស្រី១នាក់ និងសហគមន៍​បំពេញ​វិជ្ជា​មាន២ថ្នាក់​មានសិស្ស៦៧នាក់ ស្រី៣២នាក់៕ អត្ថបទ៖ សារិទ្ធិ