​អង់គ្លេស៖ លោកស្រី Liz Truss ត្រូវ​បាន​បោះឆ្នោត​ជ្រើសរើស​ជា​មេដឹកនាំ​ថ្មីរបស់​គណបក្ស​អភិរក្សនិយម ដែល​គណបក្ស​នេះ​បាន​ប្រកាស​កាលពី​ថ្ងៃ​ចន្ទ ហើយ​លោកស្រី​នឹង​ចូលកាន់​តំណែង​នៅ​ថ្ងៃ​អង្គារ​នេះ​ជា​នាយករដ្ឋមន្ត្រី​ថ្មី​របស់​ចក្រភព​អង់គ្លេស ដើម្បី​ដឹកនាំ​ប្រទេស​នេះ​ឆ្លងកាត់​វិបត្តិ​ដែល​បាន​ធ្វើ​ឲ្យ​ប៉ះពាល់​ធ្ងន់ធ្ងរ ​ដល់​ជីវភាព​រស់នៅ​របស់​ប្រជាពលរដ្ឋ​។

លោកស្រី Truss មាន​អាយុ 47​ឆ្នាំ​ដែល​បច្ចុប្បន្ន​ជា​រដ្ឋមន្ត្រីការបរទេស បាន​ទទួល​ជ័យជំនះ​លើ​រដ្ឋមន្ត្រី​ហិរញ្ញវត្ថុ​លោក Rishi Sunak បន្ទាប់ពី​ការប្រកួតប្រជែង​មេដឹកនាំ​។ លោកស្រី Truss ទទួល​បាន​សំឡេង 81,326សំឡេង ខណៈ​លោក Sunak ទទួលបាន 60,399​សំឡេង​។​ លោក​ស្រី​ប្រឈម​នឹង​សម្ពាធ​ភ្លាមៗ​ក្នុង​ការ​ផ្តល់​ការសន្យា​របស់​លោក​ស្រី ​ដើម្បី​ដោះស្រាយ​វិបត្តិ​ផល​ប៉ះពាល់​លើ​ជីវភាព​រស់នៅ​ដែល​កំពុង​កើតឡើង​នៅ​អង់គ្លេស និង​បញ្ហា​សេដ្ឋកិច្ច​ដែល​កំពុង​ឈាន​​ទៅរក​វិបត្តិ​ដ៏​ខ្លាំង​។ ម្ចាស់ក្សត្រី Elizabeth II នឹង​តែងតាំង​លោកស្រី Truss ជា​នាយករដ្ឋមន្ត្រី​របស់​ចក្រភព​អង់គ្លេស​ជា​ផ្លូវការ​នៅ​ថ្ងៃ​អង្គារ​នេះ ហើយ​ពិធី​តែង​តាំង​នឹង​ធ្វើ​ឡើង​ទៅ​នៅ​វិមាន Balmoral ក្នុង​ដែនដី​ស្កុ​តឡែ​ន ជា​កន្លែង​ដែល​ម្ចាស់​មហាក្សត្រី​កំពុង​លំហែ​ព្រះ​កាយ​ក្នុង​ពេល​រដូវក្តៅ ​ច្រើន​ជាង​នៅ​រាជវាំង Buckingham ក្នុង​ទីក្រុង​ឡុង​ដ៍​។

ការប្រកួតប្រជែង​មេដឹកនាំ​រយៈពេល​ពីរ​ខែ​បាន​ធ្វើ​ឱ្យ​អង់គ្លេស​មាន​ភាព​ខ្វះ​ចន្លោះ​ ខណៈ​ភាព​មិន​សប្បាយចិត្ត​របស់​ប្រជាជន​កើន​ឡើង​ខ្លាំង​នៅ​ទូទាំង​ប្រទេស ​ក្នុង​ពេល​មានតម្លៃ​ថាមពល និង​ថ្លៃ​អាហារ​ហក់​ឡើង​ខ្ពស់​។​ អតីត​រដ្ឋមន្ត្រី​ការបរទេស​លោកស្រី Liz Truss បាន​ថ្លែងអំណរគុណ​ចំពោះ​នាយករដ្ឋមន្ត្រី​អង់គ្លេស​លោក Boris Johnson ដែល​ចាក​ចេញពី​តំណែង ហើយ​បាន​សន្យា​ថា​នឹង​ដោះ​ស្រាយ​វិបត្តិ​ថាមពល ខណៈ​លោកស្រី​ត្រូវ​បាន​ជ្រើសរើស​ជា​មេដឹកនាំ​ថ្មី​របស់​គណបក្ស​កាលពី​ថ្ងៃ​ចន្ទ​៕

អត្ថបទ៖ ប៊ុនថន