UN៖ កាលពីថ្ងៃអង្គារប្រមុខអង្គការសហប្រជាជាតិលោក Antonio Guterres បានជំរុញដល់រុស្ស៊ី និងអ៊ុយក្រែនឲ្យព្រមព្រៀងបង្កើតតំបន់គ្មានកងទ័ពនៅជុំវិញរោងចក្រថាមពលនុយក្លេអ៊ែរ Zaporozhzhia គ្រប់គ្រងដោយរុស្ស៊ីនៅក្នុងប្រទេសអ៊ុយក្រែន។
លោក Guterres បានប្រាប់ក្រុមប្រឹក្សាសន្តិសុខអង្គការសហប្រជាជាតិថា ដំណាក់កាលទី១៖ កងកម្លាំងរុស្ស៊ី និងអ៊ុយក្រែនត្រូវតែសន្យាថា នឹងមិនពាក់ព័ន្ធក្នុងសកម្មភាពយោធាណាមួយចំពោះទីតាំងរោងចក្រនេះ ឬពីទីតាំងរោងចក្រនេះ ដែលមានន័យកុំឲ្យមានការបាញ់ចេញពីទីតាំងរោងចក្រនេះ និងបាញ់ចូលមកទីតាំងរោងចក្រនេះ។ លោកបានប្រាប់សមាជិក ១៥ប្រទេសរបស់អង្គការនេះថា ដំណាក់កាលទី២៖ កិច្ចព្រមព្រៀងមួយស្ដីពីតំបន់គ្មានយោធា គួរតែត្រូវបានធានា។
ជាពិសេសការធានានោះត្រូវរាប់បញ្ចូលទាំងការប្ដេជ្ញាចិត្ត ធ្វើឡើងដោយកងកម្លាំងរុស្ស៊ីក្នុងការដកកងទ័ព និងយុទ្ធោបករណ៍របស់ខ្លួនទាំងអស់ចេញពីតំបន់នោះ និងការប្ដេជ្ញារបស់កងកម្លាំងអ៊ុយក្រែនដែលមិនត្រូវរុលចូលទៅតំបន់នោះឡើយ។ ទីភ្នាក់ងារថាមពលអាតូមិកអន្តរជាតិ (IAEA) កាលពីព្រឹកថ្ងៃអង្គារបានអំពាវនាវឲ្យមានតំបន់សន្តិសុខមួយ ជុំវិញស្ថានីយរោងចក្រថាមពលនុយក្លេអ៊ែរដ៏ធំបំផុតរបស់អឺរ៉ុបមួយនេះ ដោយនិយាយថា ក្រុមអ្នកជំនាញរបស់ខ្លួនបានរកឃើញការខូចខាតកាន់តែច្រើន នៅខាងមុខរោងចក្រនោះក្នុងពេលមានសង្គ្រាម៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
