កោះកុង៖ សាខាកាកបាទក្រហមកម្ពុជាក្រុងខេមរភូមិន្ទចុះ​ជួប​សំណេះសំណាលសួរសុខទុក្ខ និងផ្តល់ស្បៀងអាហារជូនប្រជាពលរដ្ឋក្រីក្រ ចាស់ជរា ជនពិការ និងស្រ្តីទើប​សម្រាលក្រីក្រ សរុបចំនួន៣១គ្រួសារ នៅទីស្នាក់ការអនុសាខាកាកបាទ​ក្រហមកម្ពុជា​ក្រុងខេមរភូមិន្ទ កាលពីរសៀលថ្ងៃទី៦ ខែកញ្ញា។

ក្នុងឱកាសនោះ លោក ឈេង សុវណ្ណដា ប្រធានគណៈកម្មាធិការអនុសាខាកាកបាទក្រហមកម្ពុជា​ក្រុងខេមរភូមិន្ទ ​លើកឡើងថា រាល់ការជំនឿអ្វីមួយសុំឱ្យមានព័ត៌មាន ​ហេតុផលច្បាស់លាស់ និង​ការ​គិតពិចារណាប្រកប​ដោយភាពត្រឹមត្រូវ ដូច្នេះការ​បំផុសចលនាថា​មានទឹកលិចលង់ភពផែនដី​របស់​លោក ខឹម វាសនា​ ដើម្បីឱ្យពលរដ្ឋទៅចម្ការក្បែរភ្នំគូលែន វាជារឿងមួយគ្មានអ្វីចំណេញ​នោះទេ។

លោក បានបញ្ជាក់ទៀតថា ប្រសិនបើពលរដ្ឋជឿទៅការឃោសនារបស់លោក ខឹម វាសនា មាន​តែការ​ខាតបាត់ពេលវេលា ប្រាក់កាក់ទ្រព្យសម្បត្តិ និងបែកបាក់គ្រួសារ សម្រាប់សង្គមពលរដ្ឋ​ខ្មែរទូទៅ។ អ្វីដែលពលរដ្ឋ ត្រូវគិតគូរបង្កើនការប្រុងប្រយ័ត្នអំឡុង​រដូវវស្សានេះ ​ថែទាំសុខភាពឱ្យល្អ ចូលរួមទៅចាក់វ៉ាក់សាំងបង្ការការពារជំងឺកូវីដ១៩។

គួររម្លឹកដែរថា ឃោសនារបស់លោកខឹមវាសនា ថាមានលិចលង់ភពផែនដី ដោយអះអាងថា មានតែ​ចំការម្រេចរបស់លោកនៅជិតភ្នំគូលែនទេ​ ដែលអាចឲ្យពលរដ្ឋចៀសផុតពីសេចក្តី​ស្លាប់បាន។ ការលើកឡើងរបស់លោកខឹមវាសនា នៅក្នុងបណ្ដាញសង្គមហ្វេសប៊ុក បែបនេះបានធ្វើឲ្យពលរដ្ឋ​ទាំង​ក្នុងនិងក្រៅប្រទេស ​នាំគ្នាសម្រុកមករស់នៅក្នុងចម្ការម្រេចលោក ខឹម វាសនា ប្រមាណជិត ២ម៉ឺននាក់ ​ហើយបច្ចុប្បន្ននេះពលរដ្ឋបានយល់ព្រមចាកចេញទៅវិញជិតអស់ហើយ នៅសល់តែ​ជាង​មួយពាន់នាក់តែប៉ុណ្ណោះ ​ដែលនៅ​ក្រាញននៀល​មិន​ព្រមចាកចេញ។

លោក ឈេង សុវណ្ណដា ​ក៏សំណូមពរដល់ពលរដ្ឋយកចិត្តទុកដាក់បញ្ហាគ្រោះអគ្គិភ័យ ព្រោះកន្លង​ទៅថ្មីៗមានករណីឆាបផ្ទះពលរដ្ឋមួយកន្លែងនៅសង្កាត់ដងទង់បណ្តាលឱ្យខូចខាតទ្រព្យសម្បត្តិមួយចំនួន ​ដោយសារការឆ្លងចរន្តអគ្គិសនី​ ឬការថ្វីប្រហែសដុតធូបទានជាដើម។​ កុំចេញទូកនេសាទ អំឡុងពេលមានព្យុះភ្លៀងដូចម៉ោងនេះ៕អត្ថបទ៖ ឈឹម មករា