​បាល់ទាត់៖ ក្រុម​ញញួរ​ធំ West Ham បាន​បន្ត​ក្តីសង្ឃឹម​បង្ហាញខ្លួន​នៅ​ក្របខណ្ឌ​អឺរ៉ុប​រដូវ​កាល​ក្រោយ ​បន្ទាប់ពី​ជ័យជំនះ​ដ៏​មានសារសំខាន់​នៅ​ទឹកដី Wolverhampton ៣-២ យប់មិញ​។ West Ham បាន​នាំមុខ​ក្រុម​ម្ចាស់ផ្ទះ​ដល់​ទៅ ៣គ្រាប់​មុន​ក្នុង​វគ្គ​ទី១ ដោយ Jesse Lingard នាទី​ទី៦ Pablo Fornals នាទី​ទី១៤ និង Jarrod Bowen នាទី​ទី៣៨ ក្រុម​ម្ចាស់ផ្ទះ Wolves ក៏​ព្យាយាម​តាម​ពីក្រោយ​វិញ​ ២​គ្រាប់​នៅ​នាទី​ទី៤៤ ដោយ Leander Dendoncker និង​នាទី​ទី៦៨ ដោយ Fabio Silva​។​

​​យ៉ាងណាក្តី​វេលា​​ដែល​នៅសល់ ក្រុម​របស់លោក David Moyes រក្សា​ការនាំ​មុខ​នេះ​ដល់​ចប់​ការប្រកួត​។ ​​ជ័យជំនះ​នេះ​ធ្វើអោយ West Ham ទទួលបាន ៣​ពិន្ទុ​ដ៏​មាន​សារសំខាន់​ដើម្បី​ឡើងមក​ឈរ​លេខ៤ ក្នុង​តារាង​មាន ៥២ពិន្ទុ​ក្រោយ​លេង​បាន ៣០ប្រកួត​ដេញ​ពីក្រោយ​ក្រុម​លេខ៣ Leicester City ៤ពិន្ទុ និង​ពីលើ​ក្រុម​លេខ៥ តោ​ខៀវ Chelsea ១ពិន្ទុ​។ ​ងាក​មក​មួយ​ប្រកួត​ទៀត​យប់មិញ​ដែរ Everton ធ្វើ​អ្វី​ក្រុម​ភ្ញៀវ Crystal Palace មិនបាន​ឡើយ​បាន​ត្រឹម​ស្មើគ្នា ១-១​។ ​​ទោះបី James Rodriguez រកបាន​គ្រាប់​នាំមុខ​មុន​នៅ​នាទី​ទី៥៦ ក៏ដោយ Crystal Palace ក៏​ទាមទារ​បាន​មួយពិន្ទុ​វិញ​នៅ​នាទី​ទី៨៦ ជិត​ចប់​ការប្រកួត​ទៅហើយ​ដោយ Michy Batshuayi​។ ​​Everton របស់លោក Carlo Ancelotti បន្ត​ឈរ​លេខ៨ ក្នុង​តារាង​មាន ៤៧ពិន្ទុ ខណៈ Crystal Palace ឈរ​លេខ ១២ មាន ៣៨ពិន្ទុ​៕

​អត្ថបទ​៖​នាង សុភា​វុ​ធ