ភ្នំពេញ៖ ប្រជាពលរដ្ឋក្នុងមូលដ្ឋានរាជធានីភ្នំពេញ អាយុចាប់ពី១៨ឆ្នាំឡើង បានមកចាក់វ៉ាក់សាំង​បង្ការ​ជំងឺកូវីដ-១៩ ដូសជំរុញទី៥ បានចំនួន ១៦០,១៨៣នាក់ ស្មើនឹង ១១.៣៤% នៃក្រុមគោលដៅ ១,៤១២,៧៦៩នាក់គិតត្រឹមល្ងាចថ្ងៃទី៦ ខែកញ្ញា ឆ្នាំ២០២២​នេះ ។

ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាល រាជធានីភ្នំពេញ បានបន្តថា សព្វថ្ងៃ​ក្រៅ​ពីមណ្ឌលចាក់វ៉ាក់សាំងបង្ការជំងឺកូវីដ-១៩​ នៅតាមមនី្ទរពេទ្យបង្អែក និងមណ្ឌល​សុខភាព​ទាំង ៤៣ទីតាំង ក្នុងរាជធានីភ្នំពេញ គ្រូពេទ្យ នៃការិយាល័យសុខាភិបាល​ ស្រុកប្រតិបតិ្ត នៃមនី្ទរ​សុខាភិបាល​រាជធានីភ្នំពេញ ​កំពុងបន្តបេសកកម្មយ៉ាងសកម្ម ​ចុះចាក់វ៉ាក់សាំងតាមសហគមន៍ ខ្នងផ្ទះ ​ដើរពីផ្ទះមួយ ទៅផ្ទះមួយ ​ដើម្បីចាក់វ៉ាក់សាំងកូវីដ-១៩​ ជូនប្រជាពលរដ្ឋ ចាស់ជរា និងវ៉ាក់សាំង​ការពារជំងឺ១១មុខ ជូនកុមារ ដែលពិបាកក្នុងការធ្វើដំណើរមកកាន់មណ្ឌលសុខភាព និង​មនី្ទរពេទ្យបង្អែក ​ដើម្បីទទួលយកថ្នាំបង្ការការពារជំងឺ។

បងប្អូនប្រជាពលរដ្ឋ ​និងអាណាព្យាបាលបាននាំកូនមកចាក់វ៉ាក់សាំងកូវីដ-១៩ ពីក្រុមការងារ​គ្រូពេទ្យ​មណ្ឌលសុខភាពទឹកថ្លា ​បានលើកឡើងស្រដៀងគ្នាថា ​ការចាក់វ៉ាក់សាំងបង្ការជំងឺកូវីដ-១៩ ពិតជា​មានសារៈសំខាន់ខ្លាំងណាស់​ សម្រាប់ការពារសុខភាពកុំឲ្យឆ្លងមេរោគកូវីដ-១៩ ផ្ទាល់ខ្លួន ក្រុមគ្រួសារ ​និងសង្គមជាតិផងដែរ។

ប្រធានមនី្ទរសុខាភិបាលរាជធានីភ្នំពេញ ​បានបញ្ជាក់ផងដែរថា ក្រោមការដឹកនាំប្រកប​ដោយ​គតិបណ្ឌិត ​របស់សម្តេចអគ្គមហាសេនាបតីតេជោ ​ហ៊ុន សែន នាយករដ្ឋមន្រី្តនៃព្រះរាជាណាចក្រ​កម្ពុជា យុទ្ធនាការចាក់វ៉ាក់សាំងបង្ការជំងឺកូវីដ-១៩ បានចាប់ផ្តើមចាក់វ៉ាក់សាំងនេះជូនបងប្អូន​ប្រជាពលរដ្ឋកាលពីថ្ងៃទី១០ ​ខែ​កុម្ភៈ ឆ្នាំ២០២១ ​ដោយឥតគិតថ្លៃ ​រហ័សទាន់ពេលវេលា រួមទាំង​ជនបរទេសដែលរស់នៅក្នុងព្រះរាជាណាចក្រកម្ពុជាផងដែរ។

គិតមកត្រឹមថ្ងៃនេះផ្ទាល់ ប្រជាពលរដ្ឋអាយុចាប់ពី១៨ឆ្នាំឡើង ​ចាក់វ៉ាក់សាំងដូសទី៣ បានចំនួន ១០៦.៤៨%, ដូសទី៤ បានចំនួន៨១.៣២% និងដូសទី៥ បានចំនួន ១១.៣៤% នៃប្រជាពលរដ្ឋគោលដៅ៕ អត្ថបទ៖ រដ្ឋា