ភ្នំពេញ៖ ខណៈពិធីបុណ្យភ្ជុំបិណ្ឌនឹងចាប់ផ្តើមពីថ្ងៃចុងសប្តាហ៍នេះតទៅ បណ្តាវត្តក្នុងរាជធានី​ភ្នំពេញ ​កំពុងរៀបចំតុបតែលំអវត្តតាមបែបសាសនា ដើម្បីត្រៀម​ទទួលពុទ្ធបរិស័ទ។ ការ​ត្រៀម​រៀបចំ​នេះ ​រាប់​បញ្ចូល​ទាំងវិធានការសុខាភិបាល ​ទប់ស្កាត់ជំងឺកូវីដ-១៩ផងដែរ។

ព្រះរតនវិសុទ្ធិវង្ស គាន សារ៉ាត់ ព្រះគ្រូសូត្រឆ្វេង វត្តព្រះពុទ្ធឃោសាចារ្យ(ចិនដំដែក) នៅថ្ងៃទី៧ខែកញ្ញានេះ មាន​សង្ឃដីកា​ប្រាប់BTVថា ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ដែលចាប់ផ្តើមពីថ្ងៃ១រោចខែភទ្របទ​ខាងមុខនេះតទៅ ​គណៈកម្មការវត្តកំពុងរៀបចំ​តុបតែង​លំ​អវត្តតាមបែបសាសនា​ ជាពិសេសវិធានការសុខាភិបាល ​ទប់ស្កាត់ការឆ្លងជំងឺកូវីដ-១៩ ពេល​ពុទ្ធបរិស័ទចូលមកកាន់វត្ត។

ជាមួយគ្នានេះដែរ ព្រះតេជគុណញ៉េប តាត ព្រះលេខាធិការវត្តឧណ្ណាលោម មាន​សង្ឃដីកា អំពាវនាវ​ដល់ពុទ្ធបរិស័ទដែលមកកាន់វត្តអារាម​ អំឡុងពិធីបុណ្យភ្ជុំបិណ្ឌត្រូវមានប្រយ័ត្នចំពោះកូវីដ-១៩ និង​គោរព​តាមការណែ​របស់គណៈកម្មការវត្ត ​ពេលរៀបចំពិធីសាសនាណាមួយ។

ឯកឧត្តម សេង សុមុនី រដ្ឋលេខាធិការ និងជាអ្នកនាំពាក្យក្រសួងធម្មការ ​និងសាសនា ​បានថ្លែងថា អំឡុងពិធីបុណ្យកាន់បិណ្ឌ និងភ្ជុំបិណ្ឌ ក្រសួងបាន​ចេញសេចក្តីណែនាំ​ដល់បណ្តាវត្តទាំងអស់​ក្នុង​ប្រទេសកម្ពុជា និងអាជ្ញាធរពាក់ព័ន្ធ សហការ​រៀបពិធីបុណ្យភ្ជុំបិណ្ឌនៅតាមវត្តអារាមឲ្យប្រព្រឹត្ត​ទៅ​ដោយរលូនដូចឆ្នាំមុន។ក្រៅពីនេះ ​ឯកឧត្តម បានអំពាវនាវដល់បណ្តាវត្តទាំងអស់​ បើសិនសំបូរ​សង្ហាន់ ឫច្រើនត្រូវចែករំលែកដល់អ្នកខ្វះខាត ​ជៀសវាង​ការ​យកទៅ​បោះចោល​។

បុណ្យភ្ជុំបិណ្ឌ ​ជា​ពិធីបុណ្យមួយ​ ក្នុងចំណោមពិធីបុណ្យធំៗ​ដទៃទៀតនៃ ​ព្រះរាជ​ពិធី​ទា្វរទសមាស ដែល​ប្រជារាស្រ្តខ្មែរ​ តាំងពីបុរាណ​រៀងមក ​តែងតែ​ប្រារព្ធពិធីនេះ​មិនដែល​អាក់ខានឡើយ ពោល​គឺចាប់ពីថៃ្ង ១រោច រហូតដល់ថៃ្ងទី ១៥រោច ​ខែភទ្របទ​ ដែលគេហៅថាបិណ្ឌ១, បិណ្ឌ២ ... និង​ថៃ្ងបញ្ចប់ គឺជាថៃ្ង "ភ្ជុំបិណ្ឌ"។

ជារៀងរាល់ឆ្នាំ នៅពេលដល់ថ្ងៃខែ ដែលត្រូវប្រារព្ធពិធីបុណ្យភ្ជុំបិណ្ឌ គ្រប់បងប្អូនកូនចៅ សាច់ញាតិ​សន្ដានទាំងអស់ ​ទោះនៅទីជិត ឬទីឆ្ងាយ​ តែងតែធ្វើដំណើរទៅជួបជុំគ្នា ជាពិសេស​ទៅ​ជួប​ឪពុកម្ដាយ​ ដើម្បីរៀបចំម្ហូបអាហារ​ បាយ​សម្ល ​ចង្ហាន់យកទៅប្រគេនព្រះសង្ឃ​ដែលគង់​នៅ​វត្តអារាម៕ អត្ថបទ៖ទូច សោភ័ណ