ភ្នំពេញ​៖ ក្រុមហ៊ុន ខ្មែរ ប៊ែវើរីជីស បានរៀបចំកម្មវិធី “ខ្ញុំឆ្នើម” ឬ The Best of Me ជាថ្មីម្ដងទៀត ក្នុងឆ្នាំ២០២២នេះ, នារសៀលថ្ងៃទី ០៦ ខែកញ្ញា ឆ្នាំ២០២២។

​ពិធីប្រកាសបើកជាផ្លូវការនេះ មានការចូលរួមពីលោកនាយក នាយករង លោកគ្រូ អ្នកគ្រូ សិស្សានុសិស្សសរុប២០០នាក់ មកពីវិទ្យាល័យចំនួន៥ នៅរាជធានីភ្នំពេញរួមមាន វិទ្យាល័យព្រះស៊ីសុវត្ថិ, វិទ្យាល័យបាក់ទូក, វិទ្យាល័យទួលទំពូង, វិទ្យាល័យឥន្ទ្រទេវី និងវិទ្យាល័យព្រែកលៀប។

កម្មវិធី«ខ្ញុំឆ្នើម» ត្រូវបានរៀបចំឡើងក្រោមគោលបំណង បំប៉នសមត្ថភាពសិស្សានុសិស្សវិទ្យាល័យឲ្យសម្រេចចិត្តត្រឹមត្រូវ ដើម្បីឈានទៅរកភាពជោគជ័យក្នុងការសិស្សាថ្នាក់ឧត្តមសិក្សា ជីវិត និងការងារ។

ជាមួយគ្នានោះដែរ លោកបណ្ឌិត អ៊ឹម សុធារិទ្ធ នាយកទំនាក់ទំនងសាធារណៈ ក្រុមហ៊ុន ខ្មែរ ប៊ែវើរីជីស បានមានប្រសាសន៍ថា៖ មូលហេតុដែល ខ្មែរ ប៊ែវើរីជីស នៅតែបន្តរៀបចំសិក្ខាសាលា «ខ្ញុំឆ្នើម» គឺដោយសារសិស្សានុសិស្ស គឺជាទំពាំងស្នងឬស្សីនៅក្នុងសង្គមជាតិ។ បើពួកគាត់ចេះប្រើប្រាស់ចំណុចខ្លាំង និងមានគំនិតវិជ្ជមាន ហើយយកទៅប្រើប្រាស់ឲ្យចំគោលដៅ នោះពួកគាត់ នឹងមានអនាគតល្អ និងអាចជំរុញឲ្យប្រទេសជាតិយើងទាំងមូល មានការរីកចម្រើន។

ទន្ទឹមនឹងនោះ នាយកវិទ្យាល័យព្រះស៊ីសុវត្ថិ លោក មូល ស៊ុយហេង ក៏បានលើកឡើងដែរថា កម្មវិធី «ខ្ញុំឆ្នើម» នេះនឹងអាចជួយតម្រង់ទិសសិស្សានុសិស្សជាច្រើនដែលកំពុងត្រៀមខ្លួនសម្រាប់ការប្រឡងថ្នាក់មធ្យមសិក្សាទុតិយភូមិនៅពេលខាងមុខនេះ ឲ្យជ្រើសរើសមុខវិជ្ជាណាមួយដែលត្រឹមត្រូវសម្រាប់ខ្លួនឯងបានយ៉ាងប្រសើបំផុត។

សូមបញ្ជាក់ផងដែរថា ក្នុងឆ្នាំ២០២២ កម្មវិធី «ខ្ញុំឆ្នើម» នឹងរៀបចំ ចំនួន៣លើក រៀងរាល់២សប្តាហ៍ម្ដង ព្រមទាំងមានការចូលរួមពីវិទ្យាល័យចំនួន១៥ ក្នុងរាជធានីភ្នំពេញ។ ជាពិសេសជាងនេះសម្រាប់កម្មវិធីលើកទី៣ នឹងមានការរៀបចំតាមរយៈឌីជីថល ដោយមានការ Live ផ្ទាល់តាម Zoom និង Facebook ដូចនេះ សិស្សានុសិស្ស កំពុងរៀនថ្នាក់ទី១២ ពីវិទ្យាល័យផ្សេងៗក៏អាចចូលរួមបាន៕​ អត្ថបទ​ ៖ រដ្ឋា