បន្ទាយមានជ័យ៖ រដ្ឋមន្ត្រីក្រសួងសង្គមកិច្ច ​ជំរុញ​ដល់ក្រុមការងារ​ជំនាញ​បច្ចេកទេស​ទទួល​បន្ទុក​សាងសង់​ទាំងអស់ត្រូវធ្វើយ៉ាងណាខិតខំ​បំពេញភារកិច្ចការងារស្នូល​របស់ខ្លួន​ឱ្យ​បានល្អប្រសើរ​និងជា​អគារធ្វើឡើងមានគុណភាព​រឹងមាំ​ជាប់​បានយូរសំរាប់បម្រើការងារ​បាន​យូរអង្វែង​។

ឯកឧត្ដម វង្ស សូត រដ្ឋមន្ត្រីក្រសួងសង្គមកិច្ច អតីតយុទ្ធជន​និងយុវ​នីតិសម្បទា ថ្លែងក្នុង​ឱកាស​អញ្ជើញ​ទស្សនកិច្ច​ការងារ​នៅមណ្ឌលសំចត និងពិនិត្យ​ដំណើរការ​សាងសង់​អគារចំនួន៥ អគារនៃមណ្ឌលសំចតថ្មី ដែលជាជំនួយ​ឧបត្ថម្ភរបស់​ព្រះរាជាណាចក្រថៃ ក្នុងតម្លៃជិត ១,៥លានដុល្លារ ស្ថិតនៅចំណុចភូមិប្រជាធម្មកើត សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ នៅថ្ងៃទី០៧ ខែកញ្ញានេះ ។

ឯកឧត្តមរដ្ឋមន្រ្តី បានបន្តថា មណ្ឌលអគារសំចតនេះ គឺវាមាន​អត្ថប្រយោជន៍​ច្រើន​សំរាប់​បងប្អូន​ដែល​ជា​ពលករ​បាន​ដាច់ប៉ាស់ស្ព័រ ដែលត្រូវ​បាន​ខាង​អាជ្ញាធរថៃ​បញ្ជូន​មកកម្ពុជា​នោះ​ គឺ​ត្រូវ​បញ្ជូនមកទុក​នៅ​ទីតាំងមណ្ឌល​សំចត​ខាងលើនេះ ដើម្បី​សម្រាក​ពិនិត្យ​រាល់​បញ្ហានានា​មុននឹង​ឲ្យពួកគាត់​ចាក​ចេញពីមណ្ឌលសំចតនេះ។

ឯកឧត្តមរដ្ឋមន្រ្តី បានបញ្ជាក់ថា កត្តា​ទាំងអស់នេះ​ គឺ​ជា​ការយកចិត្តទុកដាក់​គិតគូរ​ប្រកប​ដោយ​គតិបណ្ឌិត​ខ្ពស់​របស់​សម្តេចតេជោ នាយករដ្ឋ​មន្រ្តី​នៃកម្ពុជា​ ចំពោះ​បញ្ហា​ប្រឈម​នានា​របស់បងប្អូន​ប្រជាពលរដ្ឋខ្មែរគ្រប់រូប៕ អត្ថបទ៖ ឃិន សារិទ្ធ