UN៖ ទីភ្នាក់ងារឃ្លាំមើលនុយក្លេអ៊ែររបស់អង្គការសហប្រជាជាតិបាននិយាយថា ខ្លួនមិនអាចធានាសន្តិភាពកម្មវិធីនុយក្លេអ៊ែររបស់អ៊ីរ៉ង់បានទេ ដោយនិយាយថា មិនមានជំហានរីកចម្រើនក្នុងការស្រាយចម្ងល់អំពីវត្តមានកាលពីកន្លងទៅ នៃវត្ថុធាតុដើមផលិតនុយក្លេអ៊ែរនៅឯទីតាំងនានាដែលមិនបានប្រកាស។
ទីភ្នាក់ងារសារព័ត៌មានមួយចំនួនបានរាយការណ៍កាលពីថ្ងៃពុធថា ទីភ្នាក់ងារថាមពលអាតូមិកអន្តរជាតិ (IAEA) បាននិយាយនៅក្នុងរបាយការណ៍ថ្មីមួយដែលខ្លួនមិនហានធានាថា កម្មវិធីនុយក្លេអ៊ែររបស់អ៊ីរ៉ង់ប្រើប្រាស់សម្រាប់សន្តិភាពនោះទេ។ របាយការណ៍នោះនិយាយថា ប្រធានទីភ្នាក់ងារ IAEA លោក Rafael Grossi ព្រួយបារម្ភកាន់តែខ្លាំងថា អ៊ីរ៉ង់មិនបានប្រាស្រ័យទាក់ទងជាមួយទីភ្នាក់ងារនេះ លើបញ្ហាសេសសល់មួយចំនួនអំឡុងពេលនៃការផ្ដល់របាយការណ៍ ដូច្នោះហើយទើបមិនមានការរីកចម្រើនឆ្ពោះទៅរកការដោះស្រាយបញ្ហាទាំងនោះ។
ភាគីអ៊ីរ៉ង់បាននិយាយយូរមកហើយថា កម្មវិធីនុយក្លេអ៊ែររបស់ខ្លួនមានសន្តិភាពបំផុត។ ទីភ្នាក់ងារ IAEA បានកំពុងដាក់សម្ពាធលើអ៊ីរ៉ង់ដើម្បីទទួលបានចម្លើយនានា អំពីវត្តមាននៃវត្ថុធាតុដើមផលិតអាវុធនុយក្លេអ៊ែរនៅទីតាំងចំនួន៣ ដែលមិនត្រូវបានប្រកាស។ ដោយពុំមានការបកស្រាយគួរឲ្យទុកចិត្តពីភាគីអ៊ីរ៉ង់ លើអ្វីដែលបានកើតឡើងចំពោះការផលិតសារធាតុអ៊ុយរ៉ានីញ៉ូម ដែលទំនងជាមានវត្តមាននៅទីតាំងចំនួន៣ ទីភ្នាក់ងារនេះបាននិយាយថា ខ្លួនមិនអាចធានាថា សារធាតុអ៊ុយរ៉ានីញ៉ូមនោះត្រូវបានអ៊ីរ៉ង់លួចផលិត ដើម្បីផលិតអាវុធនោះទេ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
