បន្ទាយមានជ័យ៖ ឯកឧត្តម ទេសរដ្ឋមន្រ្តី គន់ គីម អនុប្រធានទី១ នៃគណៈកម្មាធិការជាតិគ្រប់គ្រង​គ្រោះមហន្តរាយ បានឱ្យដឹងថា ស្ថានភាពជន់លិចផ្ទះប្រជាពលរដ្ឋដោយជំនន់ទឹកភ្លៀងតាមព្រំដែនកម្ពុជា-ថៃ ពុំមានភាពធ្ងន់ធ្ងរនោះទេ។

ថ្លែងប្រាប់BTV នៅថ្ងៃទី៨ ខែកញ្ញា ឆ្នាំ២០២២ ឯកឧត្តម ទេសរដ្ឋមន្រ្តី គន់ គីម អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា បន្ទាប់ពីក្រសួងធនធានទឹក និងឧតុនិយម ព្យាករណ៍អំពីធាតុអាកាសកម្ពុជាដែលប្រឈមដោយជំនន់ទឹកភ្លៀង ជាក់ស្តែងនៅថ្ងៃនេះ មានប្រជាពលដ្ឋរស់នៅតាមដងអូរ និងស្ទឹងក្នុងឃុំស្រឡៅ ស្រុកម៉ាឡៃ ខេត្តបន្ទាយមានជ័យ បានរងប៉ះពាល់ដោយសារជំនន់ទឹកភ្លៀងប្រមាណ ១០គ្រួសារ រហូតទាមទារឱ្យជម្លៀសពួកគាត់ទៅទីទួលសុវត្ថិភាពដែលអាជ្ញាធរមូលដ្ឋានបានរៀបចំ។ ឯកឧត្តម ទេសរដ្ឋមន្រ្តី បន្តថា ទឹកជំនន់លិចផ្ទះសម្បែងប្រជាពលរដ្ឋនៅស្រុកម៉ាឡៃនេះ គឺជាទឹកភ្លៀងដែលបង្អុលមកប៉ុន្មានថ្ងៃជាប់គ្នា ខណៈស្ថានភាពនេះអាជ្ញាធរមូលដ្ឋានអាចគ្រប់គ្រងបាន។

ឯកឧត្តម ទេសរដ្ឋមន្រ្តី បញ្ជាក់ថា ជំនន់ទឹកភ្លៀងក្នុងស្រុកម៉ាឡៃនេះ មិនមែនជាទឹកដែលហូរមកពីប្រទេសថៃឡើយ តែគឺជាទឹកភ្លៀងហូរមកពីលើភ្នំជិតព្រំដែនកម្ពុជា-ថៃ រហូតធ្វើឱ្យអូរ និងស្ទឹងក្បែរតំបន់នោះកើនឡើង និងប៉ះពាល់ផ្ទះសម្បែងរបស់ប្រជាពលរដ្ឋ។

ឯកឧត្តម ទេសរដ្ឋមន្រ្តី ថ្លែងថា ក្នុងនាមគណៈកម្មាធិការជាតិគ្រប់គ្រងគ្រោះមហន្តរាយ កំពុងបន្តយកចិត្តទុកដាក់តាមដានជាប់ជាប្រចាំ តាមរយៈការប្រកាសរបស់ក្រសួងធនធានទឹក និងឧតុនិយម ដែលនឹងមានភ្លៀងធ្លាក់ក្នុងរយៈពេលប៉ុន្មានថ្ងៃនេះ។

ឯកឧត្តម ទេសរដ្ឋមន្រ្តី បន្ថែមថា ជាមួយនឹងតាមដាននេះ បណ្តាកងឯកភាពរុករក និងសង្គ្រោះមហន្តរាយសរុបទាំង១៦កង បានត្រៀមរួចរាល់ ដើម្បីឆ្លើយតបចំពោះហេតុការណ៍ដែលអាចកើតឡើងជាយថាហេតុ ពិសេសគឺជំនន់ទឹកភ្លៀងដែលកម្ពុជាតែងតែប្រឈមជារៀងរាល់ឆ្នាំ។