ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហាញនូវការគាំទ្រដល់វិទ្យាស្ថាន​យុទ្ធសាស្ត្រ KSI នៅក្នុងការចាប់ផ្តើមដំណើរការក្លឹបសេដ្ឋកិច្ចអាស៊ាន និងមូលនិធិអភិវឌ្ឍន៍កម្ពុជា ។

នៅក្នុងឱកាសអនុញ្ញាតឱ្យលោក តាន់ស្រ៊ី ម៉ៃខល យៀវ (Michael yeoh ) ប្រធានវិទ្យាស្ថាន​យុទ្ធសាស្ត្រKSI អាស៊ី ប៉ាស៊ីហ្វិក ចូលជួបសំដែងការគួរសមនៅវិមានសន្តិភាព នាព្រឹកថ្ងៃទី ៨កញ្ញានេះ ជាមួយនឹងការសាទរនិងគាំទ្រដល់ការចាប់ផ្តើម នៃដំណើរការក្លឹបសេដ្ឋកិច្ច​អាស៊ាន​របស់វិទ្យាស្ថានមួយនេះ​ សម្តេចបាន ផ្ដល់ជាអនុសាសន៍ថា បន្ថែម ទៅលើអ្វីដែលក្លឹបសេដ្ឋកិច្ច​អាស៊ាន​ចង់ធ្វើគួរពិចារណាចូលរួមចំណែក​ លើការពិនិត្យ វាយតម្លៃនិងផ្ដល់ធាតុចូលដល់​អាស៊ាន​ផង និងផ្សព្វផ្សាយ អំពីលទ្ធផលការងាររបស់អាស៊ានផង។

សម្ដេចក៏បានគាំទ្រ ទៅដល់កិច្ច​ផ្ដួលផ្ដើម​ បង្កើតមូលនិធិអភិវឌ្ឍន៍កម្ពុជាផងដែរ។ ដោយឡែក​កិច្ចផ្តួចផ្ដើម​ឲ្យមាន​តំបន់សេដ្ឋកិច្ចបៃតង សម្ដេច ​បានមានប្រសាសន៍ថា គំនិតផ្តួចផ្តើមនេះ​គឺស្ថិតនៅក្នុងសំណើរបស់កម្ពុជាដែលបានលើកទៅអាស៊ានកន្លងមក នោះគឺសំណើ​ឲ្យមានកិច្ចព្រមព្រៀងបៃតងអាស៊ាន។

គួរជម្រាបជូនថា នៅក្នុងជំនួបនេះលោក ម៉ៃខល យៀវ (Michael yeoh ) បានគោរពសម្ដែង នូវការ​អបអរសាទរ​ជូនចំពោះសម្ដេចតេជោ ​ដែលកំពុងទទួលបានជោគជ័យ​ក្នុងការដឹកនាំអាស៊ាន​ក្នុងនាម​ជាប្រធានអាស៊ាន និងទទួលបានជោគជ័យក្នុងការដឹកនាំកម្ពុជា ទទួលបានសុខសន្តិភាព និង​ស្ថិរភាព​ធ្វើ​ឲ្យកម្ពុជា​ជាកន្លែងទាក់ទាញប្រកប​ដោយសក្តានុពល​សម្រាប់ការវិនិយោគ​ដែលជាកត្តា​នាំ​ឲ្យកម្ពុជាមានការអភិវឌ្ឍយ៉ាងចាប់រហ័ស។

លោក យៀវ បានគោរពជម្រាបជូន​សម្ដេចតេជោថា​​ បំណងរបស់លោកមកកាន់ព្រះរាជាណាចក្រ​កម្ពុជា​នៅពេល​នេះគឺ៖ ទី១ គោរពសុំការគាំទ្រ​និង​អនុញ្ញាត​ចាប់ផ្ដើមដំណើរការក្លឹប​សេដ្ឋកិច្ចអាស៊ាន ដែលមានទិសដៅ​ជាចម្បង​គឺចូលរួមចំណែកជួយផ្ដល់​ធាតុចូលដល់អាស៊ាន ​និងជាស្ពាន​រវាង​អាស៊ាន​និងស្ថាប័ន និងវិស័យផ្សេងៗ។ទី២ សុំការគាំទ្រលើគំនិតផ្តួចផ្ដើមឲ្យមានតំបន់សេដ្ឋកិច្ច​បៃតង​នៅកម្ពុជា ​និងការបង្កើតមូលនិធិអភិវឌ្ឍន៍​កម្ពុជា​ដែលមូលនិធិនេះ​គឺសម្រាប់​ជំរុញការអភិវឌ្ឍធនធានមនុស្ស ​ជាពិសេសលើវិស័យ IT បញ្ញា​សិប្បនិមិត្ត៕ អត្ថបទ៖ មុត​ សុទ្ធ