ភ្នំពេញ៖ ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល អមដំណើរដោយលោកសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត ព្រឹកថ្ងៃទី៨ ខែកញ្ញា ឆ្នាំ២០២២នេះ បានអញ្ជើញចុះពិនិត្យអគារសម្រាកព្យាបាលជម្ងឺ ថ្មី កម្ពស់៤ជាន់ នៅមនី្ទរពេទ្យមិត្តភាពខ្មែរ-សូវៀត។

ឯកឧត្តមសាស្រ្តាចារ្យ ម៉ម ប៊ុនហេង បានថ្លែងថា នេះជាការរីកចម្រើនថ្មីមួយបន្ថែមទៀត លើ​វិស័យសុខាភិបាល ​ដែលសម្តេចអគ្គមហាសេនាបតីតេជោ ហ៊ុន សែន ​នាយករដ្ឋមន្រី្ត នៃ​ព្រះរា​ជាណា​ចក្រកម្ពុជា ​បានយកចិត្តទុកដាក់ខ្ពស់​ ដល់វិស័យសុខាភិបាល ដោយពង្រីកអគារមនី្ទរពេទ្យ​មិត្តភាពខ្មែរ-សូវៀត ​អគារថ្មីនេះ ​ដាក់គ្រែសម្រាប់ទទួលអ្នកជំងឺ ​បានចំនួន ១៥០គ្រែបន្ថែមទៀត សម្រាប់​ពិនិត្យ ព្យាបាលជំងឺក្រពះ ​ពោះវៀន ​និងប្រព័ន្ធប្រសាទ។ ក្រៅពីការពង្រីកអគារមនី្ទរពេទ្យ យើង​ក៏បង្កើនសមត្ថភាពរបស់មនី្ទរពេទ្យនេះ ឲ្យក្លាយជាមនី្ទរពេទ្យថ្នាក់ជាតិធំមួយ។

ឯកឧត្តម រដ្ឋមន្រី្ត បានបន្ថែមទៀតថា ​ក្រៅពីនោះក្រសួងសុខាភិបាល ក៏បានពង្រីកមនី្ទរពេទ្យ នៅ​តាម​បណ្តាខេត្តនានា ​ដូចជានៅខេត្តត្បូងឃ្មុំ ​សៀមរាប ​ឧត្តរមានជ័យ ​ប៉ៃលិន បាត់ដំបង រតនគីរី មណ្ឌលគីរី ​ដើម្បីគ្របដណ្តប់តាមភូមិសាស្រ្ត ​និងលើកកម្ពស់តាមជំនាញវិទ្យាសាស្រ្ត ជាពិសេស​លើក​កម្ពស់សុខុមាលភាពជូនមនុស្សចាស់​ ស្រី្ត និងកុមារ។

សមិទ្ធផលថ្ងៃនេះ ​គឺជាការអភិវឌ្ឍរីកចម្រើន ចំពោះរូបឯកឧត្តម ផ្ទាល់ គឺជាការគោរពដឹងគុណជូន​ចំពោះ​សម្តេចតេជោ ហ៊ុន សែន នាយករដ្ឋមន្រី្ត ​ដែលលោកបានផ្តល់នូវសុខសន្តិភាព ស្ថេរភាព​នយោបាយ ​ដែលឧបត្ថម្ភគាំទ្រ​ ជាពិសេសវិស័យសុខាភិបាលរបស់យើង ​សម្តេចតេជោ លើកទឹក​ចិត្តដល់មន្រី្តសុខាភិបាល ក្នុងការបំពេញការងារផ្តល់សេវាសុខាភិបាល​ជូនប្រជាពលរដ្ឋ ដោយ​មិនខ្លាចនឿយហត់ ​និងទទួលបានជោគជ័យជាបន្តបន្ទាប់​ រួមជាមួយផ្នែកពាក់ព័ន្ធ និងអាជ្ញាធរ​មូលដ្ឋាន​គ្រប់លំដាប់ថ្នាក់ទាំងអស់។

បើតាមលោកសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ សូវៀត បានឲ្យដឹងថា សព្វថ្ងៃមានបងប្អូនប្រជាពលរដ្ឋ ក្មេង ចាស់ ប្រុស ស្រី ចន្លោះពី ៣០០០នាក់ ទៅ៤០០០នាក់ បានចូល​មកមនី្ទរពេទ្យ ​ដើម្បីទទួលការពិនិត្យ ពិគ្រោះ ​និងព្យាបាលជំងឺ នៅគ្រប់ផ្នែកទាំងអស់ ក្នុងនោះមានប្រជាពលរដ្ឋចន្លោះពី៧០០នាក់ ទៅ៨០០នាក់ បានសម្រាកព្យាបាលជម្ងឺក្នុងមនី្ទរ​ពេទ្យ។ ​ដូច្នេះក្នុងនាមថ្នាក់ដឹកនាំមនី្ទរពេទ្យ មានចិត្តសប្បាយរីករាយនិងមោទនភាពណាស់ ក្នុងការ​បម្រើសុខភាពជូនប្រជាជន ​និងគោរពបាននូវភារកិច្ច និង​គោលនយោបាយរាជរដ្ឋាភិបាល ក្រោម​ការដឹកនាំប្រកបដោយភាពឈ្លាសវៃ​ និងគតិបណ្ឌិតរបស់សម្តេចតេជោ និងឆ្លើយតបទៅនឹងតម្រូវ​ការរបស់ប្រជាពលរដ្ឋ៕អត្ថបទ រដ្ឋា