ភ្នំពេញ៖ មន្រ្តីជំនាញនៃក្រសួង វប្បធម៌ និងវិចិត្រសិល្បៈ មើលឃើញថា ការប្រើប្រាស់ភាសាខ្មែរ ក្នុងពេលបច្ចុប្បន្នគឺមានភាពឆកល្វែង ​ដែលបង្ករឱ្យមានការប្រើប្រាស់ខុស ​ទាំងក្នុងសំណេរ និងការអាន។ ​ជាដំណោះស្រាយមួយលើ បញ្ហានេះ ​មន្រ្តីជំនាញណែនាំឱ្យប្រើប្រាស់ វចនានុក្រម ជាគោល។

ជាការមើលឃើញនូវបញ្ហា កំហុសឆ្គងការប្រើប្រាស់ភាសាខ្មែរ ​ក្នុងពេលបច្ចុប្បន្ន ក្រសួងវប្បធម៌ និងវិចិត្រសិល្បៈ ​ក៏ដូចជាវត្តមានមន្រ្តីមកពីក្រសួងពាក់ព័ន្ធ ​និងបណ្ដាអ្នកជំនាញអក្សរសាស្រ្តខ្មែរ បានរៀបចំសិក្ខាសាលាស្តីពី “វិការភាពនៃការប្រើភាសាខ្មែរពេលបច្ចុប្បន្ន”។ ​កំហុសឆ្គងដែលសង្កេត​ឃើញមាន គឺនៅតាមទីសាធារណៈ ក្នុងប្រព័ន្ធផ្សព្វផ្សាយ ​ប្រព័ន្ធបណ្ដាញសង្គម ដែលបង្កជាបញ្ហា​ស្មុគស្មាញ។ បញ្ហាគឺមកពីការមើលរំលង​ ការមិនចាប់អារម្មណ៍ ​កង្វះការយកចិត្តទុកដាក់ របស់​ខ្មែរជាម្ចាស់ភាសា។ នេះជាការលើកឡើងរបស់ ​លោក កុក រស់ ប្រធាននាយកដ្ឋានសៀវភៅ និងការអាន នៃក្រសួងវប្បធម៌។

លោក កុក រស់ បានលើកឡើងថា ដោយមើលឃើញកំហុសឆ្គងនេះ ​ទើបនាំឱ្យមានការជួបជុំគ្នា ក្នុង​សិក្ខាសាលានេះ ដើម្បីលើកកម្ពស់គុណតម្លៃការប្រើប្រាស់ភាសាជាតិ ពញ្ញាក់ស្មារតីឱ្យយុវជនយល់​ពីសារៈសំខាន់នៃភាសាជាតិចូលរួមថែរក្សាការពារ ភាសា អក្សររបស់ជាតិ។

ពាក់ព័ន្ធនឹងបញ្ហាកំហុសឆ្គងក្នុងការប្រើប្រាស់ភាសាខ្មែរនេះ​ ឯកឧត្តម គឹម ពីនន់ អនុរដ្ឋលេខាធិការនៃក្រសួងវប្បធម៌​ ណែនាំឱ្យប្រើប្រាស់វចនានុក្រមសម្ដេចជួនណាត​ ជាគោល និង​ត្រូវធ្វើការរួមគ្នារវាងក្រសួងមួយចំនួនលើការងារផ្តោត ​ការនិយាយស្ដីឱ្យបានត្រឹមត្រូវ។

សម្រាប់សិក្ខាសាលានេះ អ្នកជំនាញមកពីវិស័យផ្សេងៗ​ លើកឡើងនូវប្រធានបទសំខាន់ចំនួន ៥ ផ្តោតលើ ​ការប្រើប្រាស់ភាសាក្នុងរូបសញ្ញាផ្សព្វផ្សាយ​ជាសាធារណៈ ការប្រើប្រាស់ភាសា​ក្នុង​ប្រព័ន្ធផ្សព្វផ្សាយ ​ការប្រើប្រាស់ភាសាក្នុងការតែងនិពន្ធ ​ការប្រើភាសាសង្ឃសព្ទ រាជសព្ទ និង​ប្រជាសព្ទ និងក្រមសីលធម៌ក្នុងការប្រើប្រាស់ភាសាខ្មែរ៕ អត្ថបទ៖ គឹមហុក