ភ្នំពេញ៖ រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្តម វង សូត បានអះអាងថា ក្នុងរយៈពេលជាង២ឆ្នាំកន្លងមកនេះ រាជរដ្ឋាភិបាល បានចំណាយថវិកាអស់ជិត ៨០០លានដុល្លារ លើការឧបត្ថម្ភសាច់ប្រាក់ជូនដល់ពលរដ្ឋក្រីក្រ និងងាយរងគ្រោះអំឡុងពេលជួបវិបត្តិជំងឺកូវីដ-១៩។

ក្នុងពិធីប្រកាសចូលកាន់មុខតំណែងប្រធានមន្ទីរសង្គមកិច្ចខេត្តបាត់ដំបង នៅថ្ងៃទី៨ ខែកញ្ញា នេះ ឯកឧត្តម វង សូត មានប្រសាសន៍ថា គិតចាប់តាំងពីខែមិថុនា ​ឆ្នាំ២០២០ រហូតដល់ខែកញ្ញា ឆ្នាំ២០២២ រាជរដ្ឋាភិបាល ​បានចំណាយសាច់ប្រាក់ឧបត្ថម្ភជូនពលរដ្ឋក្រីក្រ និងងាយរងគ្រោះក្នុង​អំឡុង​ពេលប្រយុទ្ធនឹងជំងឺកូវីដ១៩ ក្នុងរង្វង់៧០ម៉ឺនគ្រួសារ ​ស្មើនឹងមនុស្សជិត៣លាននាក់។

ក្នុងឱកាសនោះ ឯកឧត្តម សុខ លូ អភិបាលខេត្តបាត់ដំបង បានណែនាំដល់ប្រធានមន្ទីរដែលទើប​ចូល​កាន់មុខតំណែងថ្មី ត្រូវខិតខំ​បញ្ចេញ​ឱ្យអស់ពីសមត្ថភាពប្រកប​ដោយ​ការ​ប៉ិនប្រសព្វ គំនិត​ច្នៃប្រឌិត​ខ្ពស់រស់រវើក ក្នុងស្មារតីយកចិត្តទុកដាក់ដឹកនាំ និងការទទួលខុសត្រូវខ្ពស់ចំពោះមុខថ្នាក់​ដឹកនាំក្រសួង ​និងរដ្ឋបាលខេត្ត។ជាពិសេសត្រូវចេះសហការជាមួយមន្រ្តីក្រោមឱវាទ និង​មាន​ទំនាក់ទំនង​ល្អជាមួយបណ្ដាស្ថាប័នពាក់ព័ន្ធ។

បន្ថែមពីនេះ ឯកឧត្តមអភិបាលខេត្ត ​បានណែនាំដល់ប្រធានមន្ទីរថ្មីត្រូវបន្តពង្រឹងសាមគ្គភាពផ្ទៃក្នុង បង្កើនប្រសិទ្ធសេវាសុខមាលភាពសង្គម​ ជួយដល់កុមារអនាថា ​ប្រយុទ្ធប្រឆាំងការជួញដូរមនុស្ស ពង្រឹង​ពង្រីកប្រព័ន្ធសន្តិសុខសង្គម ​អភិវឌ្ឍន៍​សមត្ថភាពស្ថាប័ន គៀរករ​ប្រភព​ធនធានផ្នែក​បច្ចេកទេស​ និងហិរញ្ញវត្ថុដោយមានកិច្ចសហការល្អជាមួយអង្គការដៃគូ៕