ភ្នំពេញ៖ នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានលើកឡើងថា កង្វល់​របស់​ប្រជាពលរដ្ឋ គឺជាកាតព្វកិច្ចរបស់ស្នងការដ្ឋាននគរបាលខេត្ត ដែលកង្វល់ពាក់ព័ន្ធ​ទៅនឹង​បទល្មើសលួច ឆក់ប្លន់ និងបទល្មើស​គ្រឿងញៀន ដែលធ្វើឲ្យប៉ះពាល់ទៅដល់កូនចៅប្រជាពលរដ្ឋ ក៏ដូចជាសង្គមជាតិ។

នាយឧត្តមសេនីយ៍ នេត សាវឿន អគ្គស្នងការនគរបាលជាតិ ក្នុងពិធីប្រកាសផ្ទេរភារកិច្ច និង​តែង​តាំង​មុខតំណែងស្នងការនគរបាលខេត្តក្រចេះ ​បានជំរុញឱ្យគណៈបញ្ជាការឯកភាព និង​នគរបាល ត្រូវទទួលខុសត្រូវ និងអនុវត្តឲ្យបានហ្មត់ចត់ ពិសេស ​គឺតាមបណ្ដាប៉ុស្តិ៍រដ្ឋបាលទាំងអស់ ត្រូវ​ប្រុង​ប្រយ័ត្នអំពីរឿងអាកប្បកិរិយាពាក្យសម្ដី ​និងការយឺតយ៉ាវការងារ ដើម្បីជួយសម្រួលរាល់​កិច្ច​ការងារ​ប្រជាពលរដ្ឋនៅតាមមូលដ្ឋាន។

នាយឧត្តមសេនីយ៍ បានសង្កត់ធ្ងន់ទៅលើតួអង្គសំខាន់ៗចំនួន៥ នៅក្នុងការអនុវត្តគោន​យោបាយ​រដ្ឋាភិបាល ក្នុងនោះមានតួអង្គមេឃុំ ស្មៀនឃុំ មេប៉ុស្តិ៍រដ្ឋបាល ​មេភូមិ និងប៉ុស្តិ៍មណ្ឌលសុខភាព មន្ត្រីប៉ុស្តិ៍រដ្ឋបាល ​មានភារកិច្ចពិសេសមួយ គឺដើរតាមខ្នងផ្ទះសួរប្រជាពលរដ្ឋ ពាក់ព័ន្ធទៅ​លើ​លិខិតស្នាម បែបបទរដ្ឋបាល​ ដែលជាកាតព្វកិច្ចមួយជូនពលរដ្ឋ កុំឱ្យចាំបាច់ពលរដ្ឋស្នើ ហើយ​ក៏កុំឱ្យមានការរង់ចាំយូរ​ ដោយចាត់ទុកប្រជាពលរដ្ឋនៅក្នុងមូលដ្ឋាន ​និងជាឪពុកម្ដាយ ជា​អាណាព្យាបាល ជា​សាច់ញាតិ ដូច្នេះត្រូវបម្រើដោយពិតប្រាកដ ។

អគ្គស្នងការ ​បានក្រើនរំលឹកទៅដល់ស្នងការថ្មីខេត្តក្រចេះ ត្រូវសហការជាមួយនឹងកងកម្លាំង​ប្រដាប់​អាវុធ និងមន្ទីរអង្គភាពពាក់ព័ន្ធ ​ដើម្បីធ្វើជាសេនាធិការជូនគណៈបញ្ជាការឯកភាពខេត្ត ជា​ពិសេស​កិច្ច​សហប្រតិបត្តិការទំនាក់ទំនងល្អជាមួយប្រទេសជិតខាង ​ដោយភូមិសាស្ត្រខេត្តក្រចេះ គឺនៅ​ជាប់ព្រំប្រទល់ប្រទេសវៀតណាម ​ដើម្បីបង្កលក្ខណៈងាយស្រួលដល់កិច្ច​សហប្រតិបត្តិការ​ក្នុងការទប់ស្កាត់ ​និងបង្ក្រាបនូវរាល់បទល្មើសឆ្លងដែននានា ៕ អត្ថបទ៖ សេង ម័រ